[1] Wa l-Rabb kallam kulla l-kalaam da wa gaal :
[2] «Ana Allah Ilaahak bas maragtak min Masir balad al-ubuudiiye.
[3] «Ma taʼabud ilaahaat aakhariin illa ana.
[4] «Ma tasnaʼ sanam fi ayyi hajim min al-achya al-gaaʼidiin foog fi l-sama aw tihit fi l-ard aw fi lubb al-almi al-fi l-ard.
[5] Wa ma tasjud giddaam al-asnaam dool wa la taʼabudhum achaan ana bas Allah Ilaahak. Ana Allah khayyuur yaʼni ma nidoor taʼabud ilaah aakhar. Wa ana niʼaakhib al-iyaal wa iyaal al-iyaal be zunuub abbahaathum lahaddi l-zurriiye al-taalta wa l-raabʼe kan humman yakrahooni.
[6] Wa laakin ana nisawwi al-kheer le aalaaf al-zurriiyaat al-yihibbuuni wa yitabbugu wasiiyaati.
[7] «Ma tahlif be usmi ana Allah Ilaahak be kidib achaan al-yahlif be usmi be kidib, ana Allah ma najʼalah bari.
[8] «Azzakkar yoom al-sabt wa ajʼalah yoom mukhaddas.
[9] Inta takhdim le muddit sitte yoom wa tikammil kulla khidimtak.
[10] Wa laakin al-yoom al-saabiʼ hu sabt leyi ana Allah Ilaahak. Fi l-yoom da, ma takhdim ayyi cheyy wa la inta wa la awlaadak wa la banaatak wa la abiidak wa la khadiimak wa la bahaaymak wa la l-ajaanib al-gaaʼidiin maʼaak fi hillitak.
[11] Achaan fi sitte yoom, Allah khalag al-samaawaat wa l-ard wa l-buhuur wa kulla cheyy al-fiihum. Wa laakin hu ma khadam fi l-yoom al-saabiʼ. Achaan da, hu baarak al-yoom al-saabiʼ wa jaʼalah mukhaddas leyah.
[12] «Karrim ammak wa abuuk achaan umrak yabga tawiil fi l-ard al-nantiiha leek ana Allah Ilaahak.
[13] «Ma taktul dimme.
[14] «Ma tazna.
[15] «Ma tasrig.
[16] «Ma tachhad be kidib fi ayyi waahid min jiiraanak.
[17] «Ma titmanna beet jaarak wa la martah wa la abdah wa la khaadmah wa la toorah wa la humaarah wa la ayyi cheyy hanaayah.»
[18] Wakit kulla l-chaʼab simʼo hiss al-raʼad wa chaafo al-barraaga wa simʼo hiss al-buug wa chaafo al-jabal gaaʼid yidakhkhin, humman rajafo min al-khoof wa wagafo baʼiid.
[19] Wa gaalo le Muusa : «Hassaʼ da, inta bas kallim leena wa aniina nasmaʼook. Achaan kan al-Rabb yikallim leena da, aniina numuutu !»
[20] Wa Muusa gaal le l-chaʼab : «Ma takhaafo ! Al-Rabb ja le yijarribku wa le takhaafo minnah wa ma tisawwu zanib.»
[21] Wa l-chaʼab wagafo baʼiid wa laakin Muusa garrab wa dakhal fi l-dalaam al-bakaan al-gaaʼid foogah al-Rabb.
[22] Wa Allah gaal le Muusa : «Guul le Bani Israaʼiil : ‹Intu be nufuusku chiftu kadar ana kallamt leeku min al-sama.
[23] Ma tisawwu leeku ilaah aakhar maʼaayi wa la min fudda wa la min dahab. Abadan ma tisawwuuh.
[24] Abnu leyi madbah min turaab le tigaddumu leyi foogah dahaaya muharragiin wa dahaaya salaama min khanamku wa bagarku. Wa ana naji nibaarikku fi kulla bakaan al-tinaadu foogah usmi.
[25] Kan tabnu leyi madbah hana hajar, ma tabnuuh be l-hajar al-magtuuʼ achaan al-hadiid al-tagtaʼooh beyah ma yikhalliih yabga mukhaddas.
[26] Ma tatlaʼo fi l-madbah be ataba achaan kan talaʼtu, ooritku tigaabil al-madbah.›»