[1] Manjari, kaꞌu, Timoteo, anakku, pabasagun sandelnun peggeꞌ tabangan Tuhanin du kite bi meꞌ magdambuwaꞌ duk Isa Almasihin.
[2] Bakas takalenu ne meꞌ usihatku si meꞌ aꞌa maꞌekkahin. Manjari, kēmon usihatku bakas takalenu miyaꞌan subey panoloꞌnu si meꞌ aꞌa kapangandelan, meꞌ aꞌa taꞌu noloꞌan saweꞌde.
[3] Maglillaꞌ kew nandalan kasigpitan kuweꞌ akuhin supaya kew kuweꞌ sundalu hāp si antanan Isa Almasi.
[4] Aꞌa magsundaluhin, mabayaꞌ iye weꞌ kasulutan nakuraꞌnen si iye. Hangkan gaꞌi iye patuhut si meꞌ hinangan meꞌ sibilyanin.
[5] Bang niyaꞌ aꞌa paꞌasek maglakkesan magubas, gaꞌi du iye ngandaꞌag bang gaꞌi tuhutne meꞌ saraꞌ pagdaꞌagan miyaꞌan.
[6] Aꞌa mabasag maghinang si bulakin, subey iye dehellu mangeddoꞌ bahagiꞌ si jari tinanemnen.
[7] Pikil-pikilun meꞌ dalilanku inin peggeꞌ tabangan Tuhanin du kew supaya tahātinu teꞌed kēmon.
[8] Essebun Isa Almasi, tubuꞌ si Daꞌud iye duk pinakellum iye balik amban kamateynen. Iye inin aka-aka mahāp minahalayakkun.
[9] Sabab pagmahalayakku aka-aka mahāp inin tiyaꞌ ku magsandal dem kalabusu duk kinarena ku ituꞌ kuweꞌ aꞌa bakas ngalanggalan saraꞌ. Ambat ne bisan ku kinarena saguwaꞌ lapal Tuhanin gaꞌi du kinarena.
[10] Hangkan hep sandalanku hadja kēmon bayuꞌ-bayuꞌan kasigpitanin supaya meꞌ aꞌa tapeneꞌ Tuhanin sandel ne paꞌin pu si Isa Almasi duk sabab sandelde miyaꞌan tepe si siye umul gaꞌ niyaꞌ tamanannen si surgaꞌ duk sakup siye dem sahaya Tuhanin salama-lama.
[11] Bennal meꞌ bissā inin: “Bang kite bakas nuhut Isa Almasi matey, nuhut iye du isab kite ellum balik.
[12] Bang nandal ne paꞌin kite kasigpitan kuweꞌitu, patuhut du kite pu si Isa magbayaꞌ si pasōngan. Bang masuwey kite weꞌ gaꞌi kite nuhut iye, masuwey du isab iye iyan weꞌ dumaꞌin iye Panuhutanten.
[13] Bang kite gaꞌi teteg si iye, masi du iye kapangandelan duk asal tumananne du bissānen. Peggeꞌ bang iye, gaꞌi teꞌed pinda addatnen.”
[14] Paꞌessebanun meꞌ masandel pu si Isa maluꞌuhin sabab meꞌ bakas pinaꞌinku miyaꞌan. Sessaꞌanun isab siye si pakalehan Tuhan, amey-amey daꞌa siye magsuꞌal sabab meꞌ bissā. Gaꞌi makahāp siye meꞌ pagsuꞌal inin bisan miyaꞌan makapagkaꞌat sandel meꞌ aꞌa makakalehin pe.
[15] Paggeꞌesanun teꞌed pinahāp meꞌ hinangnun supaya kasulutan Tuhanin si kaꞌu. Pabentelun pagusihatnu lapal Tuhan mabennalin supaya kew gaꞌi iyaꞌ sabab meꞌ hinangnun.
[16] Halliꞌanun meꞌ pagbissā kadupangan gaꞌi makaboꞌo kite tudju Tuhanin. Sasuku palamud si meꞌ pagbissā iyan ujud pasōng katimboꞌohan magduse duk tumala ne amban Tuhan.
[17] Meꞌ panoloꞌde inin kuweꞌ ibatan bakatew palatag ne paꞌin sampay lapat baranin. Kuweꞌ miyaꞌan panoloꞌ disi Himunus duk Pilitusin.
[18] Ilebbahan weꞌ de toloꞌ mabennalin. Paꞌinde weꞌ bakas palabey ne pamakellum meꞌ aꞌa mamateyin, ubus si pasōngan gaꞌi ne pinakellum. Sabab toloꞌde manggaꞌi matoꞌo inin niyaꞌ meꞌ aꞌa gaꞌi ne sandel pu si Isa.
[19] Saguwaꞌ toloꞌ amban Tuhanin pagen manamal kuweꞌ batu hadje gaꞌi tajedjeg. Duk niyaꞌ tasulat pinaꞌin, “Kataꞌuhan Tuhanin bang asal sine meꞌ aꞌanen.” Duk niyaꞌ pe isab pinaꞌin, “Sine-sine magpaꞌin weꞌ sukuꞌ si Tuhan iye, subey lebbahanne kēmon hinangan malaꞌatin.”
[20] Magdalilan ku si kaꞌu, Timoteo. Si lumaꞌ mahadje patennaꞌan aꞌa dayahanin ekka bayuꞌ-bayuꞌan panyap. Niyaꞌ meꞌ laley bulawan duk meꞌ laley pilak. Meꞌ laley mamahalgaꞌ inin ginuna hadja bang niyaꞌ bangsahan nindew siye. Niyaꞌ isab si lumaꞌ miyaꞌan meꞌ laley kayu duk meꞌ paliyuk. Iye inin ginuna ellew-ellewin.
[21] Manjari kite bi meꞌ masandel pu si Isahin dalil meꞌ panyap mamahalgaꞌ miyaꞌan. Bang sutsi ateyten bi duk lebbahante bi kēmon hinangante bi malaꞌatin, mahalgaꞌ kite bi si Tuhan peggeꞌ dambūs-būs ne kite bi si Tuhan. Manjari niyaꞌ kagunahanne si kite bi duk tahante bi ne maghinang sasuku mahāpin.
[22] Daꞌa ūtanun napsunun, iye napsu meꞌ lella mabataꞌin. Iye apasun maghinangan bentel. Pabasagun sandelnu si Tuhanin. Kalasahanun ne paꞌin meꞌ pagkasinun duk magsulut-sulut kaꞌam duk meꞌ masandel si Panuhutanten bi Isa Almasi, ateyden asal dambūs-būs hadja.
[23] Halliꞌanun meꞌ pagjawaban gaꞌ niyaꞌ kagunahanne duk kadupangan hadja. Kataꞌuhannu du weꞌ kaꞌujudanne iyan magsasaꞌ siye.
[24] Bang kite bi meꞌ daraꞌakan Tuhanin subey kite bi gaꞌi magsasaꞌ duk sine-sine. Subey kite bi maꞌaseꞌ si kēmon aꞌa duk subey kite bi taꞌu magtoloꞌ duk gaꞌi mura jumuꞌ magtoloꞌ.
[25] Bang sābute bi magtoloꞌin bu niyaꞌ ngajampa kite bi, paꞌagak-agakte bi bang siye sambungante bi. Kaw siye inurungan lugal magsusun duk pindahan Tuhanin pikilanden duk ujud kataꞌuhande toloꞌ mabennalin.
[26] Manjari ngahāp du balik pikilanden duk lumuwas du siye amban antanan nakuraꞌ seyitanin, iye bakas mangati siye nuhut kinabayaꞌannen.