[1] Wa baʼad da, Allah gaal le Muusa : «Amchi le l-malik achaan ana bas gawweet ruuseehum hu wa khaddaamiin le nisawwi ajaaybi fi usuthum.
[2] Wa be da, inta tagdar tihajji le iyaalak wa le iyaal iyaalak be l-taʼab al-ana jibtah fi l-Masriyiin wa ajaaybi al-sawweethum fi baladhum. Wa be misil da, taʼarfu kadar ana bas Allah.»
[3] Wa khalaas, Muusa wa Haaruun macho le l-malik wa gaalo leyah : «Daahu Allah Rabb al-Ibraaniyiin gaal : ‹Lahaddi mata inta taaba ma tidangir giddaami ? Khalli chaʼabi yamurgu wa yamchu le yaʼabuduuni !
[4] Wa kan abeet ma tikhalli chaʼabi yamurgu, khalaas ambaakir ana nirassil jaraad fi baladak.
[5] Wa l-jaraad yikhatti kulla l-ard lahaddi al-ard ma tinchaaf battaan. Wa yaakul kulla l-khadaar al-ma dammarah al-barad. Wa ma yikhalli leeku ayyi warchaal fi chadar al-kadaade.
[6] Wa l-jaraad yamla gusuurak wa buyuut khaddaamiinak wa buyuut kulla l-Masriyiin. Wa cheyy misil da ma kaan min zaman juduudak lahaddi l-yoom.›» Wa Muusa marag min bakaan al-malik.
[7] Wa khaddaamiin al-malik gaalo leyah : «Lahaddi mata charak al-naadum da yakrubna ? Khalli al-rujaal yamurgu wa yamchu le yaʼabudu Allah ilaahhum ! Inta ma gaaʼid tichiif kadar balad Masir addammarat ?»
[8] Wa khalaas, humman gabbaloohum le Muusa wa Haaruun wa jaaboohum giddaam al-malik. Wa hu gaal leehum : «Amchu aʼabudu Allah ilaahku. Wa laakin yaatumman al-yamchu ?»
[9] Wa Muusa radda leyah wa gaal : «Aniina namchu be subyaanna wa chiyyaabna wa awlaadna wa banaatna wa bagarna wa khanamna achaan niʼayyudu iid le Allah.»
[10] Wa l-malik achchammat leehum wa gaal : «Yo zeen, Allah yukuun maʼaaku ! Abadan ana ma nikhalliiku yamurgu maʼa awiinku wa iyaalku achaan al-charr gaaʼid yinchaaf fi uyuunku.
[11] Wa l-cheyy al-dawwartuuh da ma mumkin. Al-rujaal wiheedhum bas yamchu le yaʼabudu Allah. Da bas al-cheyy al-intu talabtuuh minni.» Wa khalaas, taradoohum min giddaam al-malik.
[12] Wa baʼad da, Allah gaal le Muusa : «Arfaʼ iidak foog balad Masir achaan al-jaraad yikhatti kulla l-balad wa yaakul kulla l-gechch al-fi l-ard wa kulla cheyy al-khallaah al-barad.»
[13] Wa khalaas, Muusa madda asaatah foog al-balad wa Allah jaab riih min al-sabaah wa l-riih saagat tuul al-nahaar wa tuul al-leel. Wa ambaakir be fajur, al-riih jaabat al-jaraad.
[14] Wa l-jaraad mala kulla balad Masir wa ansabba fi ayyi bakaan be katara. Wa cheyy misil da abadan ma kaan fi turaab Masir wa battaan ma yukuun.
[15] Wa l-jaraad khatta kulla l-ard wa l-ard bigat dalma min al-jaraad. Wa akal kulla l-gechch al-fi l-ard wa kulla iyaal al-chadar wa kulla cheyy al-khallaah al-barad. Wa ma faddal cheyy min al-khadaar wa la min al-chadar wa la min gechch al-kadaade fi kulla balad Masir.
[16] Wa tawwaali ke, al-malik naada Muusa wa Haaruun wa gaal : «Ana aznab fiiku wa fi Allah ilaahku.
[17] Hassaʼ da, saamuhuuni. Ana muznib. Wa battaan asʼalo leyi Allah ilaahku le yarfaʼ minnina al-waba da.»
[18] Wa Muusa marag min bakaan al-malik wa saʼal Allah.
[19] Wa khalaas, Allah nazzal riih chadiide min al-kharib wa l-riih di chaalat al-jaraad wa daffagatah fi l-bahar al-Ahmar. Wa jaraadaay waahide kula ma faddalat fi ard Masir.
[20] Wa laakin Allah gawwa raas al-malik wa l-malik ma khalla Bani Israaʼiil yamurgu min baladah.
[21] Wa baʼad da, Allah gaal le Muusa : «Arfaʼ iidak ale l-sama wa dalaam azrag kurum yikhatti balad Masir. Kan naadum yichiifah, yuguul al-dalaam da misil yilammisah.»
[22] Wa Muusa rafaʼ iidah ale l-sama wa khalaas, dalaam azrag kurum khatta balad Masir muddit talaata yoom.
[23] Wa fi l-talaata yoom dool, al-Masriyiin ma gidro yichchaawafo ambeenaathum wa naadum waahid kula ma gidir yamrug min beetah. Wa laakin fiyah deyy fi l-bakaan al-saakniin foogah Bani Israaʼiil.
[24] Wa l-malik naada Muusa wa gaal leyah : «Hassaʼ da, amchu ! Intu wa awiinku wa iyaalku amchu aʼabudu Allah. Wa khanamku wa bagarku kamaan yifaddulu hini.»
[25] Wa laakin Muusa gaal : «Kan ke da, inta bas tantiina al-bahaayim al-nigaddumuuhum dahaaya muharragiin wa dahaaya aakhariin le Allah Ilaahna walla ? Da ma yabga.
[26] Kulla bahaayimna yamchu maʼaana wa bahiime waahide kula ma tifaddil achaan minhum bas nigaddumu dahaaya le naʼabudu Allah Ilaahna. Wa aniina zaatna ke ma naʼarfu al-bahaayim al-weenu al-nigaddumuuhum le Allah illa kan wisilna hinaak.»
[27] Wa laakin Allah gawwa raas al-malik wa l-malik aba ma khallaahum yamurgu min baladah.
[28] Wa hu gaal le Muusa : «Yalla ! Amrug min beeti ! Wa abadan ma taji tagiif giddaami. Battaan kan jiit wagaft giddaami, tumuut !»
[29] Wa Muusa gaal : «Sameh, misil inta gultah. Battaan ana ma naji nagiif giddaamak.»