[1] Wa misil Allah amaraahum beyah, Basaliil wa Uhuliyaab wa sinaaʼiyiin aakhariin al-Allah antaahum khibra wa fihim le yisawwu khidimtah gammo be buna kheemat al-ibaada.
[2] Wa Muusa naada Basaliil wa Uhuliyaab wa l-sinaaʼiyiin al-aakhariin al-Allah antaahum khibra wa ayyi naadum al-indah niiye achaan yaju leyah wa yugummu be l-khidme.
[3] Wa humman ligo min Muusa kulla l-hadaaya al-Bani Israaʼiil jaaboohum le buna al-kheema. Wa kulla yoom al-naas gaaʼidiin yijiibu be niiyithum hadaaya aakhariin.
[4] Wa khalaas kulla l-sinaaʼiyiin al-gammo be buna al-kheema ayyi waahid waggaf khidimtah wa ja.
[5] Wa gaalo le Muusa : «Bani Israaʼiil jaabo hadaaya aktar min al-yakfi le l-amal al-Allah amar beyah.»
[6] Wa Muusa kallam fi l-fariig wa gaal : «Khalli kulla l-naas yiwaggufu al-hadaaya al-yijiibuuhum le kheemat al-ibaada.» Wa khalaas kulla l-naas ma jaabo hadaaya battaan.
[7] Achaan al-hadaaya al-jaaboohum yakfu le buna al-kheema wa yifaddulu kula.
[8] Wa kulla l-sinaaʼiyiin gammo le buna al-kheema. Wa sawwooha be achara gitʼe min gumaach hana kattaan mukhayyat adiil al-loonah zahri wa garadi wa ahmar. Wa khayyato fi l-gitaʼ dool suwar makhluugiin samaawiyiin be khiyaatit khayyaati maʼruuf.
[9] Wa tuul al-gitaʼ dool sawa sawa. Ayyi waahide tuulha 28 duraaʼ wa urdaha 4 duraaʼ.
[10] Wa l-gitaʼ dool, khamsa lammoohum sawa fi majmuuʼa waahide wa l-khamsa al-aakhariin kula lammoohum sawa.
[11] Wa kachkacho taraf al-khamsa be gumaach zahri wa taraf al-khamsa al-aakhariin kula kachkachoohum be nafs al-gumaach.
[12] Sawwo 50 manaakhir fi l-majmuuʼa al-awwal wa 50 manaakhir fi l-majmuuʼa al-taaniye. Wa khalaas al-manaakhir dool bigo mulgaabiliin.
[13] Wa sawwo 50 fangar hana dahab wa chabako beyah al-manaakhir kulli waahide maʼa l-aakhara. Wa be da, al-majmuuʼteen bigo kheema waahide.
[14] Wa sawwo al-khita al-awwal le l-kheema min 11 gitʼe matruuriin be suuf inze. Wa khattooh be foog le l-kheema.
[15] Wa tuul al-gitaʼ dool sawa sawa. Wa tuul al-waahide 30 duraaʼ wa urdaha 4 duraaʼ.
[16] Wa l-gitaʼ dool, khamsa lammoohum sawa wa l-sitte al-aakhariin kula lammoohum sawa.
[17] Wa sawwo 50 manaakhir fi nuss kulli waahide min al-majmuuʼteen.
[18] Wa sawwo 50 fangar min nahaas le yachbuku beehum al-majmuuʼteen. Wa be da, al-majmuuʼteen yabgo khita waahid.
[19] Wa sawwo al-khita al-taani be firaaw kubaach madbuukhiin wa mulawwaniin be loon ahmar. Wa l-khita al-taalit da, sawwooh be firaaw ijil al-bahar.
[20] Wa battaan, addalo khachab al-sunt wa l-baʼadeen yurussuuh le yabnu beyah kheemat al-ibaada.
[21] Ayyi waahid min al-khachab da tuulah 10 duraaʼ wa urdah duraaʼ wa nuss.
[22] Le ayyi khachaba sawwo rijle itneen al-gidro sabbatooha maʼa l-aakhariin. Kulla l-khachab da sawwooh misil da.
[23] Wa addalo 20 khachab fi l-nuss al-junuubi hana l-kheema.
[24] Wa sawwo 40 asaas hana fudda min tihit le l-ichriin khachab. Le kulli khachaba waahide sawwo asaas itneen tihit rijileenha al-itneen.
[25] Wa addalo 20 khachab fi l-nuss al-munchaakhi hana l-kheema.
[26] Wa dool kula sawwo leehum 40 asaas hana fudda min tihit. Le kulli khachaba waahide sawwo asaas itneen tihit rijileenha al-itneen.
[27] Wa addalo sitte khachab fi l-nuss al-warraani hana l-kheema al-mugaabil al-kharib.
[28] Wa sawwo khachab itneen le l-koonyaat al-wara.
[29] Wa l-khachab al-itneen dool mulassagiin min tihit lahaddi foog. Wa be foog sabbatoohum be khaatim. Wa da bigi fi l-koonyaat al-itneen al-gaaʼidiin be wara.
[30] Wa be da, bigi 8 khachab wa induhum 16 asaas hana fudda. Wa tihit kulli khachaba asaas itneen.
[31] Wa sawwo 5 maraadiis min khachab al-sunt le l-nuss al-junuubi.
[32] Wa 5 aakhariin le l-nuss al-munchaakhi hana l-kheema. Wa battaan sawwo 5 le nussaha al-warraani al-mugaabil al-kharib.
[33] Wa l-murdaas al-ustaani al-tawiil al-gaaʼid fi gismit al-khachab macha min tarafha le tarafha.
[34] Wa masaho kulla l-khachab da be dahab wa sanaʼo khawaatim hana dahab al-yidissu fooghum al-maraadiis. Wa masaho al-maraadiis kula be dahab.
[35] Wa sawwo sitaar dakhlaani min gumaach hana kattaan mukhayyat adiil al-loonah zahri wa garadi wa ahmar. Wa khayyato foogha suwar makhluugiin samaawiyiin be khiyaatit khayyaati maʼruuf.
[36] Wa allagooh fi manaakhir hana dahab al-gaaʼidiin fi arbaʼa amuud min hatab al-sunt al-mamsuuhiin be dahab. Wa l-amad dool musabbatiin fi arbaʼa asaas hana fudda.
[37] Wa sawwo sitaar le baab al-kheema min gumaach hana kattaan mukhayyat adiil al-loonah zahri wa garadi wa ahmar. Wa da be khiyaatit khayyaati maʼruuf.
[38] Wa allago al-sitaar da fi manaakhir hana dahab al-gaaʼidiin fi 5 amuud hana hatab al-sunt wa ruuseehum wa l-maraadiis al-fooghum mamsuuhiin be dahab. Wa sawwo leehum 5 asaas min nahaas.