[1] Asal pastiꞌ pinaꞌin Niyawa Tuhanin weꞌ si pasōngan niyaꞌ meꞌ aꞌa nayikutan toloꞌ mabennalin. Iye pinakalede iyan meꞌ seyitanin duk tuhutde iyan meꞌ toloꞌden.
[2] Meꞌ toloꞌde inin pinalataꞌ weꞌ meꞌ guru madustaꞌanin. Meꞌ hinangande inin gaꞌi ne makasasew pikilanden peggeꞌ tagam ne siye magdustaꞌ.
[3] Meꞌ guru inin magtoloꞌ weꞌ dusehan koꞌ aꞌahin bang magella atawa maganda. Paꞌinde isab weꞌ niyaꞌ koꞌ meꞌ kinakan gaꞌi makajari kakante. Salaꞌ toloꞌde inin peggeꞌ kēmon kinakan inin pinapanjari du weꞌ Tuhanin. Basta magsukul kite bi si Tuhan makajari kite bi mangan kinakan ine-ine, kite bi meꞌ masandel pu si Isa Almasihin duk mangataꞌuhan toloꞌ mabennalin.
[4] Peggeꞌ kēmon bakas pinapanjari weꞌ Tuhanin hāp. Hangkan subey tayimaꞌte hadja basta magsukul kite si iye.
[5] Peggeꞌ halal kēmon kinakanten sabab lapal Tuhanin duk sabab pagsukulten isab.
[6] Manjari, Timoteo, bang pangusihatnu meꞌ pinaꞌinku inin si meꞌ pungtinaꞌite masandel pu si Isa Almasihin, hāp paghinangnu pu si Isa Almasihin. Duk basag sandelnun peggeꞌ lapal kinahagadten asal tuhutnu ne paꞌin. Asal teteg kew nuhut toloꞌ mabennalin.
[7] Saguwaꞌ daꞌa asipun meꞌ kissa-kissa paꞌinde makaboꞌo aꞌahin tudju Tuhan bu gaꞌi du. Meꞌ kissa miyaꞌan gaꞌ teꞌed niyaꞌ kagunahanne. Saguwaꞌ tagamun pikilannun luwal mikil toloꞌ mabennalin duk du tatuhutnu meꞌ kinabayaꞌan Tuhanin.
[8] Bang pabasagte baranten, niyaꞌ kagunahanne saguwaꞌ kulang du. Saguwaꞌ bang iye pinabasagten sandelte si Tuhanin supaya tatuhutte kinabayaꞌan Tuhanin, na, ekka teꞌed kagunahanne. Moꞌo kite inin si kahāpan dumaꞌin hadja tuꞌu si dunya saguwaꞌ sampay si ahilat.
[9] Bennal teꞌed bissā miyaꞌan duk pataꞌ teꞌed kinahagad.
[10] Hangkan kite bi maghinang ne paꞌin si Tuhan duk magtuyuꞌ teꞌed magusihat peggeꞌ Tuhanin pangase-ngasehanten bi; iye Tuhan maꞌellumin duk iye manimbul kēmon manusiyaꞌin, lagiꞌ ne meꞌ masandel si iyehin.
[11] Manjari, Timoteo, kēmon meꞌ usihatku inin daꞌakun tinuhut si meꞌ masandel pu si Isa maluꞌuhin.
[12] Daꞌa kew iyaꞌ bang niyaꞌ ngandiyawaꞌan kaꞌu peggeꞌ magusihat ne kew bu bataꞌ pe kew. Saguwaꞌ subey hāp kawul-piꞌilnun duk bissānun. Kalasahanun pagkasinun, pabasagun sandelnu si Tuhanin duk subey gaꞌ niyaꞌ laꞌat dem pikilannun. Manjari binatukan du kawul-piꞌilnun weꞌ meꞌ masandel pu si Isa Almasi maluꞌuhin.
[13] Samantaꞌan gaꞌi pe ku tapiyu, tuyuꞌanun teꞌed matsa amban dem kitab duk usihatanun duk toloꞌanun siye kahabaꞌ kaꞌam magtipun duk meꞌ pagkasibi masandel pu si Isa Almasihin.
[14] Gunahun teꞌed kapandeyan pinangurung Niyawa Tuhan si kaꞌuhin. Pinangurung kapandeyan inin si kaꞌu matuꞌuhin sakaliꞌ niyaꞌ pinaꞌal bissā amban Tuhan sabab kaꞌu duk binettad weꞌ meꞌ bahiꞌin meꞌ tanganden pī si kaꞌu.
[15] Hinangun teꞌed kēmon pinahinangku si kaꞌu si sulat inin ateynun dambūs-būs supaya takite aꞌahin kēmon weꞌ pasōng ngahāp hinangannun.
[16] Pahatul-hatul kew si dinu duk meꞌ panoloꞌnun. Duk hinangun paꞌin meꞌ usihatku si kaꞌuhin. Bang pagtuyuꞌannu inin hininang, dumaꞌin hadja kaꞌu matimbulin saguwaꞌ kēmon isab makakale kaꞌuhin.