[1] Essebun teꞌed inin, Timoteo. Bang sōng taꞌabut ne gantaꞌan dunya inin, ekka kasusehan tuꞌu si dunya.
[2] Peggeꞌ meꞌ aꞌahin si meꞌ ellew īꞌ iye hadja inapasden kahāpan diden, gaꞌi ne tapikilde saweꞌden. Napsuhan siye si sīn. Abbuhan siye duk langkew pagateyden. Bissā-bissāhande saweꞌden. Gaꞌi siye nuhut toloꞌ matettoꞌade. Gaꞌi siye magsukul bang niyaꞌ nabangan siye duk gaꞌi siye talew si Tuhan.
[3] Gaꞌi siye maꞌaseꞌ si saweꞌde. Gaꞌi siye ngatu ngampun saweꞌde. Luwal siye ngalimut-ngalimutan saweꞌde. Paduhul siye ngūtan kēmon kinabayaꞌanden. Bingis siye manamal. Kēmon mahāpin kabunsihande du.
[4] Gaꞌi siye kapangandelan peggeꞌ buddihande saweꞌden. Bahani siye manamal. Lumanduꞌ pamahadjede diden. Bayaꞌ siye luwal magadjak-adjak saguwaꞌ gaꞌi siye bayaꞌ nuhut Tuhanin.
[5] Toꞌo magāgama siye, saguwaꞌ gaꞌ du niyaꞌ gunane peggeꞌ gaꞌi du siye mabayaꞌ pinda ateyden. Halliꞌanun meꞌ aꞌa kuweꞌ iyan.
[6] Niyaꞌ meꞌ lella kuweꞌ iyan paꞌasek pī dem lumaꞌ aꞌa duk akkalande meꞌ dende mamura katimboꞌohanin. Mura siye hinumatan peggeꞌ sasew pikilanden sabab dusede maꞌekkahin duk mura siye taboꞌo weꞌ napsuden.
[7] Pakale ne hadja siye pu sine-sine magtoloꞌ si siyehin saguwaꞌ gaꞌi tapaꞌilde toloꞌ mabennalin.
[8] Meꞌ aꞌa mangakkal miyaꞌan kinuntarahan weꞌ de toloꞌ mabennalin. Gaꞌi ne tewwaꞌ pamikilden duk gaꞌi ne siye nuhut toloꞌ mabennalin. Binatukan weꞌ de hinangan disi Jannes duk Jambes, meꞌ aꞌa managgaꞌ si Musa awwalley.
[9] Saguwaꞌ gaꞌ du niyaꞌ kasōngan pagtoloꞌ meꞌ aꞌa miyaꞌan. Gaꞌi tiggel kataꞌuhan du iyan weꞌ meꞌ aꞌahin kēmon meꞌ kadupanganden sa talabey disi Jannes duk Jambes masaley.
[10] Saguwaꞌ kaꞌu Timoteo, kataꞌuhannu du bang ine meꞌ panoloꞌkun duk bang saꞌingge kawul-piꞌilkun duk bang ine inapaskun. Kataꞌuhannu isab weꞌ asal sandel ku pu si Isa duk asal magpasensiya ku duk malasa ku si pagkasiku duk magsandal ku.
[11] Kataꞌuhannu meꞌ kabinasahan duk meꞌ kasusehan matekka si akuhin. Kataꞌuhannu meꞌ maꞌumantag laꞌi si puweblo Antiyokin duk laꞌi si Ikoni duk laꞌi si Listara. Aweꞌ, kataꞌuhannu kēmon kabinasahan sinandalankun. Saguwaꞌ pinaluwas du ku weꞌ Panuhutanten amban kēmon meꞌ kasigpitankun.
[12] Bennal weꞌ kēmon sasuku mabayaꞌ manuhut kinabayaꞌan Tuhanin, sabab sandelde pu si Isa Almasihin, katekkahan du siye kasigpitan.
[13] Duk meꞌ aꞌa malaꞌatanin duk meꞌ mamadupangin, pasōng du meꞌ hinangande malaꞌatin. Madupang siye saweꞌde saguwaꞌ tapadupang du isab siye.
[14] Saguwaꞌ kaꞌu, Timoteo, tuhutun paꞌin kēmon toloꞌ mabennal bakas panoloꞌ si kaꞌuhin duk asal kinahagad teꞌed weꞌ nu. Kataꞌuhannu du bang sine bakas manoloꞌan kaꞌuhin,
[15] duk kataꞌuhannu weꞌ kemuwe dikiꞌ kew sampay hadje ne kew asal ne kew katoloꞌan meꞌ tasulat dem kitabin. Sabab kitab miyaꞌan puꞌunnu makapikil nayimaꞌ umul gaꞌ niyaꞌ tamananne pangurung Tuhanin sakaliꞌ kew sandel pu si Isa Almasi.
[16] Kēmon tasulat dem kitabin pinasulat weꞌ Tuhanin duk niyaꞌ kagunahanne bang magtoloꞌ kite toloꞌ mabennalin duk bang toloꞌante meꞌ bakas kapagdusehin, duk bang pamabentelte meꞌ aꞌa maniyaꞌ hinangande gaꞌi tumuꞌunin, duk pamanoloꞌte meꞌ addat mahāpin,
[17] supaya aꞌa sukuꞌ si Tuhanin jukup kapandeyannen duk panyap iye maghinang sasuku hinangan mahāpin.