[1] Paꞌin si Isa si meꞌ tindegnen, “Inaka weꞌ ku kēmon inin si kaꞌam, supaya gaꞌi usaꞌ sandelbi si akuhin.
[2] Niyaꞌ iyan waktu si sinōng, gaꞌi ne kaꞌam paꞌasek meꞌ nakuraꞌ āgamahin dem langgalde. Duk tekka du waktuhin, bang niyaꞌ mapatey kaꞌam, kannalanne weꞌ hininangne inin kinabayaꞌan Tuhanin.
[3] Hinangde inin si kaꞌam peggeꞌ gaꞌi kataꞌuhande Samakun atawa aku.
[4] Saguwaꞌ akahante kaꞌam inin supaya bang ne tekka meꞌ kabinasahan inin si kaꞌam, taꞌessebbi du weꞌ bakas kaꞌakahante kaꞌam andang sabab inin.” “Gaꞌ kaꞌam akahanku inin tagnaꞌ, peggeꞌ tuꞌu pe ku si kaꞌam.
[5] Saguwaꞌ kuweꞌitu akahante ne kaꞌam peggeꞌ sōng tahalaꞌ ne ku, pī balik si mamapitu akuhin. Bu gaꞌ niyaꞌ kaꞌam nilew aku bang tunganku.
[6] Dukka teꞌed ateybin kuweꞌitu sabab bakas inakaku si kaꞌam miyaꞌan.
[7] Saguwaꞌ akahante kaꞌam mabennalin, si kahāpanbi du bang ku tahalaꞌ. Peggeꞌ bang upama gaꞌi ku tahalaꞌ, gaꞌi pitu si kaꞌam pananabangin. Saguwaꞌ bang ku tahalaꞌ, papituku du iye si kaꞌam.
[8] Pagtuꞌu ne si kaꞌam pananabangin, pahātihanne du si meꞌ manusiyaꞌ si dunyahin hāti dusehin duk hāti mabentelin duk hāti hukuman Tuhanin.
[9] Papastiꞌne si siye weꞌ dusehan siye, peggeꞌ gaꞌi siye kahagad si aku.
[10] Papastiꞌne si siye weꞌ bentel ku, peggeꞌ tapī ne ku si Samakun duk gaꞌi ne ku takitebi.
[11] Papastiꞌne si siye hukuman Tuhanin, peggeꞌ tahukum ne nakuraꞌ seyitan magnakuraꞌ tuꞌu si dunyahin.
[12] “Ekka pe akaku si kaꞌam,” paꞌin si Isa, “saguwaꞌ gaꞌi takoleꞌbi bang kuweꞌitu.
[13] Pagtekka pitu Niyawa Tuhanin, iye mamagaka mabennalin, panoloꞌanne du kaꞌam kēmon panoloꞌ mabennalin. Gaꞌi iye magtoloꞌ amban di pikilanne saguwaꞌ ine-ine takalene amban Tuhanin, iye miyaꞌan panoloꞌnen. Duk akahanne du kaꞌam bang ine maꞌumantag si sinōngin.
[14] Pahadje Niyawa Tuhanin du ku, peggeꞌ kēmon inakahanne kaꞌamin asal amban aku du.
[15] Ine-ine si Samakun, si aku du, hangkan hep paꞌinku si kaꞌam weꞌ kēmon inakahan Niyawa Tuhan kaꞌamin amban aku du.”
[16] Paꞌin si Isa, “Gaꞌi ne tiggel, gaꞌi ne ku kitebi. Saguwaꞌ ubus miyaꞌan, gaꞌi tiggel kitebi du ku balik.”
[17] Magbissā-bissā sinduwe meꞌ tindeg si Isahin, paꞌinde, “Ine enteꞌ hāti pinaꞌinne inin, ‘Gaꞌi tiggel gaꞌi ne ku kitebi, ubus miyaꞌan gaꞌi tiggel kitebi du ku balik?’ Duk iye isab pinaꞌinne, ‘Peggeꞌ pī ku si Samakun?’
[18] Ine hatu hāti ‘gaꞌi ne tiggel’ pinaꞌinne inin? Gaꞌi kataꞌuhante bi bang ine hāti pinaꞌinnen.”
[19] Kataꞌuhan si Isa weꞌ bayaꞌ iye tilew meꞌ tindegnen bang ine hāti pinaꞌinnen. Hangkan paꞌin si Isa si siye, “Ensiniꞌ paꞌinku, ‘Gaꞌi ne tiggel gaꞌi ne ku kitebi, ubus miyaꞌan gaꞌi du tiggel, kitebi du ku balik.’ Magtilew-tilew ke kaꞌam bang ine hāti pinaꞌinku inin?
[20] Sabennal akahante kaꞌam, magtangis kaꞌam iyan duk magsugul, saguwaꞌ meꞌ aꞌa manggaꞌi manuhut Tuhanin magkēg-kēg. Suse du kaꞌam iyan saguwaꞌ ginantiꞌan du iyan duk kēg.
[21] Dalilnen kuweꞌ dende nganak. Suse iye peggeꞌ tekka ne panganaknen. Saguwaꞌ pag si luwasan ne anaknen, gaꞌi ne taꞌessebne peddiꞌ talabeynen hawal kēgnen weꞌ niyaꞌ nakanak palahil si dunya.
[22] Damikkiyan isab kaꞌam, kuweꞌitu suse kaꞌam. Saguwaꞌ magkite du kite bi balik. Manjari asal kēgan du teꞌed kaꞌam iyan, duk kēgbi iyan gaꞌ niyaꞌ makaꞌānanne amban dem ateybi.
[23] Pagtekka ellew pagkiteten bi balik, gaꞌ ne niyaꞌ tilewbi ine-ine amban aku. Sabennal akahante kaꞌam, ine-ine pākubi si Samakun peggeꞌ sandel kaꞌam si aku, duhulanne du kaꞌam.
[24] Kemuwe tagnaꞌley sampay kuweꞌitu gaꞌ niyaꞌ bakas pākubi sabab sandelbi si akuhin. Māku ne kaꞌam ubus bu inurungan du kaꞌam supaya jukup kēgbin.”
[25] Paꞌin si Isa si siye, “Meꞌ panoloꞌku si kaꞌam inin si dalilan, saguwaꞌ tekka du iyan ellewin gaꞌi ne ku magdalilan si kaꞌam, duk akahanku ne kaꞌam pabentel sabab Samakun.
[26] Pagtekka ellew miyaꞌan, bang niyaꞌ pākubi, kaꞌam ne mamāku amban Samakun peggeꞌ sandel kaꞌam si aku. Dumaꞌin ne aku mamāku para si kaꞌamin,
[27] peggeꞌ Samakun malasa du si kaꞌam. Kalasahanne kaꞌam peggeꞌ malasa kaꞌam si aku duk peggeꞌ kahagadbi du weꞌ pitu ku amban Tuhan.
[28] Aweꞌ, pitu ku amban Samaku Tuhanin si dunya. Duk kuweꞌitu ambananku ne dunya inin duk balik ne ku pī si Samakun.”
[29] Paꞌin meꞌ tindegnen si iye, “Kuweꞌitu bentel ne pamissānun. Dumaꞌin ne inin dalilan.
[30] Kabugtuꞌan kami ne kuweꞌitu weꞌ kataꞌuhannu kēmon-kēmonin bisan kew gaꞌi tinilew. Hangkan kahagad ne teꞌed kami weꞌ amban Tuhan kew.”
[31] Paꞌin si Isa si siye, “Asal kahagad ne ke teꞌed kaꞌam kuweꞌitu?
[32] Tekka du waktuhin gaꞌi ne teꞌed tiggel, magsapeꞌ-sapeꞌ du kaꞌam iyan, hap lumaꞌne ne dangan-dangan duk ambananbi ku dendangan. Saguwaꞌ iye matoꞌohin, dumaꞌin du ku dendangan peggeꞌ Samakun teteg du tuꞌu si aku.
[33] Kēmon inin inaka weꞌ ku si kaꞌam supaya sanyang dem ateybin. Hangkan sanyang dem ateybin, peggeꞌ magdambuwaꞌ kaꞌam duk aku. Tuꞌu si dunya inin, bininasa du kaꞌam weꞌ meꞌ aꞌa manggaꞌi manuhut Tuhanin. Saguwaꞌ daꞌa kaꞌam tinalew. Daꞌag ne du nakuraꞌden weꞌ ku.”