[1] Manjari, meꞌ kapungtinaꞌihanku, bakas katoloꞌan kami ne kaꞌam bang saꞌingge subey kawul-piꞌilbin supaya kasulutan Tuhanin si kaꞌam. Duk inin tatuhutbi ne. Kuweꞌitu pāku kami pe si kaꞌam duk daꞌak kami kaꞌam amban kapatut pangurung Panuhutanten bi si Isa, weꞌ subey pe pasōngbi kawul-piꞌilbi mahāp inin.
[2] Kataꞌuhanbi du panoloꞌ kami kaꞌamin amban kapatut Panuhutanten bi si Isa.
[3] Kabayaꞌan Tuhanin weꞌ sutsi kaꞌam. Daꞌa teꞌed kaꞌam magjina. Subey kaꞌam gaꞌi ngūtan napsu baranbin; hinangun bi hadja masutsi si matahan Tuhanin duk addat mahāpin.
[4] Kaꞌam, meꞌ lellahin, subey addatbi si andabin patut si matahan Tuhan duk si matahan meꞌ aꞌahin.
[5] Daꞌa duhulanun bi napsu baranbin kuweꞌ meꞌ aꞌa manggaꞌi mangataꞌuhan Tuhanin.
[6] Duk pasal da bayuꞌ inin, daꞌa teꞌed kaꞌam magduse si pagkasibi atawa ngakkalan siye, peggeꞌ asal legga Tuhanin teꞌed sasuku kapagduse sa miyaꞌanin. Bakas sessaꞌan kami ne kaꞌam matuꞌuhin sabab inin.
[7] Peggeꞌ dumaꞌin hangkan kite bi peneꞌ Tuhanin supaya kite bi magkahinangan laꞌat, saguwaꞌ kabayaꞌannen weꞌ sutsi kite bi.
[8] Hangkan manayikutan toloꞌ inin, dumaꞌin manusiyaꞌ tinayikutannen, saguwaꞌ iye tinayikutannen, Tuhan mangurungan kaꞌam Niyawa Sutsihin.
[9] Na, gaꞌi ne kaꞌam subey sulatan kami pasal lasabi si meꞌ pagkasibi masandel pu si Isa Almasihin, peggeꞌ katoloꞌan ne du kaꞌam weꞌ Tuhanin maglasa-ilasa.
[10] Duk asal kalasahanbi kēmon masandel pu si Isa si tibuꞌukan Makedoniyahin. Saguwaꞌ pāku kami si kaꞌam, meꞌ kapungtinaꞌihanku, weꞌ pasōngbi pe lasabi si siyehin.
[11] Apasun bi makasanyang kaꞌamin. Daꞌa kulebeꞌanun bi hinang saweꞌbin, saguwaꞌ papages kaꞌam maghinang duk niyaꞌ kaꞌellumanbi sa panessaꞌ kami kaꞌam matuꞌuhin.
[12] Manjari bang kaꞌam nuhut panoloꞌ inin pinagaddatan du kaꞌam bisan weꞌ meꞌ aꞌa manggaꞌi masandel pu si Isa Almasihin duk gaꞌi isab kaꞌam kasukalan.
[13] Na, meꞌ kapungtinaꞌihanku, batang isab kaꞌam pahātihan kami sabab meꞌ masandel pu si Isa Almasi mamateyin ne, supaya kaꞌam gaꞌi magsugul kuweꞌ meꞌ aꞌa sinduwehin gaꞌ niyaꞌ ase-asede weꞌ ellum siye balik.
[14] Kahagad kite bi weꞌ si Isa bakas matey duk ellum iye balik amban kamateynen. Hangkan kahagad isab kite bi weꞌ bang matey ne aꞌa masandel pu si Isahin, pinakellum du siye weꞌ Tuhanin duk patuhutne siye pu si Isa bang tekka ne waktu pabaliknen.
[15] Inin ne panoloꞌ Panuhutanten bi si Isa: kite bi, meꞌ maꞌellumin pe waktu pabalikne mapituhin, gaꞌi du kite bi padehellu amban meꞌ pateyin nampang iye.
[16] Peggeꞌ niyaꞌ dahuꞌ iyan ngalingan papales amban surgaꞌ duk takale iyan suwala nakuraꞌ malaꞌikatin ngellang. Ubus bu niyaꞌ iyan helling kuweꞌ hellingan tabuliꞌ amban Tuhan. Manjari duwaꞌi ne Panuhutanin amban surgaꞌ. Ubus miyaꞌan pinakellum ne dehellu meꞌ mamatey masandel pu Almasihin.
[17] Ubus kite bi isab maꞌellumin, binoꞌo kite bi magtuhut duk siye paꞌangkat pī diyataꞌ inalak nampang Panuhutanin diyataꞌ mahawan. Manjari patennaꞌ kite bi si Panuhutanin gaꞌ niyaꞌ tamananne.
[18] Hangkan akahun bi meꞌ bissā inin dangan pī si dangan supaya asig dem ateybin.