[1] ᐁᑳᐃᐧᔭ ᑭᑕ ᐳᓂᐸᔨᐤ ᑳ ᓵᑭᐃᐦᒋᐠ ᐅᒋᐋᐧᒥᒫᐊᐧᐠ.
[2] ᐁᑳᐃᐧᔭ ᐊᐧᓂᑭᐢᑭᓯᐠ ᑭᑕ ᐋᐧᐸᐦᑕᐋᔦᑯᐠ ᓵᑭᐦᐃᐁᐧᐃᐧᐣ ᒫᓂᑌᐊᐧᐠ; ᒋᑫᒫ ᐁᑯᓯ ᐁ ᐃᑐᑕᐦᑭᐠ ᐋᑎᐦᐟ ᑭ ᐱᑐᑲᐁᐊᐧᐠ ᐅᑭᓯᑯᐊᐧ ᐁᑳ ᐁ ᑭᐢᑫᔨᑕᐦᑭᐠ.
[3] ᑭᐢᑭᓯᑐᑖᑯᐠ ᐊᓂᑭ ᑳ ᒪᒫᒋᑲᐧᐱᓱᒋᐠ ᑖᐱᐢᑯᐨ ᑭᐢᑕᐋᐧᐤ ᐁ ᑭᑭ ᒪᒫᒋᑲᐧᐱᓱᔦᐠ; ᐊᓂᑭ ᑳ ᒫᔨᑐᑖᒋᐠ ᑖᐱᐢᑯᐨ ᐁᑯᓯ ᑭᐢᑕᐋᐧᐤ ᐁ ᐃᓯᓈᑯᓯᔦᐠ ᑭᔭᐃᐧᐋᐧᕽ.
[4] ᑭᔮᑦ ᐃᐧᑭᑐᐃᐧᐣ ᑭᑕ ᑭᐢᑌᔨᑕᑦ ᑲᐦᑭᔭᐤ ᐊᐃᐧᔭᐠ ᐁᑯᓯ ᓂᐯᐃᐧᐣ ᑭᑕ ᒪᓈ ᐃᐧᔨᐱᑖᕽ; ᒫᑲ ᐅᓄᒋᐃᐁᐧᐢᑲ ᒥᓇ ᐅᐱᓯᑳᐧᑎᓯᐊᐧ ᑭᓭᒪᓂᑐ ᑭᑕ ᐅᔭᓱᐋᐧᑌᐤ.
[5] ᐁᑳᐃᐧᔭ ᑳ ᓵᑭᐃᐦᐟ ᓱᓂᔮᐤ ᑭ ᑲ ᑎᐯᔨᒥᑯᓈᐋᐧᐤ; ᑌᐱᔭᐁᐧᓯᐠ ᐃᔨᑯᕽ ᑫᑲᐧᐩ ᐁ ᐊᔮᔦᐠ; ᒋᑫᒫ ᐃᐧᔭ ᑭ ᐃᑌᐧᐤ, ᓇᒪᐃᐧᑳᐨ ᑭ ᑲ ᓇᑲᑎᑎᐣ ᓇᒪᐃᐧᑳᐨ ᑭ ᑲ ᐁᐧᐱᓂᑎᐣ.
[6] ᐁᑯᓯ ᒫᑲ ᓱᑫᔨᒧᐃᐧᓂᕽ ᑭ ᑲ ᑭ ᐃᑖᐧᓈᓇᐤ, ᑳ ᑎᐯᔨᐦᒋᑫᐟ ᓂ ᓂᓱᑲᒫᐠ; ᓇᒪ ᑫᑲᐧᐩ ᓂ ᑲ ᑯᐢᑌᐣ; ᑖᓂᓯ ᐃᐧᔭ ᐊᔨᓯᔨᓂᐤ ᑫ ᑭ ᐃᑐᑕᐃᐧᐟ?
[7] ᑭᐢᑭᓯᑐᑖᑯᐠ ᐊᓂᑭ ᑳ ᑎᐯᔨᒥᑯᔦᑯᐠ ᑳ ᑭ ᐃᐧᐦᑕᒫᑯᔦᑯᐠ ᑭᓭᒪᓂᑐ ᐅᐟ ᐃᑌᐧᐃᐧᐣ; ᐁᑯᓯ ᐁ ᒥᑐᓀᔨᑕᒣᐠ ᐁ ᐃᓯ ᓄᑯᑖᒋᐠ ᐅ ᐱᒫᑎᓯᐃᐧᓂᐋᐧᕽ ᑭᐢᑭᓇᐋᐧᐸᐦᑕᒫᐧᕽ ᐅ ᑖᐯᐧᔦᔨᑕᒧᐃᐧᓂᐋᐧᐤ.
[8] ᒋᓴᐢ ᙭ ᐯᔭᑲᐧᐣ ᐁᓯ ᐊᔮᐟ ᐅᑖᑯᓯᕽ ᐊᓄᐦᐨ ᑳ ᑭᓯᑳᐠ ᒥᓇ ᑳᑭᑫ.
[9] ᐁᑳᐃᐧᔭ ᑭ ᑲ ᐁᐧᐱᐃᑯᓈᐋᐧᐤ ᓇᓈᑐᕽ ᒥᓇ ᐱᑐᐢ ᑭᐢᑭᓄᐦᐊᒫᑫᐃᐧᓇ; ᒋᑫᒫ ᒥᔮᐧᓯᐣ ᒥᑌᐦ ᑭᑕ ᐊᔮᑕᐢᑌᐠ ᓂᓱᑲᒫᑯᐃᐧᐣ ᐅᐦᒋ; ᓇᒪᐃᐧ ᐃᐧᔭ ᒥᒋᐃᐧᓇ ᐅᐦᒋ ᐁᐊᐧᑯᓂ ᐊᓂᑭ ᑳ ᐸᒥᑖᒋᐠ ᐁᑳ ᓈᐣᑕᐤ ᑳ ᑭ ᐃᑖᐸᒋᐃᑯᒋᐠ.
[10] ᑭᐟ ᐊᔮᓇᐤ ᐸᑭᑎᓈᓱᐃᐧᓈᐱᐢᐠ, ᐃᑕ ᐁᑳ ᐁ ᐃᑕᐢᑌᐠ ᑭᑕ ᑭ ᐅᐦᒋ ᒥᒋᓱᒋᐠ ᐊᓂᑭ ᑳ ᐊᑐᐢᑳᑕᐦᑭᐠ ᐊᔭᒥᐦᐋᐃᐧ ᒥᑭᐋᐧᐦᑊ.
[11] ᒋᑫᒫ ᐃᐧᔭᐃᐧᐋᐧᐊᐧ ᐊᓂᑭ ᐱᓯᐢᑭᐊᐧ ᐅ ᒥᐦᑯᐋᐧᐤ ᑳ ᐱᑐᑲᑖᔨᐟ ᑭᐦᒋ ᐊᔭᒥᐦᐁᐃᐧᔨᓂᐊᐧ ᐃᑕ ᐁ ᑲᓈᑕᕽ ᐊᔭᒥᐦᐋᐃᐧ ᒥᑭᐋᐧᐱᕽ ᒪᒋᑎᐃᐧᐣ ᐅᐦᒋ, ᑭ ᒪᒍᐢᑌᐃᑳᑌᔨᐊᐧ ᐊᐧᔭᐃᐧᑎᒪᔨᕽ ᑲᐯᓯᐃᐧᓂᕽ.
[12] ᐁᑯᓯ ᐃᓯ ᒥᓇ ᒋᓴᐢ, ᑭᑕ ᑭ ᑲᓈᒋᐋᐟ ᐊᔨᓯᔨᓂᐊᐧ ᐃᐧᔭ ᐅ ᒥᐦᑯ ᐅᐦᒋ, ᑭ ᑯᑕᑭᑖᐤ ᐊᐧᔭᐃᐧᑎᒥᕽ ᑭᐦᒋ ᐃᐢᑳᐧᑌᒥᕽ.
[13] ᑭᔮᑦ ᒫᑲ ᐊᐧᔭᐃᐧᑖᐠ ᐊᐧᔭᐃᐧᑎᒫᔨᕽ ᑲᐯᓯᐃᐧᓂᕽ ᐁ ᐱᒥᐃᐧᑖᐋᐧᔭᕽ ᐅ ᓇᓀᐯᐃᐧᐃᑯᐃᐧᐣ.
[14] ᒋᑫᒫ ᐅᑕ ᐃᐧᔭ ᓇᒪᐃᐧᔭ ᑭᐟ ᐊᔮᓇᐤ ᑳᑭᑫ ᐁ ᐊᔮᐠ ᐅᑌᓇᐤ, ᒫᑲ ᑭ ᓇᑐᓀᓈᓇᐤ ᐊᓂᒪ ᓂᑳᐣ ᑳ ᐊᔮᐠ.
[15] ᐃᐧᔭ ᒫᑲ ᐅᐦᒋ ᑕᐦᑭ ᐸᑭᑎᓇᒪᐋᐧᑖᐠ ᑭᓭᒪᓂᑐ ᒪᒥᒋᒥᐁᐧᐃᐧ ᐸᑭᑎᓈᓱᐃᐧᐣ ᐁᐊᐧᑯ ᐁ ᐃᓯ ᒥᓂᓯᐊᐧᑭ ᒥᑐᓇ ᑳ ᐋᐧᐃᐧᑕᒧᒪᑲᓂᔨᑭ ᐅ ᐃᐧᔪᐃᐧᐣ.
[16] ᒫᑲ ᑭᑕ ᒥᔪ ᑐᑖᒣᐠ ᒥᓇ ᑭᑕ ᐅᐦᒋᐢᑕᒫᑫᔦᐠ ᐁᑳᐃᐧᔭ ᐊᐧᓂᑭᐢᑭᓯᐠ; ᒋᑫᒫ ᐁᑯᑐᐃᐧ ᐸᑭᑎᓈᓱᐃᐧᓇ ᑭᓭᒪᓂᑐ ᒥᔦᐧᔨᑕᑦ.
[17] ᓇᓇᐃᑖᑯᐠ ᐊᓂᑭ ᑳ ᑎᐯᔨᒥᑯᔦᑯᐠ ᒥᓇ ᑕᐸᑌᔨᒧᑐᑖᑯᐠ; ᒋᑫᒫ ᐊᓴᐋᐧᐱᐢᑕᒪᐁᐧᐊᐧᐠ ᑭᐟ ᐊᐦᒑᑯᐋᐧᐊᐧ ᑖᐱᐢᑯᐨ ᐃᐧᔭᐋᐧᐤ ᑭᑕ ᐊᑭᑕᒫᐦᒋᐠ; ᑭᑕ ᑭ ᐃᑐᑕᐦᑭᐠ ᒫᑲ ᐅᒪ ᒪᒪᐦᑖᑯᓯᐃᐧᓂᕽ ᓇᒪᐃᐧᔭ ᒫᑲ ᐱᑫᐧᔨᑕᒧᐃᐧᓇᕽ; ᒋᑫᒫ ᐁᐊᐧᑯ ᓇᒪᐃᐧᔭ ᑭᔭᐋᐧᐤ ᑭᑕ ᐋᐸᒋᐃᑯᔦᐠ.
[18] ᐊᔭᒥᐦᐁᐢᑕᒪᐃᐧᓈᐣ; ᒋᑫᒫ ᓂ ᑫᒋᓈᐅᓈᐣ ᒥᔪ ᑭᐢᑫᔨᒥᓱᐃᐧᐣ ᐁ ᐊᔮᔮᕽ ᒥᓯᐁᐧ ᐃᓯ ᑲᐧᔭᐢᐠ ᐁ ᐃᐧ ᑲᑫᐧ ᐃᓯ ᐱᒫᑎᓯᔮᕽ.
[19] ᐅᒪ ᒫᑲ ᐊᔨᐋᐧᐠ ᑭ ᓯᑭᒥᑎᓈᐋᐧᐤ ᑭᑕ ᑲᑫᐧ ᐃᑐᑕᒣᐠ ᓇᐊᐧᐨ ᑭᔨᐸ ᑭᑕ ᐸᑭᑎᓂᑲᐃᐧᔮᐣ ᑭᑕ ᐋᐧᐸᒥᑕᑯᐠ.
[20] ᐁᑲᐧ ᒫᑲ ᑭᓭᒪᓂᑐ ᑳ ᑎᐯᔨᑕᕽ ᐯᔭᑕᑫᔨᒧᐃᐧᐣ ᐊᓇ ᑭᑖᐧᑦ ᑳ ᑭ ᐯ ᑭᐁᐧᑕᐋᐟ ᓂᐳᐃᐧᓂᕽ ᐅᐦᒋ ᐊᓂᐦᐃ ᑭᐦᒋ ᐅᑲᓇᐃᐧᒫᔭᑎᐦᑫᐧᒥᐋᐧᐊᐧ ᒫᔭᑎᐦᑲᐧᐠ ᐁ ᑭᑭᔨᐟ ᒥᐦᑯ ᑳ ᐅᐦᒋ ᐊᔮᐠ ᑳᑭᑫ ᐊᓱᑕᒫᑫᐃᐧᐣ, ᑳ ᑎᐯᔨᒥᑯᔭᕽ ᒋᓴᐢ ᐅᑎ,
[21] ᑭ ᑲ ᐃᐧ ᐃᓯᐃᑯᐋᐧᐤ ᑭᑕ ᒪᒥᑐᓂᔦᐠ ᑲᐦᑭᔭᐤ ᑫᑲᐧᐩ ᐁ ᒥᔮᐧᓯᐠ, ᐁ ᐃᑐᑕᒣᐧᐠ ᐅᐟ ᐃᑌᔨᑕᒧᐃᐧᐣ, ᐁ ᐊᑐᐢᑳᑎᑯᔦᐠ ᐊᓂᒪ ᑳ ᒥᔮᐧᐱᓯᒥᑯᐠ ᑭᑕ ᑭᑭᐢᑳᑯᔦᐠ, ᐃᐧᔭ ᐅᐦᒋ ᒋᓴᐢ ᙭; ᐁᐊᐧᑯ ᑭᑕ ᐊᔮᐤ ᑭᐢᑌᔨᑖᑯᓯᐃᐧᐣ ᑳᑭᑫ ᒥᓇ ᑳᑭᑫ. ᐋᒣᐣ.
[22] ᑭ ᐸᑯᓭᔨᒥᑎᓈᐋᐧᐤ ᒫᑲ ᓂᒋᐋᐧᒥᑎᐠ, ᐁᑳᐃᐧᔭ ᐃᐦᑫᔨᑕᒧᐠ ᐅᒪ ᓯᑭᑫᒧᐃᐧ ᐃᑌᐧᐃᐧᐣ; ᒋᑫᒫ ᒐᑲᐋᐧᓯᐢ ᐃᑌᐧᐃᐧᓇ ᑭ ᒪᓯᓇᐦᐊᒫᑎᓈᐋᐧᐤ.
[23] ᑭ ᑭᐢᑫᔨᑌᓈᐋᐧᐤ ᒋ ᑭᒋᐋᐧᒥᓇᐤ ᑎᒪᑎ ᐁ ᑭ ᐸᑭᑎᓂᐦᐟ; ᐁᐊᐧᑯ ᐁ ᐃᐧᒉᐊᐧᐠ ᑭᐢᐱᐣ ᑭᔨᐸ ᑕᑯᓯᑭ ᑭ ᑲ ᐊᐧᐸᒥᑎᓈᐋᐧᐤ.
[24] ᐊᑕᒥᐢᑳᑯᐠ ᑲᐦᑭᔭᐤ ᐊᓂᑭ ᑳ ᑎᐯᔨᒥᑯᔦᑯᐠ ᒥᓇ ᑲᐦᑭᔭᐤ ᐅᑲᓈᑎᓯᐊᐧᐠ. ᐊᓂᑭ ᐃᑕᓬᐃ ᑳ ᐅᐦᒋᒋᐠ ᑭᐟ ᐊᑕᒥᐢᑳᑯᐋᐧᐊᐧᐠ.
[25] ᑭᓭᐋᐧᑐᑖᑯᐃᐧᐣ ᑭ ᑲ ᐃᐧ ᐃᐧᒉᐃᐧᑯᓈᐋᐧᐤ ᑲᐦᑭᔭᐤ. ᐋᒣᐣ.