[1] Toꞌo pinaꞌin inin weꞌ bang aꞌahin mabayaꞌ ginellal nakuraꞌ meꞌ masandel pu si Isa Almasihin hāp inangutne inin.
[2] Aꞌa ginellal nakuraꞌ meꞌ masandel pu si Isa Almasihin subey aꞌa gaꞌ niyaꞌ panallaꞌan iye. Subey dambuwaꞌ du hadja andanen. Aꞌa miyaꞌan subey gaꞌi ūtanne napsunen, subey hāp pikilannen duk hāp addatnen. Bang niyaꞌ aꞌa pī si lumaꞌne subey addatanne teꞌed. Subey isab iye pandey magusihat si saweꞌne.
[3] Subey iye gaꞌi maglangohan. Subey iye gaꞌi bingis saguwaꞌ subey iye mura binoꞌo magsulut. Subey iye gaꞌi pananasaꞌ duk gaꞌi napsuhan si sīn.
[4] Subey iye taꞌu ngahatul anak-andanen. Subey iye aꞌa pagaddatan weꞌ meꞌ anaknen duk tinuhut weꞌ de meꞌ pangandaꞌakannen.
[5] Peggeꞌ bistahun bi, bang ginellal nakuraꞌin gaꞌi bisan taꞌu ngahatul anak-andanen inumey pangahatulne meꞌ masandel pu si Isa si antanannen?
[6] Gaꞌi isab makajari ginellal nakuraꞌ bang aꞌa baꞌahu pe sandel pu si Isa Almasi, sabab bang gaꞌi pe basag sandelnen kaw-kaw ngalangkew ateynen duk ilaboꞌan hukuman iye kuweꞌ hukuman si nakuraꞌ seyitanin awwalley.
[7] Saguwaꞌ bang aꞌa ginellal nakuraꞌ subey iye aꞌa inaddatan bisan weꞌ meꞌ aꞌa manggaꞌi manuhut Isa Almasihin, peggeꞌ bang niyaꞌ panallaꞌande iye bu bissā-bissāhande iye, kaw iye sinassat maghinangan laꞌat duk iye miyaꞌan kinabayaꞌan nakuraꞌ seyitanin.
[8] Manjari pasal meꞌ aꞌa ginellal isab nabangan nakuraꞌ si langgalin subey isab hāp addatden duk kapangandelan siye. Subey siye gaꞌi maginuman makalango duk subey gaꞌi napsuhan si sīn.
[9] Subey siye pateteg si toloꞌ mabennal sabab Isa Almasihin bakas pinakitaꞌu weꞌ Tuhanin. Subey isab siye gaꞌi maghinangan laꞌat supaya gaꞌi sasew dem pikilanden.
[10] Duk meke siye ginellal tabang nakuraꞌ si langgalin subey dahuꞌ pinandogahan addatden. Bang tapandoga weꞌ asal hāp du addatden makajari siye ginellal tabang nakuraꞌin.
[11] Damikkiyan andaden subey isab hāp addatden duk gaꞌi ngalimutan saweꞌde. Subey isab gaꞌi ūtande napsuden duk subey siye kapangandelan si ine-ine.
[12] Aꞌa ginellal inin subey dambuwaꞌ du andanen. Subey hāp pangahatulne anak-andanen duk kēmon saweꞌne magdambuwaꞌ lumaꞌin.
[13] Peggeꞌ meꞌ aꞌa ginellal inin bang hāp du paghinangden asal pinahadje du siye duk bahani du siye missā sabab sandelde pu si Isa Almasihin.
[14] Na, Timoteo, ngase-ngase ku weꞌ tapiyu du ku si kaꞌu mura. Saguwaꞌ sulatante ne kew hadja meꞌ toloꞌ inin
[15] supaya bang niyaꞌ makaꞌalal aku, kataꞌuhannu du bang saꞌingge subey kawul-piꞌilten bi meꞌ aꞌa sukuꞌ si Tuhanin, Tuhan maꞌellumin. Kite bi meꞌ pangandelan Tuhan toloꞌ mabennalin. Hangkan subey usihatte bi duk bēbbegante bi toloꞌ mabennal inin.
[16] Gaꞌ niyaꞌ kapamasuwey weꞌ asal gaꞌi lalem toloꞌ āgamate bi inin, iye toloꞌ mabennal gaꞌ kataꞌuhan samantaꞌan gaꞌ pe pinakitaꞌu weꞌ Tuhanin, hātinen toloꞌ sabab Isa Almasihin: Laꞌi iye si surgaꞌ bu pitu iye si dunya manjari manusiyaꞌ. Niyawa Sutsihin naksiꞌ weꞌ iye asal bentel. Takite iye weꞌ meꞌ malaꞌikatin. Minahalayak sabab iye si kēmon kabangsa-bangsahan. Duk kinahagad iye weꞌ meꞌ aꞌahin. Manjari pinaꞌangkat iye pī balik si surgaꞌ duk laꞌi iye magbayaꞌ.