[1] Sulat inin amban aku, si Paul. Kawakilan ku weꞌ Isa Almasi amban kabayaꞌan Tuhanin dinaꞌak magmahalayak si meꞌ aꞌa sabab umul gaꞌ niyaꞌ tamananne bakas pananggup Tuhan si kēmon sasuku masandel pu si Isa Almasihin.
[2] Pasampayku sulat inin piyu si kaꞌu, Timoteo. Kuweꞌ ne kew anakku kinalasahan teꞌed. Karayaw kew luwal ipat Samate Tuhanin duk Isa Almasi Panuhutanten. Karayaw kew isab kaꞌaseꞌande duk pasanyangde dem ateynun.
[3] Magsukul ku si Tuhan iye paghinangankun, duk maghinang ku si iye dambūs-būs pikilankun kuweꞌ du isab paghinang meꞌ kapapuꞌanku si iyehin masaley. Magsukul ku si Tuhan sabab kaꞌu peggeꞌ luwal kew taꞌessebku kahabaꞌ ku ngampun-ngampun si Tuhan ellew-sangem.
[4] Taꞌessebku weꞌ nangis kew patahalaꞌkun duk kabayaꞌankun weꞌ magkite kite balik supaya ku kēgan teꞌed.
[5] Taꞌessebku isab weꞌ sandelnu pu si Isa Almasihin asal amban dem ateynu teꞌed kuweꞌ du isab sandel papuꞌnu dendehin, si Loyda, duk sandel saꞌinun, si Yunis. Kabugtuꞌanku weꞌ kuweꞌ miyaꞌan du isab sandelnun.
[6] Iye inin sababnen hangkan kew paꞌessebanku kuweꞌitu weꞌ subey teꞌed gunanu kapandeyan pinangurung Tuhan si kaꞌuhin masa pamettadku meꞌ tangankun diyataꞌ kōknu ngampun-ngampunan kaꞌu.
[7] Peggeꞌ dumaꞌin hangkan pangurung Tuhanin Niyawanen si kite supaya mura tinalew ateyten saguwaꞌ supaya niyaꞌ basagte nuhut kinabayaꞌan Tuhanin duk supaya kite malasa si pagkasiten duk gaꞌi kite katimboꞌohan maghinangan laꞌat.
[8] Daꞌa kew iyaꞌ magbennal si aꞌa weꞌ Isa Almasi Panuhutannun. Duk daꞌa kew isab iyaꞌ sabab aku peggeꞌ tiyaꞌ ku dem kalabusu sabab panuhutku Isa Almasihin. Saguwaꞌ maglillaꞌ kew hadja bisan kew bininasa sabab pangaka-ngakanu aka-aka mahāp sabab Isa Almasi si meꞌ aꞌahin. Urungan Tuhanin du kew iyan basag nandalanne.
[9] Tinimbul ne kite weꞌ ne duk tapeneꞌ weꞌ ne hinangne meꞌ aꞌane, dumaꞌin peggeꞌ niyaꞌ hāp bakas tahinangte duk inin panumbasne kitehin. Saguwaꞌ hangkan inin hinangne si kite peggeꞌ kalasahanne duk kaꞌaseꞌanne kite, duk peggeꞌ andang sakapne masa gaꞌ pe pinapanjari dunyahin weꞌ pakitehanne lasanen duk aseꞌnen si kite sabab tahinang Isa Almasihin.
[10] Kuweꞌitu pinakitaꞌu ne si kite lasa duk aseꞌ Tuhanin peggeꞌ bakas pitu ne Isa Almasi manimbul kitehin bi. Tadaꞌag weꞌ ne kapatut kamateyin. Duk bang kahagadte aka-aka mahāp sabab Isa Almasihin niyaꞌ umulte gaꞌ tamanan si surgaꞌ.
[11] Kawakilan ku weꞌ Tuhanin dinaꞌak magmahalayak duk magusihat aka-aka mahāpin.
[12] Duk inin jānnen hangkan ku magsandal tuꞌu dem kalabusu. Saguwaꞌ gaꞌi ku iyaꞌ peggeꞌ kataꞌuhanku du bang sine pangandelankun. Duk kabugtuꞌanku weꞌ takoleꞌne du manteyan kēmon pinangandelne si akuhin sampay taꞌabut ellew pabalikne si dunyahin.
[13] Tentemanun teꞌed meꞌ toloꞌ mabennal panoloꞌku kaꞌuhin duk tuhutun. Duk patetegun sandelnun pu si Isa Almasi duk kalasahanun pagkasinun peggeꞌ magdambuwaꞌ ne kite bi duk Isa Almasi.
[14] Tentemanun teꞌed dem ateynu toloꞌ mabennal bakas pinangandel Tuhan si kaꞌuhin. Tinabangan du kew iyan weꞌ Niyawa Tuhan mapatennaꞌ dem ateyten bi.
[15] Kataꞌuhannu, Timoteo, kēmon masandel pu si Isa si lahat Asiyahin, tinayikutan ne ku weꞌ de sampay disi Pigelus duk Hermogen.
[16] Saguwaꞌ bang disi Onesiporos magtewtey-anakin karayaw kaꞌaseꞌan Tuhanin du siye kēmon peggeꞌ daran paꞌasig Onesiporos ateykun. Gaꞌ iye iyaꞌ nindew aku bisan ku tuꞌu dem kalabusu.
[17] Saguwaꞌ pagtekka iye tuꞌu si Roma magtawus ku pihane duk gaꞌ iye padeheng samantaꞌan gaꞌ ku kasuwaꞌne.
[18] Karayaw du iye kaꞌaseꞌan Panuhutanten si Isa laꞌi si ellew pabalik Isa Almasi pitu ngahukum manusiyaꞌin. Kataꞌuhannu du isab bang saꞌingge panabangne akuhin palaꞌiku si lahat Epesusin.