[1] Fi l-yoom al-awwal hana l-chahar al-taalit min marigiinhum min Masir, Bani Israaʼiil saaro min Rafidiim wa wassalo fi saharat Siinaaʼ. Wa hinaak humman nazalo mugaabiliin al-jabal.
[3] Wa fi l-bakaan da, Muusa talaʼ fi l-jabal le yigaabil al-Rabb. Wa hu naadaah min raas al-jabal wa gaal leyah : «Guul al-kalaam da le zurriiyit Yaakhuub. Khabbir Bani Israaʼiil wa guul leehum :
[4] ‹Intu zaatku chiftu al-cheyy al-ana sawweetah fi Masir wa kikkeef ana chiltuku misil fi janaahe al-suguura wa jibtuku aleyi ana Allah.
[5] Fi chaan da, kan intu tasmaʼo kalaami wa tikarrumu muʼaahadati, intu tabgo chaʼabi halaali min kulla l-chuʼuub hatta kan al-ard kullaha ke hinti kula.
[6] Wa intu tabgo leyi mamlakat rujaal al-diin wa umma mukhassasa.› Da l-kalaam al-waajib tuguulah le Bani Israaʼiil.»
[7] Wa Muusa gabbal al-fariig wa tawwaali naadaahum le chuyuukh al-chaʼab wa kallamaahum be kulla l-kalaam al-Allah amarah beyah.
[8] Fi l-bakaan da, kulla l-chaʼab raayhum bigi waahid wa gaalo : «Kulla l-kalaam al-gaalah Allah, aniina nitabbuguuh !» Wa Muusa chaal radduhum le yiwaddiih le Allah.
[9] Wa Allah gaal le Muusa : «Daahu ana nigaabilak fi sahaabaay mudallime achaan kulla l-chaʼab yasmaʼooni wakit ana nikallim maʼaak. Wa be misil da, humman yiʼaamunu beek daayman.» Wa fi l-wakit da, Muusa hajja kalaam al-chaʼab le Allah.
[10] Wa Allah gaal le Muusa : «Gabbil le l-chaʼab wa khassishum al-yoom wa ambaakir. Wa khalli yikhassulu khulgaanhum.
[11] Wa yukuunu jaahiziin le l-yoom al-taalit achaan fi l-yoom da, ana Allah nanzil fi jabal Siinaaʼ giddaam kulla l-chaʼab.
[12] Khutt huduud been al-chaʼab wa l-jabal wa guul leehum : ‹Angarʼu ma tatlaʼo fi l-jabal wa la tilammusuuh. Ayyi naadum al-yilammis al-jabal da, yaktuluuh.
[13] Wa l-naadum da, naadum aakhar battaan ma yilammisah illa yarjumuuh walla yizarruguuh be nuchchaab. Kan bahiime walla naadum kula, ma yikhalluuh hayy. Wa laakin wakit simʼo daribiin al-buug, waahidiin minhum yagdaro yarkabo fi l-jabal.›»
[14] Wa Muusa nazal min al-jabal wa khassas al-chaʼab wa humman khassalo khulgaanhum.
[15] Wa hu gaal leehum : «Jahhuzu nufuusku le l-yoom al-taalit. Ma tarugdu maʼa awiinku fi l-mudda di.»
[16] Wa fi l-yoom al-taalit be fajur, al-chaʼab chaafo barraaga wa simʼo hiss hana raʼad wa chaafo sahaabaay kabiire fi l-jabal wa simʼo daribiin chadiid hana buug. Fi l-bakaan da, kulla l-chaʼab al-gaaʼidiin fi l-fariig rajafo.
[17] Wa Muusa marag al-chaʼab barra min al-fariig le yigaabulu al-Rabb. Wa humman wagafo fi gaʼar al-jabal.
[18] Wa kulla jabal Siinaaʼ mukhatta be dukhkhaan achaan Allah nazal foogah be naar. Al-dukhkhaan yatlaʼ min al-jabal misil dukhkhaan al-furun wa kulla l-jabal rajaf be chidde.
[19] Wa daribiin al-buug gaaʼid yiziid. Wakit Muusa gaaʼid yikallim maʼa l-Rabb, hu yurudd leyah be hiss misil hiss al-raʼad.
[20] Wa Allah nazal fi raas jabal Siinaaʼ wa naada Muusa le yarkab fi raas al-jabal. Wa Muusa rikib.
[21] Wa Allah gaal le Muusa : «Anzil wa hazzir al-chaʼab achaan ma yufuutu al-huduud le yaju yichiifuuni. Kan humman faato al-huduud, katiir minhum yumuutu.
[22] Wa hatta kan rujaal al-diin dawwaro yigarrubu leyi kula, khalli yikhassusu nufuushum achaan ana Allah ma nadrubhum.»
[23] Wa Muusa gaal le Allah : «Al-chaʼab ma yagdaro yatlaʼo fi jabal Siinaaʼ achaan inta zaatak bas hazzartina wa gult nukhuttu huduud ambeenna aniina wa l-jabal wa najʼalooh mukhaddas.»
[24] Wa Allah radda leyah wa gaal : «Anzil wa battaan atlaʼ leyi inta wa Haaruun. Wa laakin rujaal al-diin wa l-chaʼab, khalli ma yufuutu al-huduud wa yigarrubu leyi wa be da, ana ma nadrubhum.»
[25] Wa Muusa nazal le l-chaʼab wa khabbaraahum.