[1] Daꞌa amāhanun bang lella bahiꞌ amban kaꞌu saguwaꞌ missā kew si iye pahāp-hāp kuweꞌ samanu bang niyaꞌ panoloꞌnu si iye. Meꞌ lella mabataꞌin kimmatanun kuweꞌ meꞌ pungtinaꞌinu.
[2] Meꞌ dende mabahiꞌ amban kaꞌuhin addatanun kuweꞌ saꞌinu. Duk meꞌ dende mabataꞌin addatanun kuweꞌ meꞌ pungtinaꞌinu isab. Daꞌa kew magpikilan seddili si siye.
[3] Manjari pasal meꞌ dende balu masandel pu si Isa Almasihin bang gaꞌ niyaꞌ ngahatul siye, addatanun siye.
[4] Saguwaꞌ bang dende baluhin taga anak atawa ampu subey dahuꞌ siye taꞌu nabangan matettoꞌaden. Peggeꞌ bang asal malasa siye si Tuhan subey tabangde matettoꞌaden atawa papuꞌden panumbasde panabangde siye matuꞌuhin. Bang hinangde inin, kasulutan Tuhanin si siye.
[5] Saguwaꞌ bang dende baluhin dendangan saꞌ, iye pangase-ngasehannen Tuhanin, ngampun-ngampun iye duk māku-māku iye tabang si Tuhan ellew-sangem.
[6] Saguwaꞌ bang niyaꞌ dende balu bu iye luwal tapikilnen nganduhulan napsu barannen magadjak-adjak, kuweꞌ iye dalil matey bisan pe iye ellum.
[7] Pasampayun usihatku inin piyu si meꞌ masandel pu si Isa Almasi maluꞌuhin supaya gaꞌ niyaꞌ panallaꞌan aꞌa siye.
[8] Saguwaꞌ bang niyaꞌ aꞌa luꞌu gaꞌi ngahatul usbanen, lagiꞌ ne bang magtewtey-anak siye, aꞌa iyan ilebbahan ne weꞌ ne toloꞌ kinahagadten bi duk laꞌat pe iye amban aꞌa manggaꞌi masandel pu si Isa Almasihin.
[9] Manjari pasal meꞌ dende balu, listahun meꞌ balu sōng tinabangan weꞌ meꞌ masandel pu si Isa Almasihin. Listahun hadja meꞌ balu labi ne ennempūꞌ tahun umulden duk dambuwaꞌ hadja bakas elladen.
[10] Subey isab bawag meꞌ hinangande mahāpin, hātinen hāp pamaketoꞌde meꞌ anakden, addatande teꞌed meꞌ aꞌa mapī si lumaꞌden, diyawaꞌ ateyden maghinang siye bisan ine si meꞌ sukuꞌ si Tuhanin, tabangande meꞌ dem kasusehanin duk sasuku hinangan hāp hinangde. Meꞌ dende balu kuweꞌ iyan makajari ilista.
[11] Saguwaꞌ bang meꞌ dende balu bataꞌ pe, daꞌa siye sakupun dem listanu lu peggeꞌ mura pinda pikilanden. Bang tekka bayaꞌde magellahin, tayikutande ne du paghinangde pu si Isa Almasihin.
[12] Manjari kapagduse siye peggeꞌ gaꞌ du tumanande sanggupde pu si Isa Almasi tagnaꞌ kabaluden.
[13] Ngatagam isab siye lisuꞌan maghinang duk iye bahanden ngalatag kalumaꞌan. Duk dumaꞌin hadja iyan, magkoto-koto isab siye duk pakulebeꞌ siye si meꞌ palkalaꞌ saweꞌden, luwal siye missā meꞌ manggaꞌi subey binissāden.
[14] Bang si aku, gam pe meꞌ balu mabataꞌin magella balik duk maganak duk ngahatul dem lumaꞌde. Manjari gaꞌ niyaꞌ laꞌat tabissā meꞌ bantaten bi sabab kite bi meꞌ masandel pu si Isa Almasihin.
[15] Peggeꞌ niyaꞌ ne meꞌ balu nayikutan Tuhanin duk iye tinuhutden nakuraꞌ seyitanin.
[16] Hangkan hep sa pinaꞌinkun, bang niyaꞌ luꞌu dende sandel pu si Isa bu taga usba dende balu subey ne iye mangahatul baluhin dumaꞌin meꞌ masandel pu si Isa sinduwehin supaya isab tahatulde meꞌ dende balu manggaꞌ niyaꞌ usbaden.
[17] Pasal meꞌ bahiꞌ hinang nakuraꞌ si langgalin bang hāp du pangantande meꞌ masandel pu si Isa Almasihin, pataꞌ siye pinahadje duk sinuweldohan pahāp, lagiꞌ ne meꞌ mapages magmahalayak duk magusihat lapal Tuhanin.
[18] Peggeꞌ tasulat hep dem kitab, pinaꞌin, “Daꞌa pugungun bi behe kābewin sābune magdiꞌik paleyin.” Duk niyaꞌ isab pinaꞌin seddili, “Bang aꞌahin dinaꞌak maghinang pataꞌ iye tinangdanan.”
[19] Bang saꞌupama niyaꞌ nuntutan dambuwaꞌ bahiꞌbi, daꞌa asipun tuntutne miyaꞌan bang gaꞌ du niyaꞌ duwangan atawa tellungan makasaksiꞌ si dusenen.
[20] Bang niyaꞌ kapagduse, toloꞌanun iye si harapan meꞌ masandel pu si Isahin kēmon supaya meꞌ sinduwehin mintang duk gaꞌi lekkatde hininangne miyaꞌan.
[21] Timoteo, iyuꞌ Tuhanin pakale duk pakale isab Isa Almasi duk meꞌ malaꞌikat masutsihin, asal sessaꞌante kew tuhutun meꞌ pangandaꞌakanku si kaꞌu dem sulat inin. Daꞌa pagbiddaꞌun bisan sine. Ine-ine hinangnu daꞌa kew mēbbegan sine-sine sewukat ne kew kahāpan si siye.
[22] Daꞌa kew magdayiꞌ-dayiꞌ meneꞌ aꞌa hinang nakuraꞌ luꞌu diyalemanbi meꞌ masandel pu si Isa Almasihin saguwaꞌ pandogahanun dahuꞌ addatnen. Peggeꞌ bang saꞌupama aꞌa tapeneꞌnun magduse, sampay kaꞌu sinakup kew si dusenen. Pahatul kew, daꞌa kew magduse si hinangannu duk si pikilannu.
[23] Daꞌa isab pikilun weꞌ subey boheꞌ hadja ininumnun. Saguwaꞌ hāp bang nginum kew boheꞌ buwaꞌ ubas kuweꞌahat panambal bettengnun peggeꞌ daran kew saki.
[24] Niyaꞌ meꞌ aꞌa pastiꞌ teꞌed duseden duk kataꞌuhante weꞌ taga duse siye duk hinukum siye si pasōngan. Niyaꞌ isab meꞌ aꞌa sinduwe gaꞌi magtawus takite duseden, saguwaꞌ gaꞌi tiggel kataꞌuhan du.
[25] Damikkiyan isab niyaꞌ meꞌ hinangan mahāpin pastiꞌ teꞌed si meꞌ aꞌa. Duk bisan meꞌ hinangan hāp gaꞌi pe tantu pastiꞌ gaꞌi du katapukan.