[1] Na, pasal pabalik Panuhutanten bi Isa Almasi, duk pasal panipun kitehin bi laꞌi si iye, inin toloꞌ kami si kaꞌamin meꞌ kapungtinaꞌihankun:
[2] daꞌa kaꞌam mura-mura sasew dem pikilanbin bang niyaꞌ meꞌ suwi-suwi takalebi weꞌ tekka ne ellew papitu Isa Almasi ngahukum meꞌ aꞌa si dunyahin. Bang makakale kaꞌam weꞌ niyaꞌ bakas magpalataꞌ bissā pinabissā koꞌ weꞌ Tuhanin sabab inin atawa bang paꞌinde weꞌ bakas koꞌ inin tabissā kami, atawa weꞌ niyaꞌ koꞌ sulat amban kami sabab inin, daꞌa teꞌed kahagadun bi.
[3] Saꞌingge-saꞌingge daꞌa kaꞌam ngatu pinadupang. Peggeꞌ meke tekka ellew miyaꞌan subey dahuꞌ kaꞌekkahan meꞌ aꞌahin kuntarahande Tuhanin, ubus subey isab dahuꞌ paguwaꞌ aꞌa malaꞌat manamalin. Kuntarahanne teꞌed saraꞌ Tuhanin duk sukuꞌnen si narkaꞌ.
[4] Aꞌa inin bantahanne kēmon pagtuhanan duk kēmon sinambahayang weꞌ manusiyaꞌin. Palangkewne dinen amban siye kēmon duk sampay dem langgal Tuhanin pī iye ningkoloꞌ duk paꞌinne weꞌ iye Tuhanin.
[5] Gaꞌ ke taꞌessebbi? Bakas ne hep kaꞌam kaꞌakahanku sabab inin paluꞌuku pe si kaꞌamin.
[6] Duk kataꞌuhanbi du bang ine managgaꞌ iyehin kuweꞌitu hangkan gaꞌi pe iye paguwaꞌ. Peggeꞌ meke iye paguwaꞌ subey ne taꞌabut waktu pinasukuꞌ si iyehin.
[7] Saguwaꞌ manguntarahan saraꞌ Tuhan inin, asal ne maghinang kuweꞌitu sipuk, saguwaꞌ gaꞌi pe iye makajari paguwaꞌ peggeꞌ tiyaꞌ pe tuꞌu managgaꞌ iyehin.
[8] Bang tahalaꞌ ne managgaꞌ iye inin, manjari meke ne aꞌa manguntarahan Tuhan inin paguwaꞌ, ubus bu magmula du iye weꞌ Isa Almasi pagbalikne pitu. Tihupne hadja iye, magtawus iye matey duk magmula iye sabab sahaya Almasihin.
[9] Paguwaꞌ du aꞌa manguntarahan Tuhan inin, iban balakatne amban nakuraꞌ seyitanin. Maghinang iye kēmon bayuꞌ-bayuꞌan hinangan balakatan duk makite iye meꞌ tandaꞌ duk meꞌ hinangan makaꞌulaliꞌ pamadupangne meꞌ aꞌahin.
[10] Tapadupangne du iyan meꞌ aꞌa sukuꞌ si narkaꞌin peggeꞌ gaꞌi siye ngatu nuhut toloꞌ mabennal sabab Isa Almasihin supaya siye timbul.
[11] Peggeꞌ gaꞌi siye ngatu nuhut mabennalin, hangkan pasagadan Tuhanin du siye pinadupang duk iye kinahagadden meꞌ manggaꞌi mabennalin,
[12] supaya kalaboꞌan hukuman siye kēmon meꞌ manggaꞌi makahagad si toloꞌ mabennalin. Peggeꞌ iye hadja kasinnahanden maghinangan malaꞌatin.
[13] Saguwaꞌ kaꞌam, meꞌ kapungtinaꞌihanku, asal subey teꞌed kami magsukul si Tuhan sabab kaꞌam meꞌ kinalasahan weꞌ Panuhutanten bi. Peggeꞌ gaꞌ pe dunya inin pinapanjari, andang ne kaꞌam tapeneꞌ weꞌ Tuhanin supaya kaꞌam timbul. Timbul kaꞌam peggeꞌ sinutsi ateybin weꞌ Niyawa Tuhanin duk kinahagad weꞌ bi toloꞌ mabennal sabab Isa Almasihin.
[14] Tinawag kaꞌam weꞌ Tuhanin supaya kaꞌam timbul peggeꞌ takale weꞌ bi aka-aka mahāp minahalayak kami sabab si Isahin. Tinawag kaꞌam weꞌ ne supaya kaꞌam tumuhut pinahadje duk si Isa Almasi, Panuhutanten bi.
[15] Hangkan hep meꞌ kapungtinaꞌihanku, patetegun bi teꞌed sandelbin duk tentemanun bi teꞌed meꞌ toloꞌ pamanoloꞌ kami si kaꞌam paluꞌu kamihin duk meꞌ toloꞌ dem sulat pinaboꞌohan kami si kaꞌamin.
[16] Kinalasahan kite bi weꞌ Samate bi Tuhanin, duk hawal lasanen, gaꞌ niyaꞌ tamanan pangasigne ateyten bi duk pinabugtuꞌ weꞌ ne si kite bi inase-asete bi si iyehin. Karayaw Samate bi Tuhanin duk Panuhutanten bi Isa Almasi mahaget ateybin duk ngurungan kaꞌam basag ngahinang duk missā sasuku mahāpin.