[1] Manjari meꞌ kapungtinaꞌihanku, māku-māku koꞌ kaꞌam si Tuhan para si kami. Māku-māku kaꞌam weꞌ aka-aka mahāp sabab Panuhutanin asal palatag palakkes duk kinahagad du weꞌ meꞌ aꞌahin kuweꞌ pakahagadbin.
[2] Māku-māku isab kaꞌam duk kami elligan Tuhanin amban meꞌ aꞌa malaꞌatanin, peggeꞌ gaꞌi hep kēmon aꞌahin kahagad si aka-aka mahāpin.
[3] Saguwaꞌ kapangandelan teꞌed Panuhutanten bi. Patetegne du sandelbin duk banteyanne kaꞌam supaya kaꞌam gaꞌi inusaꞌ weꞌ nakuraꞌ seyitanin.
[4] Sabab sandel kami si Panuhutanten bi kataꞌuhan kami weꞌ tuhutbi du meꞌ pangandaꞌakan kami kaꞌamin duk asal hinangbi ne paꞌin.
[5] Karayaw pasōng Panuhutanin kataꞌubi sabab lasa Tuhan si kaꞌamin, duk sabab pagtuyuꞌ Almasihin.
[6] Manjari meꞌ kapungtinaꞌihanku, sabab kapatut kami amban Panuhutanten bi Isa Almasi, niyaꞌ pangandaꞌakan kami kaꞌam: daꞌa kaꞌam magtuhut-tuhut duk meꞌ pagkasibi tindeg si Isa manggaꞌi mabayaꞌ maghinangin duk gaꞌi nuhut pamanoloꞌ kami si kaꞌamin.
[7] Peggeꞌ kaꞌam, asal kataꞌuhanbi du teꞌed weꞌ subey kami iye binatukanbin. Kaluꞌu kami si kaꞌamin, gaꞌ kami bakas kitebi weꞌ gaꞌ maghinang.
[8] Gaꞌ kami bakas paꞌemmit si kaꞌam saguwaꞌ binayedan weꞌ kami takakan kamihin. Maghinang kami pabasag dumaꞌin hadja ellew saguwaꞌ sampay sangem supaya niyaꞌ kaꞌelluman kami duk gaꞌi kami subey gastuhanbi.
[9] Patut kami māku gastu amban kaꞌam, saguwaꞌ gaꞌ kami māku supaya niyaꞌ pamintanganbi.
[10] Peggeꞌ bisan pe paluꞌu kami si kaꞌamin, iye pangandaꞌakan kami kaꞌamin weꞌ bang niyaꞌ gaꞌi ngatu maghinang, subey iye gaꞌi pakanbi.
[11] Hangkan inin tasubahat kami tuꞌu, peggeꞌ takale kami weꞌ niyaꞌ luꞌu si kaꞌam meꞌ aꞌa bulasan manamal duk gaꞌi teꞌed maghinang, saguwaꞌ iye bahan-bahanden ngulebeꞌan hinang saweꞌden.
[12] Na, si meꞌ aꞌa kuweꞌ iyan, daꞌak kami duk toloꞌan kami siye amban kapatut Panuhutanten bi Isa Almasi, weꞌ subey ne siye pahantap maghinang supaya niyaꞌ kaꞌellumande.
[13] Bang kaꞌam, meꞌ kapungtinaꞌihanku, daꞌa kaꞌam jumuꞌ maghinangan mahāpin.
[14] Bang niyaꞌ luꞌu gaꞌi ngatu nuhut meꞌ pangandaꞌakan kami dem sulat inin, indananun bi aꞌa miyaꞌan duk daꞌa kaꞌam magtuhut duk iye supaya du iye iyaꞌ.
[15] Daꞌa paꞌin isab iye kimmatanun bi kuweꞌ bantabi, saguwaꞌ toloꞌanun bi iye kuweꞌ dambuwaꞌ pungtinaꞌibi.
[16] Karayaw kaꞌam urungan Panuhutanten bi kasanyangan dem ateybi bisan ine matekka si kaꞌamin peggeꞌ iye poꞌon kasanyanganin. Karayaw isab luwal iye luꞌu nuhut-nuhutan kaꞌam.
[17] Aku, si Paul, manulat panambusan inin. Kuweꞌ inin sulatankun sa si meꞌ sulatkun du kēmon.
[18] Karayaw kēmon kaꞌam ipat Panuhutanten bi Isa Almasi. Wassalam