[1] ᑭᔮᓇᐤ ᒫᑲ ᑲᑯᐢᐸᓀᔨᑕᑖᐠ, ᑫᑲ ᓈᐣᑕᐤ ᐃᓯ ᐊᓱᑕᒫᑯᐃᐧᐣ ᐁ ᑭ ᓇᑲᑕᒫᑲᐃᐧᔭᕽ ᑭᑕ ᐱᐦᑐᑫᔭᕽ ᐅᐟ ᐊᔦᐧᐱᐃᐧᓂᕽ ᓈᐣᑕᐤ ᐊᐃᐧᔭᐠ ᑭᔭᐋᐧᐤ ᐁ ᓄᑌᐸᔨᔦᐠ ᑭᑕ ᐃᓯᓈᑯᒋᑫᔦᐠ.
[2] ᒋᑫᒫ ᑖᐯᐧ ᒥᔮᐧᒋᒧᐃᐧᐣ ᑭ ᑭ ᐃᐧᐦᑕᒫᑲᐃᐧᓈᓇᐤ ᑖᐱᐢᑯᐨ ᐃᐧᔭᐋᐧᐤ; ᒫᑲ ᐃᑌᐧᐃᐧᐣ ᑳ ᐯᐦᑕᐦᑭᐠ ᓇᒪᐃᐧᔭ ᑭ ᐋᐸᒋᐃᑲᐧᐠ ᐃᐧᔭ ᐁᑳ ᐁ ᑭᑭᐸᔨᔨᐠ ᑖᐯᐧᔦᔨᑕᒧᐃᐧᐣ ᐊᓂᑭ ᑳ ᐯᐦᑕᐦᑭᐠ.
[3] ᒋᑫᒫ ᑭᔮᓇᐤ ᑳ ᑭ ᑖᐯᐧᑕᒪᕽ ᑭ ᐱᑐᑳᓈᓇᐤ ᐊᓂᒪ ᐊᔦᐧᐱᐃᐧᐣ; ᑖᐱᐢᑯᐨ ᑳ ᑭ ᐃᑌᐧᐟ, ᑳ ᑭ ᐃᓯ ᑭᐦᒋ ᐃᑌᐧᔮᐣ ᓂ ᑭᓯᐋᐧᓯᐃᐧᓂᕽ, ᓇᒪᐃᐧᔭ ᑭᑕ ᐱᐦᑐᑫᐊᐧᐠ ᓂᐟ ᐊᔦᐧᐱᐃᐧᓂᕽ; ᐋᑕ ᐊᑐᐢᑫᐃᐧᓇ ᐁ ᑭ ᑭᓯᒋᑳᑌᑭ ᐊᐢᐱᐣ ᐁ ᐅᔭᐢᑌᐠ ᐊᐢᑭ ᐅᐦᒋ.
[4] ᒋᑫᒫ ᓈᐣᑕᐤ ᐃᑕ ᐅᒥᓯ ᐃᓯ ᒫᒥᐢᑯᑕᑦ ᑌᐸᑯᑊ ᐁ ᐃᑕᐦᑐ ᑭᓯᑳᐠ, ᑭ ᐊᔦᐧᐱᐤ ᒫᑲ ᑭᓭᒪᓂᑐ ᑌᐸᑯᑊ ᐁ ᐃᑕᐦᑐ ᑭᓯᑳᔨᐠ ᑲᐦᑭᔭᐤ ᐅᐟ ᐊᑐᐢᑫᐃᐧᓇ ᐁ ᐳᓂ ᐊᑐᐢᑳᑕᕽ;
[5] ᐁᑲᐧ ᐅᑕ ᒥᓇ ᑳ ᐃᑌᐧᐟ, ᓇᒪᐃᐧᔭ ᑭᑕ ᐱᐦᑐᑫᐊᐧᐠ ᓂᐟ ᐊᔦᐧᐱᐃᐧᓂᕽ.
[6] ᐁ ᓄᑲᐧᕽ ᒫᑲ ᐁ ᐃᑕᐢᑌᐠ ᐋᑎᐦᐟ ᑭᑕ ᐱᐦᑐᑫᒋᐠ ᐁᑯᑕ ᐁᑯᓯ ᐊᓂᑭ ᒥᔮᐧᒋᒧᐃᐧᐣ ᑳ ᑭ ᐃᐧᐦᑕᒫᒋᐠ ᓂᑳᐣ ᐁᑳ ᐁ ᑭ ᐱᐦᑐᑫᒋᐠ ᓴᓯᐱᑕᒧᐃᐧᐣ ᐅᐦᒋ,
[7] ᒥᓇ ᑭᑖᐧᑦ ᐃᐧᐦᑕᑦ ᑭᓯᑳᐤ, ᐁ ᐃᑌᐧᐟ ᑌᐱᐟ ᐅ ᒪᓯᓇᐦᐃᑲᓂᕽ, ᒣᐧᐢᑕᐢ ᐃᔨᑯᕽ, ᐊᓄᐦᐨ ᑳ ᑭᓯᑳᐠ, ᑖᐱᐢᑯᐨ ᓵᓴᐩ ᑳ ᑭ ᐃᑌᐧᕽ, ᐊᓄᐦᐨ ᑳ ᑭᓯᑳᐠ ᑭᐢᐱᐣ ᑭ ᑲ ᐯᑕᒫᐧᓈᐋᐧᐤ ᐅᐟ ᐃᑌᐧᐃᐧᐣ, ᐁᑳᐃᐧᔭ ᒪᐢᑲᐃᐧᑖᐠ ᑭᑌᐦᐃᐋᐧᐊᐧ.
[8] ᒋᑫᒫ ᑭᐢᐱᐣ ᒑᐢᔪᐊᐧ ᑭ ᒥᔨᑯᒋᐠ ᐊᔦᐧᐱᐃᐧᐣ ᓇᒪᐃᐧᔭ ᐅ ᑲ ᑭ ᒫᒥᐢᑯᑌ ᑯᑕᐠ ᑭᓯᑳᐤ.
[9] ᐃᐦᑕᑲᐧᓂᔨᐤ ᒫᑲ ᐅᐟ ᐊᔦᐧᐱᐃᐧᑭᓯᑳᒥᐋᐧᐤ ᑭᓭᒪᓂᑐ ᐅᐟ ᐃᔨᓂᒪ.
[10] ᒋᑫᒫ ᐊᓇ ᑳ ᑭ ᐱᐦᑐᑫᐟ ᐅᐟ ᐊᔦᐧᐱᐃᐧᓂᕽ ᐃᐧᔭ ᒥᓇ ᐊᔦᐧᐱᐤ ᑲᐦᑭᔭᐤ ᐅᐟ ᐊᑐᐢᑫᐃᐧᓇ ᐁ ᐳᓂ ᐊᑐᐢᑳᑕᕽ ᑖᐱᐢᑯᐨ ᑭᓭᒪᓂᑐ ᑳ ᑭ ᐃᑐᑕᕽ.
[11] ᐋᑲᒣᔨᒧᑖᐠ ᒫᑲ ᑭᔮᓇᐤ ᑭᑕ ᐱᐦᑐᑫᔭᕽ ᐊᓂᒪ ᐊᔦᐧᐱᐃᐧᐣ ᐁᑳ ᐊᐃᐧᔭᐠ ᐊᔨᓯᔨᓂᐤ ᑭᑕ ᐸᐦᑭᓯᕽ ᑳ ᐃᓯ ᐸᐦᑭᓯᒥᐁᐧᐠ ᐁᑳ ᐁ ᑖᐯᐧᑕᒥᕽ.
[12] ᒋᑫᒫ ᐅᐟ ᐃᑌᐧᐃᐧᐣ ᑭᓭᒪᓂᑐ ᐱᒫᑕᓂᔨᐤ, ᒥᓇ ᑭᔨᐸᐣ, ᐊᐊᐧᓯᒣ ᑳᓯᓯᐣ ᐃᔨᑯᕽ ᐁ ᓂᓵᐧᐱᑕᑳᐠ ᐃᓴᐁᐧᐢᐠ, ᐁ ᓵᐳᐢᑕᐅᐁᐧᐠ ᐊᐦᐳ ᐁ ᓴᐃᐧᐁᐧᐸᐅᑯᐟ ᐊᐦᒑᕽ ᒥᓇ ᒥᑐᓀᔨᒋᑲᐣ ᒥᓇ ᐁ ᑭᔨᐸᕽ ᑭᑕ ᓂᓯᑕᐃᐧᓇᒧᒪᑲᕽ ᒥᑐᓀᔨᒋᑲᓇ ᒥᓇ ᐅᔦᔨᑕᒧᐃᐧᓇ ᒥᑌᐃᕽ ᑳ ᐊᔮᑭ.
[13] ᓇᒪᐃᐧᔭ ᒫᑲ ᐃᑖᐤ ᐅᓯᐦᒋᑲᐣ ᐁᑳ ᐁ ᐸᔭᑌᓈᑯᓯᐟ ᐃᐧᔭ ᐁ ᐃᓯ ᑭᑖᐸᑕᕽ; ᒫᑲ ᑲᐦᑭᔭᐤ ᑫᑲᐧᐩ ᒧᓭᐢᑌᐤ ᒥᓇ ᐸᔭᑌᐢᑌᐤ ᐁ ᐃᓯ ᐋᐧᐸᐦᑕᕽ ᐃᐧᔭ ᐊᓇ ᑫ ᐅᑎᐢᑲᐃᐧᐢᑲᐋᐧᔭᕽ.
[14] ᐁ ᐊᔭᐋᐧᔭᕽ ᒫᑲ ᐁ ᑭᐦᒑᔨᐃᐧᐟ ᑭᐦᒋ ᐊᔭᒥᐦᐁᐃᐧᔨᓂᐤ, ᑳ ᑭ ᓵᐳᐢᑲᕽ ᑭᓯᑲᐧ ᒋᓴᐢ ᑭᓭᒪᓂᑐ ᐅᑯᓯᓴ, ᒥᒋᒥᓇᑖᐠ ᑭ ᑭᐢᑭᒧᐃᐧᓂᓇᐤ
[15] ᒋᑫᒫ ᑭᐟ ᐊᔮᐋᐧᓇᐤ ᑭᐦᒋ ᐊᔭᒥᐦᐁᐃᐧᔨᓂᐤ ᓇᒪᐃᐧᔭ ᑐᐊᐧ ᐁᑳ ᑭᑕ ᑭ ᓴᐃᐧᐢᑳᑯᐟ ᑭᑕ ᒧᓯᑖᐟ ᑭ ᓀᓱᐋᐧᑎᓯᐃᐧᓂᓇᐊᐧ; ᒫᑲ ᐊᓇ ᒥᓯᐁᐧ ᐃᓯ ᑳ ᑭ ᑲᑫᐧᒋᐃᐦᐟ ᑖᐱᐢᑯᐨ ᑭᔮᓇᐤ ᒫᑲ ᐁᑳ ᒪᒑᔨᐃᐧᐣ ᐁ ᑭᑭᐢᑳᑯᐟ.
[16] ᐁᑯᓯ ᒫᑲ ᐁ ᓱᑫᔨᒧᔭᕽ ᐃᑐᑌᑖᐠ ᑭᓭᐋᐧᑎᓯᐃᐧᓂ ᑭᐦᒋ ᐊᐱᐃᐧᓂᕽ, ᑭᑎᒫᑭᓈᑯᐃᐧᐣ ᑭᑕ ᐅᐦᑎᓇᒪᕽ, ᒥᓇ ᑭᑕ ᒥᐢᑲᒪᕽ ᑭᓭᐋᐧᑐᑖᑯᐃᐧᐣ ᑭᑕ ᐃᐧᒋᐃᑯᔭᕽ ᐃᑕ ᐁ ᓇᑕᐁᐧᔨᑕᒪᕽ.