[1] Pagpuwas bang piyem bahangi, pakite ne isab si Isa balik si meꞌ tindegnen laꞌi si higad lamew Tiberi. Sa inin pagpakitene dinen si siye.
[2] Si Simon Petros laꞌi miyaꞌan magtuhut duk si Tomas, inēnande si Kambalin duk si Natanael, aꞌa amban Kana laꞌi si lahat Jalilin. Laꞌi du isab nuhut siye meꞌ anak si Sebedehin duk duwangan pe meꞌ tindeg si Isa seddili.
[3] Paꞌin si Simon Petros, “Tiyaꞌ ku pī magpokot.” “Nuhut kami,” paꞌin meꞌ sinduwehin. Manjari pī ne siye duk pasakey siye si bangkaꞌ. Saguwaꞌ kellawan miyaꞌan gaꞌ niyaꞌ kenna taꞌeddoꞌde.
[4] Pagkellat mata ellewin, laꞌi si Isa nengge-nengge si higad saguwaꞌ gaꞌ iye takilale weꞌ meꞌ tindegnen.
[5] Ngalingan iye pī si siye, paꞌinne, “Meꞌ bagay, gaꞌ ke niyaꞌ taꞌeddoꞌbi?” “Gaꞌ,” paꞌinde.
[6] Paꞌin si Isa, “Teppadanun bi pokotbin luꞌu si pakanawanan bangkaꞌbin duk kaꞌam makaꞌeddoꞌ.” Hangkan tineppadan weꞌ de pokotden. Gaꞌ takoleꞌde ngonot pokotin pī dem bangkaꞌ hawal ekka kenna taꞌeddoꞌden.
[7] Manjari paꞌin tindeg kinalasahan si Isahin pu si Petros, “Panuhutanin hep īꞌ.” Pagkale si Simon Petros inin, inasek weꞌ ne badjuꞌnen peggeꞌ bakas magluwas iye, bu patugpaꞌ iye dem lamew hap pī pu si Isa.
[8] Meꞌ sinduwehin musey tudju higad ngangguyud pokot pennoꞌ weꞌ kennahin. Tapit du siye si higad, niyaꞌ du meꞌ limempūꞌ deppe talanen.
[9] Pagduwaꞌide si higad, ngite siye kenna tinunuꞌ diyataꞌ bale duk niyaꞌ pan isab.
[10] Paꞌin si Isa si siye, “Boꞌohanun bi ku pitu kenna taꞌeddoꞌbin.”
[11] Hangkan pī si Simon Petros dem bangkaꞌ bu ilalas weꞌ ne pokotin pī si higad. Pennoꞌ pokotin weꞌ kenna hadje, dahatus duk limempuk-tellu ekkahannen. Saguwaꞌ pokotin gaꞌ garet bisan du ekka teꞌed isinen.
[12] Manjari paꞌin si Isa si siye, “Dayiꞌ kaꞌam pitu mangan.” Gaꞌ niyaꞌ meꞌ tindegnen makatawakkal nilew iye bang sine iye, peggeꞌ kataꞌuhande du weꞌ iye Panuhutanden.
[13] Pī si Isa ngeddoꞌ panin duk kennahin duk pinangurung weꞌ ne si siye.
[14] Kamintellune ne inin si Isa pakite si meꞌ tindegnen kemuwe pinakellum iye balik amban kamateynen.
[15] Pagubus siye mangan, paꞌin si Isa pu si Simon Petros, “Simon, anak si Yahiya, hadje ke lasanu si akuhin amban lasa meꞌ saweꞌnu inin?” “Aweꞌ, Tuwan,” paꞌinne, “kataꞌuhannu weꞌ malasa ku si kaꞌu.” Paꞌin si Isa, “Na, ipatun meꞌ aꞌa sukuꞌ si akuhin, kuweꞌ pastul ngipat meꞌ anak bili-bilinen.”
[16] Tinilew iye weꞌ si Isa kaminduwenen, paꞌinne, “Simon, anak si Yahiya, malasa ke kew si aku?” “Aweꞌ, Tuwan,” paꞌinne, “kataꞌuhannu weꞌ malasa ku si kaꞌu.” Paꞌin si Isa si iye, “Na, pastulanun meꞌ bili-bilikun, hātinen meꞌ aꞌa sukuꞌ si akuhin.”
[17] Kamintellunen tilew si Isa iye, paꞌinne, “Simon, anak si Yahiya, malasa ke kew si aku?” Dukka si Petros peggeꞌ tinilew pe iye weꞌ si Isa kamintellunen, “Malasa ke kew si aku?” Nambung si Petros, paꞌinne, “Tuwan, kataꞌuhannu kēmon-kēmonin. Kataꞌuhannu weꞌ malasa ku si kaꞌu.” Paꞌin si Isa, “Na, ipatun meꞌ bili-bilikun, hātinen meꞌ aꞌa sukuꞌ si akuhin.
[18] Sabennal akahante kew,” paꞌin si Isa, “kabataꞌnun nemmekan kew dinu, duk lumengngan kew tungan-tungan kabayaꞌannu. Saguwaꞌ bang bahiꞌ ne kew, padeppe du kew duk seddili masemmekan kaꞌuhin duk boꞌone kew pī si antag gaꞌi kabayaꞌannu papīhan.”
[19] Paꞌin si Isa inin pangakane bang saꞌingge pamapatey si Petrosin supaya tapudji Tuhanin. Duk paꞌin si Isa pe si iye, “Nuhut kew aku.”
[20] Manjari pahaleng si Petros duk kitene paturul tindeg kinalasahan si Isahin. Iye hep miyaꞌan mapatapit pu si Isa sasangde mamangan sangemin duk manilew si Isahin, paꞌinne, “Tuwan, sine teꞌ sōng mamuddihan kaꞌuhin?”
[21] Pagkite si Petros tindeg si Isa dambuwaꞌ inin, paꞌinne pu si Isa, “Tuwan, saꞌingge isab iye miyaꞌan?”
[22] Paꞌin si Isa pu si Petros, “Bang saꞌupama kabayaꞌankun weꞌ ellum iye sampay balik ku si dunya, gaꞌ niyaꞌ lamudnu. Nuhut kew hadja aku.”
[23] Manjari bawag suwi-suwihin pī si meꞌ katindegan si Isahin weꞌ tindegne dambuwaꞌ inin gaꞌi matey. Bu paꞌin, gaꞌ hep si Isa magpaꞌin weꞌ gaꞌi iye matey. Iye hadja pinaꞌinnen, weꞌ bang saꞌupama kabayaꞌannen weꞌ tindegne inin ellum sampay balik iye pitu si dunya, gaꞌ niyaꞌ lamud si Petros.
[24] Tindeg si Isa sinuwi-suwi inin, iye ne inin magaka-aka sabab meꞌ malumabey inin, duk iye isab manulat inin kēmon. Duk kataꞌuhan kami weꞌ asal toꞌo meꞌ inakanen.
[25] Ekka pe teꞌed meꞌ hinang seddili bakas tahinang si Isa gaꞌ tasulat. Bang sinulat kēmon dem kitab, kumpasku gaꞌi siguwe tuꞌu si dunya kēmon kitab subey sinulatin.