[1] Meꞌ kapungtinaꞌihanku masandel pu si Isa Almasihin, kataꞌuhanbi weꞌ papiyu kami manindew kaꞌamin niyaꞌ kagunahanne.
[2] Kataꞌuhanbi hep weꞌ gaꞌ pe kami tapiyu luꞌu si Tessalonika, makalabey dahuꞌ kami kabinasahan si puweblo Pilipi duk pinaꞌiyaꞌ kami laꞌi. Saguwaꞌ tinabang kami weꞌ Tuhanin supaya kami makaꞌaraꞌ-araꞌ ngakahan kaꞌam isab aka-aka mahāp amban Tuhanin bisan pe ekka naggaꞌ kami.
[3] Kēmon inaka kami si kaꞌamin toꞌo. Dumaꞌin laꞌat pikilan kamihin hangkan kami magusihat. Gaꞌi kami ngakkal.
[4] Iye inaka kamihin, meꞌ pangandaꞌakan Tuhan kamihin. Peggeꞌ tapeneꞌ kami weꞌ ne duk pinangandel weꞌ ne si kami dinaꞌak pinalataꞌ aka-aka mahāp inin. Hangkan minahalayak inin weꞌ kami panulut Tuhanin dumaꞌin panulut manusiyaꞌ. Kataꞌuhan Tuhanin bang ine dem atey kamihin.
[5] Kataꞌuhanbi du weꞌ bentel pamissā kami si kaꞌamin; gaꞌ kami bakas missā nanglitan kaꞌam supaya kami urunganbi pilak atawa ine-ine. Tuhanin saksiꞌ kamihin.
[6] Gaꞌ bakas angut kami weꞌ pahadje aꞌa kami, kaꞌam ke atawa aꞌa seddili,
[7] bisan ne kami meꞌ aꞌa pataꞌ pinahadje peggeꞌ kapatut kamihin amban Almasi. Saguwaꞌ hāp pangahatul kami kaꞌamin, kuweꞌ kami dende ngahatul meꞌ anakne.
[8] Hawal lasa kami si kaꞌamin, sinna kami dumaꞌin hadja ngakahan kaꞌam aka-aka mahāp amban Tuhanin, saguwaꞌ bisan umul kamihin paglillaꞌ kami para si kaꞌam. Kinalasahan teꞌed kaꞌam weꞌ kami.
[9] Bugtuꞌ taꞌessebbi, meꞌ kapungtinaꞌihanku, bang saꞌingge paghinang kami paluꞌu kami si kaꞌamin. Maglubag kami ellew-sangem duk niyaꞌ kaꞌelluman kami, supaya kaꞌam gaꞌi kabohatan tiggelan kami luꞌu si kaꞌam magmahalayak aka-aka mahāp amban Tuhanin.
[10] Kasaksiꞌanbi duk kasaksiꞌan Tuhanin isab bang saꞌingge addat kami si kaꞌam meꞌ masandel pu si Isa Almasihin. Kēmon hinangan kamihin hāp duk bentel diyalemanbi duk gaꞌ teꞌed niyaꞌ nallaꞌ kami.
[11] Kataꞌuhanbi weꞌ addat kami si kaꞌamin dangan-dangan kuweꞌ addat sama si meꞌ anaknen.
[12] Pinaꞌasig weꞌ kami ateybin duk tinoloꞌan kaꞌam weꞌ kami dinaꞌak pinahāp hadja kawul-piꞌilbin supaya kasulutan Tuhanin. Peggeꞌ tapeneꞌ kaꞌam weꞌ ne supaya kaꞌam sumakup laꞌi dem pagbayaꞌanne duk dem sahayane.
[13] Duk luwal isab kami magsukul si Tuhan peggeꞌ sakaliꞌ takalebi lapal Tuhan binoꞌo kamihin, kinahagad duk tinayimaꞌ weꞌ bi peggeꞌ takilalebi weꞌ lapal Tuhanin miyaꞌan, dumaꞌin bissā manusiyaꞌ. Duk asal bennal miyaꞌan lapal Tuhanin. Duk kaꞌam meꞌ makahagadin, pinindahan weꞌ Tuhanin pamikilbin duk kawul-piꞌilbin.
[14] Kaꞌam, meꞌ kapungtinaꞌihanku, saliꞌ ne kaꞌam duk meꞌ aꞌa masandel pu si Isa Almasi malaꞌi si Yahudiyahin. Bakas sinigpitan isab kaꞌam weꞌ meꞌ pagkasibi da bangsahin kuweꞌ siyehin sinigpitan weꞌ meꞌ pagkaside Yahudihin.
[15] Meꞌ Yahudihin hep mamapatey si Isa Panuhutanten bi. Duk siye isab mamapatey meꞌ kanabihan awwalley. Siye isab mangandaꞌak kami tahalaꞌin. Asal gaꞌi teꞌed Tuhanin kasulutan si siye. Binantahan weꞌ de kēmon manusiyaꞌin,
[16] peggeꞌ sinaggaꞌ kami weꞌ de duk kami gaꞌi makapagmahalayak aka-aka mahāpin pī si meꞌ kabangsahan dumaꞌin Yahudihin. Gaꞌi siye mabayaꞌ weꞌ meꞌ kabangsahan seddilihin tinimbul amban duseden. Meꞌ Yahudi inin luwal magkasōng duseden duk pinatekka ne si siye mulkaꞌ Tuhanin.
[17] Meꞌ kapungtinaꞌihanku, bisan pe gaꞌ tiggel kemuwe magsapeꞌ kite bi, ngesseb ne teꞌed kami si kaꞌam. Batang teꞌed kami magkite balik duk kaꞌam. Bennal, tala kami amban kaꞌam saguwaꞌ pikilan kamihin luwal luꞌu si kaꞌam.
[18] Mabayaꞌ kami piyu si kaꞌam, pasōng ne aku, si Paul. Mimpiye ku magmemes sōng piyu saguwaꞌ inalal kami weꞌ nakuraꞌ seyitanin.
[19] Na, kaꞌam hep jānnen hangkan kami kēgan duk hangkan niyaꞌ ase-ase kami. Kaꞌam hep isab jānnen, dumaꞌin hadja meꞌ sinduwehin. Duk kaꞌam jānnen hangkan kami makapagbantu laꞌi si harapan Panuhutanten bi si Isa bang pitu ne iye balik.
[20] Aweꞌ, kaꞌam jānnen hangkan kami pinahadje duk magkēg.