[1] Manjari, Timoteo, niyaꞌ pe teꞌed panessaꞌku kaꞌu kuweꞌitu, peggeꞌ Isa Almasi asal balik du pitu si dunya magbayaꞌ. Panessaꞌku si kaꞌu inin si panaꞌanan Tuhanin duk Isa Almasi, iye mangahukum kēmon manusiyaꞌin, maꞌellumin duk meꞌ mamateyin.
[2] Sessaꞌante kew, amey-amey mahalayakun lapal Tuhanin si meꞌ aꞌa. Bisan waktu ine, bayaꞌ ke siye pakale atawa gaꞌi, masi kew subey magusihat si siye. Humatanun siye nuhut si Isa. Bang niyaꞌ salaꞌde, toloꞌanun siye. Bang niyaꞌ lamma sandelne si Tuhanin, paꞌasigun ateynen. Papastiꞌun pagusihatnun duk siye kahagad duk daꞌa kew jumuꞌ magusihat.
[3] Hangkan inin panessaꞌku si kaꞌuhin peggeꞌ niyaꞌ iyan ellew si pasōngan, meꞌ aꞌahin gaꞌi ne iyan mabayaꞌ pakale si toloꞌ mabennalin saguwaꞌ supaya tatuhutde kinabayaꞌanden, ngeddoꞌ siye iyan meꞌ guru ekka, sasuku meꞌ guru manoloꞌan siye meꞌ toloꞌ kabayaꞌande pinakalehin.
[4] Gaꞌi iyan pakalede bang toloꞌ mabennalin panoloꞌ si siyehin. Iye inasipden meꞌ kissa hinang-hinang aꞌa hadja.
[5] Saguwaꞌ kaꞌu, Timoteo, subey teteg pikilannun bisan ine maꞌumantagin. Sandalanun ine-ine kasigpitan tekka si kaꞌu. Pagtuyuꞌanun magmahalayak aka-aka mahāp sabab Isa Almasihin. Tuhutun teꞌed kēmon hinang pangandaꞌakan Tuhan kaꞌuhin.
[6] Bang aku inin, gaꞌi tiggel pinapatey du ku. Tapit ne sōng pamoleꞌku hap ahilatin.
[7] Aku inin dalil aꞌa matuk maglakkesan magubas duk umabut du si batasannen. Bakas maggeꞌes ku manamal ngahinang kēmon pinasukuꞌ Tuhan si akuhin. Gaꞌ teꞌed usaꞌ sandelku si iyehin.
[8] Kuweꞌitu niyaꞌ laꞌi si surgaꞌ pinanyap weꞌ Tuhanin panumbasne sasuku aꞌa bentel. Pagtaꞌabut ellew pabalik si Isa mapituhin pangurung du inin si aku weꞌ Isa Almasi Panuhutankun, iye hukum mabentelin. Dumaꞌin hadja aku tinumbasanin saguwaꞌ tinumbasan du isab kēmon sasuku ngagad-ngagad papitu si Isa si dunyahin peggeꞌ kalasahande iye.
[9] Geꞌesanun teꞌed duk kew mura tapitu si aku.
[10] Si Demas, iye ne mamahalgaꞌ si iyehin meꞌ bayuꞌan si dunya kuweꞌitu inin. Gaꞌ ne iye tuꞌu si aku, ubus ne iye tahalaꞌ hap Tessalonika. Si Kereskes īꞌ hap Galatiya duk si Titus īꞌ hap Dalmatiya.
[11] Luwal du si Lukas saweꞌku tu. Eddoꞌun si Markus duk boꞌohun iye pitu peggeꞌ katabanganne ku teꞌed si hinangku inin.
[12] Si Tikikus īꞌ daꞌakku hap Epesus.
[13] Bang kew pitu, boꞌohun semmekkun īꞌ taꞌamban si lumaꞌ si Karpus laꞌi si lahat Toroas. Boꞌohun isab meꞌ librukun, lagiꞌ ne meꞌ sulatlu daꞌa kayipatanun binoꞌo.
[14] Si Iskandal, iye aꞌa magsasalin, laꞌat teꞌed hinanganne si akuhin. Saguwaꞌ ambat ne, Tuhanin saꞌ taꞌu numbasan meꞌ hinanganne miyaꞌan.
[15] Kaꞌu isab, pahatul-hatul kew teꞌed si iye peggeꞌ kinuntarahan teꞌed weꞌ ne kēmon usihatten.
[16] Tagnaꞌku sinumariya laꞌi si saraꞌ gaꞌ niyaꞌ naksiꞌan aku. Inambanan ku weꞌ de kēmon. Karayaw gaꞌi du siye legga Tuhanin sabab hininangde si aku miyaꞌan.
[17] Saguwaꞌ bisan ku ambanande, gaꞌ du ku ambanan Isa Almasi, Panuhutanten. Tinabangan ku weꞌ ne duk inurungan ku weꞌ ne basag supaya tapalataꞌku teꞌed lapalnen si kēmon aꞌa dumaꞌin bangsa Yahudi. Pinaluwas ku weꞌ Tuhanin amban dem kasiya-siyahan.
[18] Sandel ku teꞌed si Tuhan weꞌ tabangne du ku bisan ine umantag si aku si pasōngan duk ujud boꞌone du ku pī si surgaꞌ, laꞌi si lahat pagbayaꞌannen. Pataꞌ Tuhanin pinudji salama-lama. Amin.
[19] Akahanun aku disi Pirisila duk Akila duk disi Onesiporos magtewtey-anakin weꞌ essebku siye.
[20] Si Erastus īꞌ paꞌamban laꞌi si Korinto. Si Toropimus īꞌ inambanan weꞌ ku laꞌi si Miletus peggeꞌ saki iye.
[21] Timoteo, geꞌesanun teꞌed pitu si aku mura duk kew gaꞌi taꞌabut badju si lān. Maboꞌo bissā piyu si kaꞌu disi Ubulus, si Pudes, si Linus duk si Kalauda weꞌ essebde kew. Damikkiyan isab meꞌ kapungtinaꞌihante bi masandel pu si Isa matuꞌu sinduwehin.
[22] Karayaw Panuhutanten bi Isa Almasi pateteg luꞌu dem ateynu. Karayaw kēmon kaꞌam ipat Tuhanin du. Wassalam