[1] Na, peggeꞌ gaꞌi ne tasandal kami magsusehin, hangkan magsakap kami weꞌ duwangan kami paꞌamban tuꞌu si Aten.
[2] Duk pinapiyu weꞌ kami Timoteo si kaꞌam. Pungtinaꞌite bi iye duk saweꞌku iye maghinang si Tuhan magmahalayak aka-aka hāp sabab Almasihin. Papiyu kami iye supaya paꞌasigne ateybin duk supaya ngabasag sandelbi si Tuhanin.
[3] Gaꞌi kami mabayaꞌ weꞌ sabab meꞌ kasigpitanbin niyaꞌ kaꞌam nayikutan meꞌ toloꞌ mabennalin. Kataꞌuhanbi ne du andang weꞌ sukuꞌte bi kēmon palabey si kasigpitan.
[4] Peggeꞌ paluꞌu kami si kaꞌamin, bakas kaꞌam akahan kami andang weꞌ niyaꞌ tekka si kite bi kasigpitan. Duk kataꞌuhanbi du weꞌ iyuꞌ ne tekka.
[5] Suse ku teꞌed bang saꞌingge du kaꞌam luꞌu, hangkan hep peggeꞌ gaꞌi ne tasandalku, daꞌakku piyu Timoteo mastiꞌan kaꞌam bang basag pe du ke sandelbi pu si Isa Almasihin. Talew ku kaw kaꞌam tasassat weꞌ seyitanin. Peggeꞌ bang saꞌupama taboꞌo kaꞌam weꞌ sassat seyitanin, na, gaꞌ ne niyaꞌ kagunahan meꞌ hinang kami si kaꞌamin.
[6] Saguwaꞌ tiyaꞌ ne tekka balik si Timoteo duk sinna teꞌed kami peggeꞌ hāp teꞌed bissāne sabab kaꞌamin. Paꞌinne weꞌ basag sandelbi si Tuhanin duk asal maglasa-ilasa teꞌed kaꞌam. Paꞌin Timoteo isab weꞌ luwal kami inesseb weꞌ bi duk batang teꞌed kami kitebi kuweꞌ kamihin batang isab magkite duk kaꞌam.
[7] Hangkan hep, meꞌ kapungtinaꞌihanku, bisan kami dem kasigpitan duk kabinasahan, asig atey kamihin peggeꞌ kataꞌuhan kami weꞌ gaꞌ du usaꞌ sandelbi pu si Isa Almasihin.
[8] Hāp ne atey kamihin peggeꞌ kataꞌuhan kami weꞌ teteg kaꞌam pu si Isa Panuhutanten bi.
[9] Hadje pagsukul kami si Tuhanin sababbi, peggeꞌ kēgan atey kamihin sabab sandelbin.
[10] Ellew-sangem māku-māku kami si Tuhan karayaw magkite du kite bi magtampak supaya kaꞌam tatabangan kami duk dambūs-būs ne sandelbin.
[11] Karayaw kami tabangan Samate bi Tuhanin duk Panuhutanten bi Isa Almasi supaya kami tapiyu si kaꞌam.
[12] Duk karayaw magkasōng kaꞌam maglasa-ilasa, duk malasa isab kaꞌam si kēmon aꞌa, kuweꞌ du pangalasa kami si kaꞌamin.
[13] Karayaw patetegne ateybin supaya kaꞌam sutsi duk gaꞌ niyaꞌ sallaꞌ-sallaꞌbi si harapan Samate bi Tuhanin bang pitu ne balik Panuhutanten bi si Isa magtuhut duk meꞌ aꞌa sukuꞌ si iyehin.