[1] Sulat inin amban aku, si Paul, duk meꞌ saweꞌkun si Silas duk Timoteo. Pasampay kami inin piyu si puweblo Tessalonika si kaꞌam kēmon meꞌ sukuꞌ si Samate bi Tuhanin duk si Panuhutanten bi Isa Almasi.
[2] Karayaw kaꞌam luwal ipat Samate bi Tuhanin duk Panuhutanten bi Isa Almasi. Duk karayaw isab pasanyangde dem ateybin.
[3] Meꞌ kapungtinaꞌihanku masandel pu si Isa Almasihin, subey kami luwal magsukul si Tuhan sababbi. Asal patut kami magsukul peggeꞌ magkasōng teꞌed sandelbi pu si Isa Almasihin duk magkasōng isab lasabi si meꞌ pagkasibi masandelin.
[4] Hangkan hep kami sinna magbantu si meꞌ pagtipunan meꞌ aꞌa masandel pu si Isa Almasihin sababbi, peggeꞌ bisan kaꞌam dem kabinasahan duk dem katiksaꞌan, gaꞌi teꞌed usaꞌ sandelbi si Tuhanin saguwaꞌ matuyuꞌ kaꞌam magsandal.
[5] Kēmon inin tandaꞌ weꞌ bentel hukuman Tuhanin. Kuweꞌitu magsandal kaꞌam supaya kataꞌuhan weꞌ pataꞌ kaꞌam sinakup dem pagbayaꞌan Tuhanin.
[6] Bentel teꞌed Tuhanin, tiksaꞌne du iyan meꞌ maniksaꞌ kaꞌamin
[7] duk kaꞌam, meꞌ magsusehin, ānan Tuhanin du kēmon meꞌ kasusehanbin, duk sampay meꞌ kasusehan kamihin du isab. Hinang Tuhanin inin bang balik ne pitu amban surgaꞌ Panuhutanten bi si Isa. Kitete bi iye iyan magtuhut duk meꞌ malaꞌikatne mabalakatanin.
[8] Pitu iye liput weꞌ kayat ebbut duk leggane iyan meꞌ manayikutan Tuhanin, meꞌ manggaꞌi manuhut aka-aka mahāp sabab Panuhutanten bi si Isa.
[9] Legga Tuhanin siye si narkaꞌ gaꞌ niyaꞌ tamananne. Pinasapeꞌ siye amban Panuhutanin duk gaꞌi teꞌed kitede sahayanen, iye tandaꞌ balakatnen.
[10] Waktu miyaꞌan, ellew pabalik si Isa Almasihin, pinudji iye duk pinahadje weꞌ meꞌ aꞌa sukuꞌ si iyehin hātinen meꞌ masandel si iyehin. Sampay kaꞌam sakup du isab si meꞌ mamudji iyehin peggeꞌ kinahagad weꞌ bi inusihat kami si kaꞌam sabab Almasihin.
[11] Hangkan hep kami māku-māku ne paꞌin si Tuhan para si kaꞌam, weꞌ karayaw tinabangan kaꞌam supaya meꞌ hinanganbin patut si meꞌ aꞌa tapeneꞌ weꞌ Tuhanin. Māku-māku isab kami weꞌ sabab balakat Tuhanin tabanganne kaꞌam supaya tahinangbi kēmon mahāp kabayaꞌanbi hininangin peggeꞌ sandel ne kaꞌam.
[12] Hangkan kami māku-māku sa inin supaya pinahadje du si Isa Panuhutanten bi sababbi. Duk pinahadje du isab kaꞌam peggeꞌ sukuꞌ pu si Isa kaꞌam. Tuman du inin peggeꞌ malasa duk maꞌaseꞌ Tuhanin duk Isa Almasi Panuhutanten bi si kaꞌam.