[1] Gaꞌ pe tinagnaꞌan pagjamu-jamuhin, andang ne kataꞌuhan si Isa weꞌ tekka ne gantaꞌannen duk subey ne ambananne dunya inin duk balik pī si Samanen. Asal amban tagnaꞌ kinalasahan weꞌ si Isa meꞌ aꞌa sukuꞌ si iyehin, duk kuweꞌitu pakitehanne du si siye bang saꞌingge hadje lasane si siyehin.
[2] Manjari pagsangem, magkakan disi Isa duk meꞌ tindegnen. Si Judas, anak si Simon Iskariyotin, bakas ne kaꞌurungan pikilan weꞌ seyitan nakuraꞌin muddihan si Isa.
[3] Asal du kataꞌuhan si Isa weꞌ kēmon kapatut Tuhanin tapangurung ne si iye. Duk kataꞌuhanne weꞌ pitu iye amban Tuhan duk balik du iye pī si Tuhan.
[4] Manjari kuwat si Isa amban pagkakananden, bu iluwasan weꞌ ne da lapis badjuꞌnen duk magdikat iye duk tuwaliya.
[5] Manjari ngisi iye boheꞌ dem palanggana duk kinosoꞌan weꞌ ne bettis meꞌ tindegnen duk pinunasan weꞌ ne duk tuwaliya pagdikatnen.
[6] Pagpīne pu si Simon Petros, paꞌin si Petros si iye, “Kaꞌu, Tuwan, sōng kosoꞌannu ke meꞌ bettisku inin?”
[7] Sambungan si Isa iye, paꞌinne, “Gaꞌi tahātinu kuweꞌitu bang ine hininangku inin, saguwaꞌ tahātinu iyan si ellew sinōng.”
[8] Paꞌin si Petros, “Gaꞌi teꞌed pakosoꞌku si kaꞌu bettiskun.” “Bang gaꞌi kosoꞌanku bettisnun,” paꞌin si Isa, “dumaꞌin ne kew tindegku.”
[9] Manjari paꞌin Simon Petros si iye, “O Tuwan, bang kuweꞌ iyan, dumaꞌin hadja bettiskun saguwaꞌ sampay meꞌ tangankun duk kōkkun kosoꞌanun isab.”
[10] Paꞌin si Isa si iye, “Aꞌa bakas mamandihin, gī ne barannen. Luwal hadja bettisnen subey kinosoꞌan balik. Kēmon kaꞌam sutsi ne dem ateybin, luwal dangan manggaꞌi masutsi ateynen.”
[11] Andang ne hep kataꞌuhan si Isa bang sine sōng mamuddihan iyehin hangkan paꞌinne, “Kēmon kaꞌam sutsi ne dem ateybin, luwal dangan manggaꞌi masutsi ateynen.”
[12] Pagubus ne kosoꞌan si Isa bettis meꞌ tindegnen, inasek weꞌ ne badjuꞌnen bu ningkoloꞌ balik. Paꞌinne si meꞌ tindegnen, “Tahātibi ke bang ine bakas hininangku si kaꞌam miyaꞌan?
[13] Pangēnbi akuhin ‘Guru’ duk ‘Panuhutan.’ Patut teꞌed, peggeꞌ aku asal gurubi duk panuhutanbi.
[14] Na, bang aku panuhutanbin duk gurubin ngosoꞌan bettisbin, subey ku lekkatbi. Subey kaꞌam magkosoꞌ-kinosoꞌ bettis.
[15] Hininangku miyaꞌan pinakitehan weꞌ ku si kaꞌam supaya niyaꞌ pamintanganbi weꞌ subey diyawaꞌ ateybin. Subey lekkatbi hininangku si kaꞌamin.
[16] Sabennal akahante kaꞌam weꞌ banyagaꞌin gaꞌi langkew amban amunen. Duk dinaꞌakin gaꞌi langkew amban mangandaꞌak iyehin.
[17] Kuweꞌitu tahātibi ne panoloꞌku si kaꞌam inin. Bang tuhutbi inin, kēgan kaꞌam.”
[18] Paꞌin si Isa, “Dumaꞌin ku missā sabab kaꞌam kēmon. Kataꞌuhanku bang sine meꞌ aꞌa bakas tapeneꞌku manuhut akuhin. Saguwaꞌ subey du tuman pinaꞌin dem kitabin, pinaꞌin laꞌi, ‘Binuddihan ku weꞌ dambuwaꞌ saweꞌku magsawu manganin.’
[19] Akahante kaꞌam inin kuweꞌitu pādpād gaꞌ pe umantag supaya bang umantag ne, kahagadbi du bakas pinaꞌinku sabab dikun, bang sine ku.
[20] Sabennal akahante kaꞌam,” paꞌin si Isa, “weꞌ sine-sine ngaddatan aꞌa dinaꞌakkun, kuweꞌ du aku inaddatannen. Duk sine-sine ngaddatan aku, kuweꞌ du inaddatan weꞌ ne bakas mamapitu akuhin.”
[21] Pagubus inin bissā si Isa, suse teꞌed dem ateynen duk paꞌinne si meꞌ tindegnen, “Sabennal akahante kaꞌam, dangan kaꞌam muddihan aku du.”
[22] Magpayam meꞌ tindegnen. Gaꞌi kataꞌuhande bang sine binissāhannen.
[23] Dangan meꞌ tindeg si Isahin, iye kinalasahannen, ningkoloꞌ si bihingne.
[24] Sininyasan iye weꞌ Simon Petros duk paꞌinne si iye, “Tilewun be si Isa bang sine binissāhannen.”
[25] Manjari tindeg si Isa miyaꞌan patapit pu si Isa nilew iye, paꞌinne, “Tuwan, sine teꞌ sōng mamuddihan kaꞌuhin?”
[26] Nambung si Isa, paꞌinne, “Aꞌa pangurunganku pan inin pagubus lebbaganku dem pinggan, iye ne miyaꞌan.” Manjari ilebbagan weꞌ si Isa panin ubus bu pinangurung weꞌ ne pu si Judas, anak si Simon Iskariyotin.
[27] Pageddoꞌ si Judas panin, magtawus paꞌasek nakuraꞌ seyitanin dem pikilanne. Paꞌin si Isa si iye, “Hinangun ne padayiꞌ sōng hininangnun.”
[28] Gaꞌ niyaꞌ bisan dangan meꞌ tindegnen makahāti bang ine pinaꞌin si Isa pu si Judas miyaꞌan.
[29] Peggeꞌ si Judas magantan sīnden, kannal meꞌ sinduwehin weꞌ daꞌak si Isa iye pī melli ginunade si pagkādjaꞌanin, atawa dinaꞌak iye magsarakka si meꞌ mamiskinin.
[30] Manjari pagsangka si Judas panin, magtawus iye duwaꞌi. Duk sangem ne miyaꞌan.
[31] Paglumikut ne si Judas, paꞌin si Isa, “Kuweꞌitu pinakitehan ne pamahadje akuhin, aku Anak Manusiyaꞌin. Kuweꞌitu pinakitehan ne balakat Tuhanin sabab aku.
[32] Bang tapakitehan balakat Tuhanin sababku, gaꞌi du tiggel pakitehan Tuhanin isab pamahadjene akuhin, aku Anak Manusiyaꞌin.”
[33] Paꞌin si Isa, “Kaꞌam meꞌ tindegkun, gaꞌi ne ku tiggel tuꞌu si kaꞌam. Pihabi du ku. Saguwaꞌ sa pinaꞌinku si meꞌ nakuraꞌ Yahudihin, paꞌinku si kaꞌam kuweꞌitu, ‘Gaꞌi kaꞌam tapī si papīhankun.’
[34] Niyaꞌ daꞌakan baꞌahu ambananku si kaꞌam. Subey kaꞌam maglasa-ilasa. Maglasa kaꞌam kuweꞌ pangalasaku si kaꞌamin.
[35] Bang kaꞌam maglasa-ilasa, kataꞌuhan meꞌ aꞌahin kēmon weꞌ kaꞌam meꞌ tindegku.”
[36] Paꞌin si Petros pu si Isa, “Tuwan, hap tungan kew?” Nambung si Isa, paꞌinne, “Gaꞌi kew kapanuhut aku kuweꞌitu si papīhankun, saguwaꞌ paturul du kew si sinōng.”
[37] Paꞌin si Petros si iye, “Tuwan, weꞌey ku gaꞌi kapanuhut si kaꞌu kuweꞌitu? Maglillaꞌ ku bisan ku pinapatey bang sababnu.”
[38] Sambungan si Isa iye, paꞌinne, “Asal maglillaꞌ ke kew pinapatey bang sababku? Sabennal akahante kew, gaꞌi pe tingkowak manukin, masuwey ne kew iyan mintellu weꞌ gaꞌi ku kataꞌuhannu.”