[1] Sasang si Isa lumengngan, ngite iye dambuwaꞌ aꞌa pessek amban dem betteng.
[2] Tinilew si Isa weꞌ meꞌ tindegnen, paꞌinde, “Tuwan, weꞌey teꞌ aꞌa inin pessek amban dem betteng? Sabab dusene ke atawa sabab duse saꞌi-samanen?”
[3] Nambung si Isa, paꞌinne, “Dumaꞌin sabab dusene atawa duse saꞌi-samanen hangkan iye pessek. Saguwaꞌ pessek iye supaya tapakitehan Tuhanin balakatnen bang ngite ne aꞌa inin.
[4] Pādpād ellew pe subey hinangte meꞌ hinang Tuhanin, Tuhan mamapitu akuhin,” paꞌin si Isa. “Pagtaꞌabut ne sangem gaꞌ ne niyaꞌ kapaghinang.
[5] Tiggelanku tuꞌu si dunya, aku mangurung dantaꞌ si pikilan manusiyaꞌin.”
[6] Pagubus inin bissā si Isa, ngaluraꞌ iye diyataꞌ bulak duk pinaglagumey weꞌ ne luraꞌnen duk bulakin hinang pisak. Ubus bu pinasusut weꞌ ne pisakin pī si mata aꞌahin.
[7] Ubus paꞌinne si aꞌahin, “Pī kew ngulaꞌup si boheꞌ Siluwam.” Hāti Siluwamin - pinaboꞌohan. Manjari pī ne aꞌa pessekin ngulaꞌup. Pagbalikne ngite ne iye.
[8] Takite iye weꞌ meꞌ saweꞌne magtapit lumaꞌin duk meꞌ aꞌa bakas mangite iye magpāku-pāku sīnin. Paꞌinde, “Dumaꞌin ke inin aꞌa bakas maningkoloꞌ magpāku-pāku sīnin?”
[9] Paꞌin meꞌ sinduwehin, “Aweꞌ, iye ne.” Paꞌin meꞌ sinduwehin isab, “Dumaꞌin iye. Kuweꞌ bantuknen hadja.” Saguwaꞌ nambung ne aꞌahin, paꞌinne, “Aku ne inin aꞌa bakas mapessekin.”
[10] “Saꞌingge pangitenun?” paꞌinde.
[11] Nambung iye, paꞌinne, “Niyaꞌ aꞌa inēnan si Isa ngahinang pisak bu pinasusut weꞌ ne pī si mataku. Ubus daꞌakne ku pī si boheꞌ Siluwam ngulaꞌup. Na, hap pī ne ku ngulaꞌup. Pagubus ku hadja ngulaꞌup, magtawus ne ku ngite.”
[12] “Antag ne aꞌa miyaꞌan,” paꞌinde. Nambung iye, paꞌinne, “Inday, gaꞌi kataꞌuhanku.”
[13] Manjari binoꞌo weꞌ meꞌ aꞌahin aꞌa bakas mapessekin pī si meꞌ Pariseohin.
[14] Ellew pangahinang si Isa pisakin duk pamakawuliꞌne aꞌa pessekin, ellew Sabtuꞌ, ellew liꞌi.
[15] Tinilew isab aꞌa bakas mapessekin weꞌ meꞌ Pariseohin, bang saꞌingge pangitenen. Paꞌinne si siye, “Binettadan weꞌ si Isa pisak meꞌ matakun. Ubus ngulaꞌup ku. Pagubus ku ngulaꞌup, magtawus ne ku ngite.”
[16] Paꞌin meꞌ Pariseo sinduwehin, “Aꞌa miyaꞌan dumaꞌin amban Tuhan peggeꞌ hininangne miyaꞌan ngalanggalan saraꞌ pasal ellew liꞌihin.” Saguwaꞌ paꞌin meꞌ sinduwehin, “Bang aꞌahin dusehan, gaꞌi tahinangne meꞌ hinangan makaꞌulaliꞌ kuweꞌ tahinangne miyaꞌan.” Manjari magseddili-seddili pikilanden.
[17] Manjari tinilew ne isab balik aꞌahin weꞌ meꞌ Pariseohin, paꞌinde, “Paꞌinnu weꞌ kawuliꞌan matanun weꞌ aꞌa miyaꞌan. Na, bang kaꞌu, sine iye?” Paꞌin aꞌa bakas mapessekin, “Bang aku, dambuwaꞌ iye nabi.”
[18] Saguwaꞌ meꞌ nakuraꞌ Yahudi miyaꞌan gaꞌi kahagad weꞌ aꞌa inin asal bakas pessek bu ngite ne, hangkan ilinganan weꞌ de saꞌi-samanen duk tinilewan weꞌ de.
[19] Paꞌin meꞌ nakuraꞌ miyaꞌan si siye, “Anakbi ke aꞌa inin? Toꞌo ke weꞌ pessek koꞌ iye amban dem betteng? Weꞌey managhāꞌ ngite ne iye kuweꞌitu?”
[20] Nambung meꞌ matettoꞌanen, paꞌinde, “Aweꞌ, anak kami inin. Toꞌo pessek iye amban dem betteng.
[21] Saguwaꞌ gaꞌi kataꞌuhan kami bang saꞌingge pangitene kuweꞌituhin atawa bang sine makakawuliꞌ matanen. Tilewun bi iye. Dumaꞌin ne du iye nakanak. Ambat iye ne nambungan kaꞌam.”
[22] Kuweꞌ miyaꞌan panambung meꞌ matettoꞌanen peggeꞌ tinalew siye si meꞌ nakuraꞌden. Peggeꞌ bakas magisun ne meꞌ nakuraꞌin weꞌ bang niyaꞌ magpaꞌin weꞌ kahagad iye si Isa ne Almasihin, gaꞌi aꞌa miyaꞌan pinaꞌasek dem langgal.
[23] Hangkan hep paꞌin meꞌ matettoꞌanen, “Tilewun bi iye. Dumaꞌin ne du iye nakanak.”
[24] Manjari ilinganan ne isab balik weꞌ meꞌ nakuraꞌ Yahudihin aꞌa bakas mapessekin duk paꞌinde si iye, “Akahun matoꞌohin. Iyuꞌ Tuhanin pakale-kale. Kataꞌuhan kami weꞌ aꞌa magpakawuliꞌ si kaꞌu miyaꞌan dusehan.”
[25] Nambung aꞌahin, paꞌinne, “Gaꞌi kataꞌuhanku bang dusehan ke aꞌa miyaꞌan atawa gaꞌi. Iye hadja kataꞌuhankun, weꞌ tagnaꞌ pessek ku saguwaꞌ kuweꞌitu ngite ne ku.”
[26] Tilewde iye balik, “Inumeyne si kaꞌuhin hangkan kew ngite?”
[27] Sambunganne siye, paꞌinne, “Bakas ne kaꞌam akahanku bu gaꞌ du pakalebi. Weꞌey pe batang takalebi balik? Hatu mabayaꞌ isab kaꞌam patindeg si iye.”
[28] Binissā-bissāhan iye weꞌ meꞌ nakuraꞌ miyaꞌan, paꞌinde, “Kaꞌu tindegnen. Kami inin tindeg si Musa.
[29] Kataꞌuhan kami weꞌ Tuhanin missā pu si Musa saguwaꞌ bang aꞌa miyaꞌan, gaꞌi bisan kataꞌuhan kami bang amban iye.”
[30] Nambung aꞌa bakas mapessekin, paꞌinne, “Ulaliꞌ ku si kaꞌam. Gaꞌi kataꞌuhanbi bang amban iye bu iye makapakite akuhin.
[31] Kataꞌuhante bi weꞌ gaꞌi pakale Tuhanin aꞌa dusehanin. Iye pinakale Tuhanin magmātabat si iyehin duk maghinang meꞌ kinabayaꞌannen.
[32] Kemuwe tagnaꞌ dunyahin, gaꞌ bakas takale weꞌ niyaꞌ makapakite aꞌa pessek amban dem betteng.
[33] Bang aꞌa miyaꞌan dumaꞌin amban Tuhan, bugtuꞌ gaꞌi iye kapaghinang meꞌ hinangan kuweꞌ inin.”
[34] Jinampa iye weꞌ de, paꞌinde, “Weꞌey? Toloꞌannu pe kami? Bu kaꞌu iyan, amban dem betteng pe, andang ne kew taga duse.” Manjari pinaluwas iye weꞌ meꞌ nakuraꞌ miyaꞌan amban dem langgal.
[35] Pagkale si Isa weꞌ pinaluwas weꞌ meꞌ nakuraꞌin aꞌa bakas mapessekin, magtawus si Isa pī si iye. Pagtakasuwaꞌne, paꞌinne si aꞌahin, “Kahagad ke kew si aꞌa inēnan Anak Manusiyaꞌin?”
[36] Nambung aꞌahin, paꞌinne, “Sine teꞌ iye, Tuwan? Akahanun ku duk ku kahagad si iye.”
[37] Paꞌin si Isa si iye, “Takitenu ne iye. Duk iye ne mamissā si kaꞌu inin.”
[38] Magtawus aꞌahin pasujud pu si Isa duk paꞌinne, “O Tuwan, kahagad ku si kaꞌu.”
[39] Paꞌin si Isa, “Hangkan ku pitu si dunya, supaya pinagsapeꞌ meꞌ aꞌahin. Meꞌ aꞌa dalil mapessekin, peggeꞌ gaꞌi kataꞌuhande mabennal sabab Tuhanin, ngite du. Duk meꞌ aꞌa magpaꞌinin weꞌ ngite siye, peggeꞌ kannalde kataꞌuhande mabennal sabab Tuhanin, ngapessek du.”
[40] Takale pinaꞌin si Isa inin weꞌ meꞌ Pariseo sinduwe malaꞌihin duk paꞌinde si iye, “Ine pinaꞌinnu miyaꞌan? Weꞌ pessek isab kami? Ngite kami inin.”
[41] Paꞌin si Isa si siye, “Bang kaꞌam pessek, hātinen gaꞌ teꞌed kataꞌuhanbi mabennalin, gaꞌ ne niyaꞌ dusebi. Saguwaꞌ peggeꞌ paꞌinbi ngite du kaꞌam, hātinen kataꞌuhanbi du mabennalin, taga duse pe kaꞌam, peggeꞌ gaꞌi tuhutbi mabennalin.”