[1] Khalaas, Allah gaal le Muusa : «Asmaʼ adiil. Ana nisawwi kalaamak misil kalaam ilaah giddaam al-malik wa Haaruun akhuuk yabga leek misil rasuulak.
[2] Inta tihajji le Haaruun be kulla cheyy al-ana amartak beyah. Wa Haaruun kamaan yihajji le l-malik le yikhalli Bani Israaʼiil yamurgu min baladah.
[3] Wa ana nigawwi raas al-malik wa nikattir alaamaati wa ajaaybi fi balad Masir.
[4] Wa laakin al-malik yaaba ma yasmaʼku. Wa be iidi ana, ninazzil khadabi fi Masir. Wa be ikhaabi al-ajiib, namrug chaʼabi Bani Israaʼiil min Masir hasab majmuuʼaathum.
[5] Wa wakit ana nimidd iidi wa nadrub Masir wa namrug Bani Israaʼiil minha, khalaas al-Masriyiin yaʼarfu kadar ana bas Allah.»
[6] Wa khalaas, Muusa wa Haaruun sawwo kulla cheyy misil Allah amaraahum beyah.
[7] Muusa umrah 80 sana wa Haaruun umrah 83 sana wakit macho hajjo le malik Masir.
[8] Wa Allah gaal le Muusa wa Haaruun :
[9] «Akuun al-malik yuguul leeku : ‹Sawwu giddaami cheyy waahid ajiib.› Khalaas, inta tuguul le Haaruun : ‹Chiil asaatak wa azgulha giddaam al-malik.› Wa l-asa tabga daabi.»
[10] Wa khalaas Muusa wa Haaruun macho le l-malik wa sawwo misil Allah amaraahum beyah. Haaruun zagal asaatah giddaam al-malik maʼa khaddaamiinah wa l-asa bigat daabi.
[11] Wa l-malik naada al-ulama wa l-sahhaariin hana Masir. Humman kula be sihirhum sawwo nafs al-cheyy
[12] wa ayyi waahid minhum zagal asaatah wa isayhum bigo dabiib. Wa laakin asaat Haaruun zaratat isayhum.
[13] Wa be da kula, al-malik raasah bigi gawi wa aba ma simiʼ kalaam Muusa wa Haaruun misil Allah gaalah.
[14] Wa Allah gaal le Muusa : «Al-malik hu raasah gawi ma yidoor yikhalli Bani Israaʼiil yamurgu.
[15] Gumm amchi leyah be fajur wa talgaah maarig maachi ale bahar al-Niil. Wa inta amchi gaabilah fi khachum al-bahar. Wa chiil fi iidak al-asa al-awwal bigat daabi.
[16] Wa guul le l-malik : ‹Allah Rabb al-Ibraaniyiin rassalaani wa hu yuguul leek : “Khalli chaʼabi yamurgu min baladak le yaʼabuduuni fi l-sahara. Laakin daahu ya hassaʼ kula, inta abeet.”
[17] Khalaas, daahu Allah gaal : “Be misil da, inta taʼarif kadar ana bas Allah.” Wa da, wakit ana Muusa nadrub almi bahar al-Niil be l-asa al-fi iidi wa l-almi yabga damm.
[18] Wa huut al-bahar yumuutu wa l-bahar yabga afin wa l-Masriyiin ma yagdaro yacharbo al-almi da.›»
[19] Wa battaan Allah gaal le Muusa : «Guul le Haaruun yichiil asaatah wa yimiddaha ale kulla l-almi hana Masir, almi al-fi l-buhuur wa l-rujuul wa l-ruhuud wa fi kulla bakaan al-indah almi. Wa kulla l-almi da yabga damm. Wa l-damm yukuun fi kulla balad Masir lahaddi l-almi al-gaaʼid fi mawaaʼiin hana hatab wa hajar.»
[20] Wa khalaas, Muusa wa Haaruun sawwo kulla cheyy misil Allah amaraahum beyah. Wa Haaruun rafaʼ al-asa wa darab almi bahar al-Niil giddaam al-malik wa khaddaamiinah. Wa kulla almi al-bahar bigi damm.
[21] Wa huut al-bahar maato wa l-bahar bigi afin. Wa l-Masriyiin ma gidro chirbo al-almi da. Wa almi fi kulla balad Masir bigi damm.
[22] Wa laakin al-sahhaariin hana Masir sawwo nafs al-cheyy be sihirhum. Wa raas al-malik bigi gawi wa aba ma simiʼ kalaam Muusa wa Haaruun misil Allah gaalah.
[23] Wa l-malik gabbal macha beetah wa ma hamma be l-cheyy da.
[24] Wa kulla l-Masriyiin nakato nugaar jamb al-bahar le yalgo almi yacharbooh achaan almi al-bahar ma bincharib.
[25] Wa tamma sabʼa yoom min Allah darab al-bahar be l-waba da.