[1] Na, meꞌ kapungtinaꞌihanku, gaꞌi ne subey sulat kami bang sumiyan inin umantag.
[2] Peggeꞌ kataꞌuhanbi ne du weꞌ bessuwang hadja iyan tekka ellew papitu Almasihin kuweꞌ papitu aꞌa panangkewin bessuwang hadja tekka sangem.
[3] Bang meꞌ aꞌahin magpaꞌin, “Na, sanyang ne. Gaꞌ ne niyaꞌ kasiya-siyahan,” bessuwang hadja iyan tekka balaꞌin duk magmula siye. Keddut patekka balaꞌin kuweꞌ dende bessuwang peddiꞌan bang sōng nganak bu gaꞌi iyan lumahi meꞌ aꞌahin.
[4] Saguwaꞌ kaꞌam, meꞌ kapungtinaꞌihanku, dumaꞌin kaꞌam dem lindem, hātinen gaꞌi kaꞌam awam sabab inin. Hangkan gaꞌi kaꞌam subey takeddut bang bessuwang tekka ellew miyaꞌan kuweꞌ katekka aꞌa panangkewin.
[5] Peggeꞌ kaꞌam kēmon, patennaꞌanbin dem dantaꞌ, baytu ellew, hātinen sukuꞌ si Tuhan kaꞌam. Dumaꞌin kite bi meꞌ aꞌa patennaꞌ dem lindem, baytu sangem.
[6] Hangkan daꞌa kite bi kuweꞌ meꞌ aꞌa matuli miyaꞌan. Saguwaꞌ subey kite bi magjaga duk subey hāp pamikilten bi.
[7] Sangem hep patuli meꞌ aꞌahin duk sangem isab luwal kalango meꞌ aꞌa maginumanin.
[8] Saguwaꞌ kite bi, peggeꞌ meꞌ aꞌa patennaꞌ dem dantaꞌ kite bi, subey hāp pamikilten bi, dumaꞌin kuweꞌ pamikil aꞌa malangohin. Kite bi meꞌ masandelin kuweꞌ dalil sundalu, niyaꞌ pangelligne barannen duk kōknen. Bang kite bi, iye pangellig kitehin bi sandelte bi si Tuhanin duk lasaten bi duk pangase-ngaseten bi weꞌ tinimbul du kite bi.
[9] Dumaꞌin hangkan kite bi peneꞌ Tuhanin supaya kite bi tapapeddiꞌanne saguwaꞌ supaya kite bi tatimbulne sabab Panuhutanten bi Isa Almasi.
[10] Matey hep iye para si kite bi supaya kite bi patennaꞌ laꞌi si iye bang matey ne kite bi atawa bang ellum pe kite bi si waktu pabaliknen.
[11] Hangkan magasig-inasig kaꞌam duk magtabang-tinabang kaꞌam sa hinanganbin du.
[12] Na, meꞌ kapungtinaꞌihanku masandel pu si Isa Almasihin, niyaꞌ pe pāku kami si kaꞌam: pagaddatanun bi meꞌ nakuraꞌbi si langgalin. Maghinang siye diyalemanbi peggeꞌ pineneꞌ siye weꞌ Panuhutanten bi noloꞌan kaꞌam.
[13] Pagmātabatanun bi duk kalasahanun bi teꞌed siye sabab hinangde si kaꞌamin. Duk subey kaꞌam kēmon magsulut-sulut.
[14] Sessaꞌan kami isab kaꞌam, meꞌ kapungtinaꞌihanku, toloꞌanun bi meꞌ mabulasanin dinaꞌak maghinang. Paꞌasigun bi meꞌ masasew dem ateyden. Tabangun bi meꞌ mamura taboꞌo weꞌ sassatin. Duk magpasensiya kaꞌam si kēmon aꞌa.
[15] Papateng kaꞌam supaya kaꞌam gaꞌi males bang niyaꞌ maghinangan laꞌat si kaꞌam. Saguwaꞌ apasun bi luwal maghinangan hāp si meꞌ pagkasibi masandel pu si Isa Almasihin duk si meꞌ aꞌa seddilihin isab.
[16] Subey kaꞌam luwal magkēg.
[17] Subey kaꞌam luwal ngampun-ngampun si Tuhan.
[18] Ine-ine tekka si kaꞌam, subey kaꞌam magsukul si Tuhan peggeꞌ inin kabayaꞌan Tuhan subey hininangbin, peggeꞌ magdambuwaꞌ ne kaꞌam duk Isa Almasi.
[19] Daꞌa saggaꞌun bi ine-ine bissā Niyawa Tuhanin si kaꞌam.
[20] Daꞌa diyawaꞌanun bi meꞌ bissā pinabissā weꞌ Tuhanin.
[21] Saguwaꞌ paliksaꞌun bi dahuꞌ meꞌ takalebin duk sasuku mahāpin tayimaꞌun bi.
[22] Halliꞌanun bi kēmon bayuꞌ-bayuꞌan hinangan laꞌat.
[23] Tuhanin mangurungan kite bi kasanyanganin, karayaw pasutsine kaꞌam. Karayaw ipatne niyawabin duk pikilanbin sampay baranbin supaya gaꞌ niyaꞌ sallaꞌ-sallaꞌbi pagbalik Panuhutanten bi Isa Almasi pitu.
[24] Asal hinang Tuhanin du inin peggeꞌ iye mameneꞌ kaꞌamin, duk kapangandelan teꞌed iye.
[25] Meꞌ kapungtinaꞌihanku, māku-māku ne paꞌin kaꞌam si Tuhan para si kami.
[26] Salamun bi aku kēmon meꞌ kapungtinaꞌihante bi maluꞌuhin.
[27] Daꞌakte kaꞌam amban kapatut pangurung Panuhutanin, weꞌ subey batsabi sulat inin si kēmon pagkasibi masandel pu si Isa Almasihin.
[28] Karayaw weꞌ luwal kaꞌam ipat Panuhutanten bi Isa Almasi. Wassalam