[1] Saguwaꞌ si Isa hap pī pataked si kūd Jaitun.
[2] Subu-subu pe pagsasumuhin, pī iye balik si langgal hadjehin. Banes aꞌa patipun pī si iye ubus ningkoloꞌ iye magtoloꞌ si siye.
[3] Manjari niyaꞌ dambuwaꞌ dende binoꞌo weꞌ meꞌ Pariseohin duk meꞌ guru si saraꞌ āgamahin pī pu si Isa. Dende inin bakas tasaꞌut magjina. Pinaharap iye weꞌ de si meꞌ aꞌa maꞌekkahin.
[4] Paꞌinde pu si Isa, “Tuwan, dende inin bakas tasaꞌut magjina.
[5] Na, bang dem saraꞌ si Musa inambananne si kitehin bi, hukuman si meꞌ dende kuweꞌ inin, subey siye tinumbuk duk batu sampay matey. Na, bang kaꞌu, ine paꞌinnu?”
[6] Bissāde inin panguhi-nguhide si Isa kaw salaꞌ panambungnen, manjari niyaꞌ jān panuntutande iye. Saguwaꞌ patondok si Isa duk nulat iye duk timbōꞌne diyataꞌ bulak.
[7] Pagtinilew ne isab iye weꞌ de, patongas iye duk paꞌinne si siye, “Sine-sine kaꞌam gaꞌ niyaꞌ dusene, ambat iye dehellu numbuk dende inin duk batu.”
[8] Manjari patondok iye balik duk nulat ne isab iye duk timbōꞌne diyataꞌ bulak.
[9] Pagkalede pinaꞌin si Isa inin, tahalaꞌ siye dangan-dangan tinagnaꞌan amban mabahiꞌin, duk taꞌamban si Isa duk dendehin laꞌi si panenggehannen.
[10] Pagtongas si Isa balik, paꞌinne si dendehin, “Dende, antag ne siye? Gaꞌ ke niyaꞌ bisan dangan taꞌamban numbuk kaꞌu duk batu?”
[11] “Gaꞌ niyaꞌ, Tuwan,” iye helling dendehin. Paꞌin si Isa, “Bisan aku gaꞌi du kew laboꞌanku hukuman pinapatey. Hap lumaꞌ ne kew saguwaꞌ daꞌa ne kew magduse balik.”
[12] Puwas miyaꞌan, missā si Isa balik si meꞌ Pariseohin. Paꞌinne, “Aku inin dantaꞌ mangurung dantaꞌ dem pikilan manusiyaꞌin. Sine-sine nuhut aku, salama-lama gaꞌi ne teꞌed iye lumengngan dem lindem, peggeꞌ laꞌi dem pikilanne dantaꞌ makapakellum manusiyaꞌin.”
[13] Paꞌin meꞌ Pariseohin pu si Isa, “Naksiꞌan kew di nu. Bang aꞌahin naksiꞌan dine, gaꞌ niyaꞌ kahagad si iye.”
[14] Nambung si Isa, paꞌinne, “Bisan ku naksiꞌan diku, toꞌo panaksiꞌkun peggeꞌ kataꞌuhanku bang amban ku duk bang tungan ku. Saguwaꞌ kaꞌam, gaꞌi kataꞌuhanbi bang amban ku duk bang tungan ku.
[15] Kaꞌam, bang kaꞌam ngahukum aꞌa, iye tinuhutbin pikilan manusiyaꞌ hadja. Aku,” paꞌin si Isa, “gaꞌi ku ngahukum aꞌa.
[16] Saguwaꞌ bang saꞌupama aku mangahukumin, bentel hukumankun peggeꞌ dumaꞌin aku dendangan mangahukumin saguwaꞌ duwangan kami duk Samakun, Samaku mamapitu akuhin.
[17] Tasulat dem saraꞌbi,” paꞌin Si Isa, “bang duwe aꞌa saliꞌ panaksiꞌden, toꞌo pinaꞌinden.
[18] Na, bennal bissākun. Niyaꞌ duwe saksiꞌku. Aku naksiꞌan dikun duk Samaku mamapitu akuhin naksiꞌan aku du isab.”
[19] Tinilew si Isa weꞌ meꞌ Pariseohin, paꞌinde, “Antag samanun?” Nambung si Isa, paꞌinne, “Gaꞌi kataꞌuhanbi Samakun, duk aku, gaꞌi du ku isab kataꞌuhanbi. Peggeꞌ bang ku miyaꞌan kataꞌuhanbi, kataꞌuhanbi du isab Samakun.”
[20] Binissā inin weꞌ si Isa sasangne magtoloꞌ dem langgal hadjehin, laꞌi si antag pamettadan meꞌ kahun pangalaboꞌ-laboꞌande pariyahin. Saguwaꞌ gaꞌ niyaꞌ niggew iye peggeꞌ gaꞌ pe taꞌabut gantaꞌnen.
[21] Manjari binalik weꞌ si Isa bakas pinaꞌinne si meꞌ aꞌahin, paꞌinne, “Sōng tahalaꞌ ne ku. Pihabi du ku iyan saguwaꞌ gaꞌi ku takasuwaꞌbi. Matey hadja kaꞌam moꞌo dusebin. Gaꞌi kaꞌam tapī si papihankun.”
[22] Hangkan magtilew-tinilew meꞌ nakuraꞌ Yahudihin, paꞌinde, “Ine hāti binissāne miyaꞌan weꞌ gaꞌi koꞌ kite tapī si papīhannen? Papateyne enteꞌ dinen?”
[23] Paꞌin si Isa pe, “Kaꞌam iyan aꞌa dunya du, bu aku inin surgaꞌ lahatkun. Kēmon pikilanbin amban dunya hadja, bu pikilankun dumaꞌin.
[24] Hangkan hep kaꞌam akahanku weꞌ matey du kaꞌam moꞌo dusebin. Peggeꞌ bang gaꞌi kahagadbi pinaꞌinku sabab dikun, asal matey kaꞌam moꞌo dusebin.”
[25] “Sine teꞌ kew teꞌed?” paꞌinde. Paꞌin si Isa, “Bakas akahante ne kaꞌam kemuwe tagnaꞌ.
[26] Ekka pe makajari paꞌinku sabab addatbin,” paꞌin si Isa. “Duk ekka pe dusebi laboꞌanku hukuman. Saguwaꞌ iye hadja inakaku tuꞌu si dunya inin, meꞌ bakas inaka si aku weꞌ mamapitu akuhin. Duk kēmon inakanen bennal,” paꞌin si Isa.
[27] Saguwaꞌ gaꞌ tahātide weꞌ binissā si Isa miyaꞌan sabab Tuhanin, Samanen.
[28] Hangkan paꞌin si Isa si siye, “Bang ne bakas dangkatbi Anak Manusiyaꞌin diyataꞌ olom, meke ne kataꞌuhanbi weꞌ aku ne iye pinaꞌinkun. Duk kataꞌuhanbi du isab iyan weꞌ gaꞌ niyaꞌ hinangku bang baran-baranku hadja duk kēmon panoloꞌkun, iye hadja pangandaꞌakan Samaku akuhin.
[29] Tattap tuꞌu si aku mamapitu akuhin. Gaꞌi ku pasagadanne peggeꞌ luwal hinangku kinabayaꞌannen.”
[30] Pagkalede pinaꞌin si Isa miyaꞌan, ekka meꞌ aꞌahin sandel si iye.
[31] Manjari missā si Isa si meꞌ Yahudi mapadūs si bissānen, paꞌinne, “Bang kaꞌam matuyuꞌ nuhut panoloꞌku si kaꞌamin, bennal kaꞌam tindegku.
[32] Duk kataꞌuhanbi du iyan bang ine mabennal amban Tuhanin. Duk mabennal inin iye mamaluwas kaꞌamin amban pamanyagaꞌan kaꞌamin.”
[33] Nambung siye paꞌinde, “Oy, kami inin meꞌ tubuꞌ Ibrahim. Gaꞌ kami bakas tabanyagaꞌ weꞌ sine-sine. Weꞌey kew magpaꞌin weꞌ lumuwas du kami amban pamanyagaꞌan kamihin?”
[34] Sambungan si Isa siye, paꞌinne, “Akahante kaꞌam matoꞌohin, sasuku magduse, binanyagaꞌ siye weꞌ napsude magdusehin.
[35] Banyagaꞌ aꞌahin gaꞌi teteg si aꞌahin. Iye mateteg si iyehin anaknen.
[36] Hangkan bang Anak Tuhanin mamaluwas kaꞌamin, bugtuꞌ teꞌed kaꞌam lumuwas.
[37] Kataꞌuhanku weꞌ kaꞌam iyan meꞌ tubuꞌ Ibrahim. Saguwaꞌ batang ku papateybi peggeꞌ gaꞌi tatayimaꞌbi panoloꞌkun.
[38] Meꞌ panoloꞌku si kaꞌam inin takaleku amban Samakun saguwaꞌ kaꞌam, hininang weꞌ bi meꞌ takalebi amban samabin.”
[39] Paꞌin meꞌ Yahudihin, “Sama kamihin Ibrahim.” Paꞌin si Isa, “Bang kaꞌam bennal meꞌ tubuꞌ Ibrahim, neppu siꞌ kaꞌam Ibrahim si meꞌ hinangannen.
[40] Saguwaꞌ kaꞌam iyan, batang ku papateybi sewukat ne kaꞌam bakas akahanku mabennal takaleku amban Tuhanin. Gaꞌ Ibrahim bakas maghinangan kuweꞌ iyan.
[41] Meꞌ hinanganbin saliꞌ duk hinangan samabin.” Magtawus meꞌ aꞌa miyaꞌan nambung, paꞌinde, “Oy, dambuwaꞌ-buwaꞌ du sama kamihin, Tuhanin. Duk kami inin bennal meꞌ anakne.”
[42] Paꞌin si Isa si siye, “Bang bennal Tuhanin samabin, kalasahanbi siꞌ ku peggeꞌ aku amban Tuhanin hangkan ne ku tuꞌu. Gaꞌ ku pitu amban bayaꞌku saguwaꞌ pinapitu ku weꞌ Tuhanin.
[43] Weꞌey teꞌ gaꞌi tahātibi binissākun? Hangkan gaꞌi tahātibi peggeꞌ gaꞌi tasandalbi makale binissākun.”
[44] Paꞌin si Isa pe si meꞌ aꞌa miyaꞌan, “Kaꞌam, samabin nakuraꞌ seyitanin duk iye kabayaꞌanbi tinuhutin meꞌ kinabayaꞌan samabin. Kemuwe amban tagnaꞌ asal be-papatey iye. Gaꞌ iye bakas nuhut mabennalin peggeꞌ gaꞌ niyaꞌ bennal laꞌi si iye. Iye bahannen, magdustaꞌ peggeꞌ inin addatnen. Dustaꞌan teꞌed iye duk iye poꞌon dustaꞌin kēmon.
[45] Saguwaꞌ aku, bennal hadja meꞌ bissākun hangkan gaꞌi ku kahagadbi.
[46] Gaꞌ niyaꞌ kaꞌam makapagpaꞌin weꞌ dusehan ku; kēmon binissākun bennal. Weꞌey pe ku gaꞌi kahagadbi?
[47] Bang aꞌahin sukuꞌ si Tuhan, pakalene toloꞌ Tuhanin. Saguwaꞌ kaꞌam dumaꞌin kaꞌam sukuꞌ si Tuhan, hangkan hep gaꞌi kaꞌam mabayaꞌ pakale.”
[48] Sinambungan si Isa weꞌ meꞌ Yahudihin, paꞌinde, “Tewwaꞌ teꞌed pinaꞌin kamihin weꞌ dumaꞌin kew iyan bennal aꞌa Israꞌil. Aꞌa Samariya kew duk pasayedan seyitan kew.”
[49] “Gaꞌ ku ituꞌ pasayedan seyitan,” paꞌin si Isa. “Pinahadje weꞌ ku Samakun saguwaꞌ bissā-bissāhanbi ku.
[50] Dumaꞌin inapaskun weꞌ pinahadje ku. Niyaꞌ seddili makapikilne mahadje aku duk iye mangahukumin.
[51] Sabennal akahante kaꞌam,” paꞌin si Isa, “sine-sine nuhut panoloꞌkun, gaꞌi teꞌed matey salama-lama.”
[52] Paꞌinde si iye, “Na, kabugtuꞌan kami ne teꞌed weꞌ pasayedan seyitan kew. Bisan Apuꞌ Ibrahim duk meꞌ kanabihanin kēmon matey du. Hatiꞌ paꞌinnu weꞌ gaꞌi teꞌed matey salama-lama sasuku manuhut panoloꞌnun.
[53] Weꞌey, balakatan pe kew amban papuꞌ kamihin, Ibrahim? Bisan meꞌ kanabi-nabihanin kēmon duk bisan Apuꞌ Ibrahim matey du. Weꞌ sine teꞌ kew?”
[54] Nambung si Isa, paꞌinne, “Bang saꞌupama pahadjeku dikun, gaꞌ niyaꞌ kagunahan pamahadjeku miyaꞌan. Iye mahadje akuhin Samakun, iye ne pinaꞌinbi Tuhanbin.
[55] Gaꞌi bisan kataꞌuhanbi Tuhanin. Saguwaꞌ aku, kataꞌuhanku iye. Bang saꞌupama paꞌinku weꞌ gaꞌi Tuhanin kataꞌuhanku, na kuweꞌ ne ku kaꞌamin dustaꞌan. Saguwaꞌ asal kataꞌuhanku teꞌed Tuhanin duk tuhutku teꞌed kēmon pangandaꞌakannen.
[56] Papuꞌbin Ibrahim magkēg peggeꞌ kataꞌuhanne niyaꞌ waktu si pasōngan, kitene du ku pitu si dunya. Manjari pagkitene papitukun kēgan iye.”
[57] Nambung siye, paꞌinde, “Saꞌingge pagkitebi duk Ibrahimin? Gaꞌ pe hatiꞌ bisan limempūꞌ tahun umulnun.”
[58] Paꞌin si Isa si siye, “Akahante kaꞌam matoꞌohin, gaꞌ pe Ibrahim inanakan, andang ne ku.”
[59] Manjari meꞌ Yahudi miyaꞌan nimuk batu panibagde si Isa. Saguwaꞌ paꞌellig si Isa duk paluwas iye amban dem langgal hadjehin.