[1] Iye inin meꞌ toloꞌkun. Kaꞌissaꞌ, subey kite bi meꞌ masandel pu si Isa Almasihin ngampun-ngampun si Tuhan duk māku-māku duk magsukul si iye. Subey kite bi ngampun-ngampun para kēmon manusiyaꞌin;
[2] para meꞌ magbayaꞌin duk para kēmon aꞌa taga kapatutin supaya sanyang duk hāp dem paglahatanten bi duk samunsayaꞌte bi magmātabat si Tuhan duk hāp isab kawul-piꞌilten bi.
[3] Bang ngampun-ngampun kite bi sa inin hāp duk kasulutan Tuhanin, iye manimbul kitehin bi.
[4] Kabayaꞌan Tuhanin hep weꞌ kēmon manusiyaꞌin timbul duk ngataꞌuhan toloꞌ mabennalin.
[5] Dambuwaꞌ du hadja Tuhanin duk dambuwaꞌ du isab hadja mapasellet si Tuhan duk manusiyaꞌin maghāp siye, iye si Isa Almasi pagkasite bi manusiyaꞌ.
[6] Paglillaꞌne umulnen duk pinagantiꞌ weꞌ ne dinen supaya manusiyaꞌin gaꞌi legga Tuhanin sabab duseden. Manjari peggeꞌ matey si Isa Almasi ellew pangeddew Tuhanin hangkan kabugtuꞌante teꞌed weꞌ kabayaꞌan Tuhanin kēmon manusiyaꞌin timbul duk tapī si surgaꞌ.
[7] Inin sababnen hangkan ku kawakilan weꞌ Tuhanin dinaꞌak magusihat toloꞌ mabennal inin si meꞌ aꞌa dumaꞌin Yahudi supaya siye sandel pu si Isa Almasi duk kahagadde toloꞌ mabennalin. Toꞌo pinaꞌinku inin, gaꞌi ku magdustaꞌ!
[8] Antag-antag meꞌ masandel pu si Isahin magtipun nambahayang si Tuhan kabayaꞌankun weꞌ meꞌ lellahin ngampun-ngampun, meꞌ lella nuhut Tuhanin dambūs-būs. Subey gaꞌ niyaꞌ kaꞌastelande duk subey siye gaꞌi magsasaꞌ.
[9] Duk kabayaꞌankun isab meꞌ dendehin subey hāp boꞌohanden. Semmekden subey matalep si dende petten. Subey sarang-sarang hadja pamahāpde diden, gaꞌi pinalanduꞌ paghatulde kōkden atawa paggunade meꞌ pamulawanin duk meꞌ mutsaꞌin duk meꞌ semmek mahalgaꞌin. Peggeꞌ dumaꞌin makahāp dendehin pagdende-dendenen
[10] saguwaꞌ meꞌ hinanganne mahāpin. Inin matalep si meꞌ dende magpaꞌin weꞌ siye asal nuhut Tuhanin.
[11] Meꞌ dendehin isab bang inusihatan subey siye pakale hadja, duk subey siye ngatu tinoloꞌan.
[12] Meꞌ dendehin gaꞌi daꞌakku magusihat atawa magmanda si lella. Subey meꞌ dendehin pakale hadja luꞌu si pagtipun-tipunanbi.
[13] Peggeꞌ Apuꞌ Adam pinapanjari dehellu weꞌ Tuhanin ubus bu Sitti Hawa.
[14] Duk dumaꞌin Apuꞌ Adam kaꞌakkalan nakuraꞌ seyitanin. Saguwaꞌ dendehin kaꞌakkalanin duk iye mangalanggalan saraꞌ Tuhanin.
[15] Saguwaꞌ timbul du meꞌ dendehin si paganakde bang teteg paꞌin sandelden pu si Isa Almasi duk malasa siye si saweꞌde duk sutsi pagateyden. Duk subey hāp kawul-piꞌilden.