[1] Sulat inin amban aku, si Paul, duk meꞌ saweꞌkun si Silas duk Timoteo. Pasampay kami inin piyu si puweblo Tessalonika si kaꞌam kēmon meꞌ sukuꞌ si Samate bi Tuhanin duk si Panuhutanten bi Isa Almasi. Karayaw weꞌ luwal kaꞌam ipat Tuhanin duk karayaw luwal sanyang dem ateybin.
[2] Luwal kami magsukul si Tuhan sabab kaꞌam kēmon duk luwal kaꞌam subahat kami kahabaꞌ kami ngampun-ngampun si Tuhan.
[3] Sābu kami ngampun-ngampun si Samate bi Tuhanin, luwal teꞌed taꞌesseb kami meꞌ kahāpan luwal hininangbin sabab sandelbi pu si Isa Almasi, Panuhutanten bi. Gaꞌi isab takayipat kami pagluꞌugbin hawal lasabi si iyehin duk pagtuyuꞌbin peggeꞌ ase-asebi teꞌed weꞌ pitu balik Panuhutanten bi.
[4] Meꞌ kapungtinaꞌihanku, kinalasahan kaꞌam weꞌ Tuhanin duk kataꞌuhan kami weꞌ tapeneꞌne kaꞌam,
[5] peggeꞌ aka-aka hāp inusihat kami si kaꞌamin dumaꞌin bissā manusiyaꞌ hadja saguwaꞌ amban balakat Niyawa Tuhanin, duk kataꞌuhan kami weꞌ asal bennal teꞌed bissā kamihin. Takite isab kawul-piꞌil kamihin paluꞌu kami si kaꞌamin. Kēmon hinangan kamihin para si kahāpanbi.
[6] Binatukan weꞌ bi kawul-piꞌil kamihin duk kawul-piꞌil Panuhutanten bi. Bisan du kaꞌam bininasa peggeꞌ tuhutbi lapal Tuhanin, saguwaꞌ kēgan pe teꞌed kaꞌam peggeꞌ pinakēg kaꞌam weꞌ Niyawa Tuhanin.
[7] Duk kuweꞌitu binatukan isab kaꞌam weꞌ meꞌ masandel pu si Isa si lahat Makedoniya duk Akayahin.
[8] Duk aka-aka hāp bakas inakabi sabab Panuhutanin bawag si lahat Makedoniya duk Akaya. Duk dumaꞌin hadja inin saguwaꞌ aka-aka sabab sandelbi si Tuhanin takale isab si kēmon kalahatan. Gaꞌi ne kami subey magaka sabab sandelbin.
[9] Siye ne mangakahin. Magaka siye bang saꞌingge panayimaꞌbi kamihin papiyu kami si kaꞌamin. Magaka isab siye weꞌ tinayikutan ne weꞌ bi meꞌ tuhan-tuhanbin, duk kuweꞌitu iye ne tinuhutbin Tuhan maꞌellum duk mabennalin.
[10] Magaka isab siye weꞌ luwal inagad-agad weꞌ bi katekka Anak Tuhan amban surgaꞌin, si Isa bakas pinakellum Tuhan amban kamateynen. Duk si Isa inin, iye manimbul kitehin bi amban mulkaꞌ Tuhan sōng pinatekka si meꞌ aꞌahin.