[1] ᐱᑯ ᐊᐃᐧᔭᐠ ᑖᐯᐧᑕᑭ ᒋᓴᐢ ᐁᐊᐧᑯ ᙭ ᑭ ᓂᐦᑖᐃᐧᑭᐃᐠ ᑭᓭᒪᓂᑐᐊᐧ; ᐁᑯᓯ ᐱᑯ ᐊᐃᐧᔭᐠ ᓵᑭᐋᒋ ᐊᓂᐦᐃ ᑳ ᑭ ᓂᐦᑖᐃᐧᑭᐦᐃᑯᐟ ᓵᑭᐦᐁᐤ ᒥᓇ ᐊᓂᐦᐃ ᑳ ᑭ ᓂᐦᑖᐃᐧᑭᐋᔨᐟ.
[2] ᐁᑯᑕ ᐅᒪ ᐅᐦᒋ ᑭ ᑭᐢᑫᔨᑌᓈᓇᐤ ᐁ ᓵᑭᐃᒫᔭᕽ ᑭᓭᒪᓂᑐ ᐅᐟ ᐊᐋᐧᓯᒥᓴ, ᑭᐢᐱᐣ ᐁ ᓵᑭᐋᔭᕽ ᑭᓭᒪᓂᑐ ᒥᓇ ᐁ ᐃᑐᑕᒫᐧᔭᕽ ᐅᔭᓱᐁᐧᐃᐧᓇ.
[3] ᒋᑫᒫ ᐁᐊᐧᑯ ᐅᒪ ᐅ ᓵᑭᐦᐃᐁᐧᐃᐧᐣ ᑭᓭᒫᓂᑐ ᑭᑕ ᑲᓇᐁᐧᔨᑕᒫᐧᔭᕽ ᐅᔭᓱᐁᐧᐃᐧᓇ; ᓇᒪᐃᐧᔭ ᒫᑲ ᐋᔨᒪᓂᔨᐊᐧ ᐅᔭᓱᐁᐧᐃᐧᓇ.
[4] ᒋᑫᒫ ᐱᑯ ᑫᑲᐧᐩ ᑳ ᓂᐦᑖᐃᐧᑭᑖᐟ ᑭᓭᒪᓂᑐ ᓵᑯᒋᑖᒪᑲᐣ ᐊᐢᑭ; ᐁᐊᐧᑯ ᒫᑲ ᐅᒪ ᓵᑯᑖᐧᐃᐧᐣ ᑳ ᑭ ᓵᑯᒋᑖᒪᑲᕽ ᐊᐢᑭ ᑭ ᑖᐯᐧᔦᔨᑕᒧᐃᐧᓂᓇᐤ ᐅᑎ.
[5] ᐊᐁᐧᓈᓇ ᑳ ᓵᑯᒋᑖᐟ ᐊᐢᑭ, ᐱᑯ ᐊᓇ ᑳ ᑖᐯᐧᑕᕽ ᒋᓴᐢ ᐁᐊᐧᑯ ᑭᓭᒪᓂᑐ ᐅᑯᓯᓴ?
[6] ᐁᐊᐧᑯ ᐊᓇ ᑳ ᑭ ᐯ ᐃᑐᐦᑌᐟ ᓂᐱ ᒥᓇ ᒥᐦᑯ ᐅᐦᒋ ᒋᓴᐢ ᙭ ᐅᑎ; ᓇᒪᐃᐧᔭ ᐱᑯ ᓂᐱ ᐅᐦᒋ ᒫᑲ ᓂᐱ ᒥᓇ ᒥᐦᑯ ᐅᐦᒋ.
[7] ᐁᑯᓯ ᐊᐦᒑᕽ ᐁᐊᐧᑯ ᑳ ᐋᒋᒧᐟ, ᒋᑫᒫ ᐊᐦᒑᕽ ᐁᐊᐧᑯ ᑖᐯᐧᐃᐧᐣ.
[8] ᐊᔨᐢ ᓂᐢᑎᐊᐧᐠ ᑳ ᐋᒋᒧᒋᐠ, ᐊᐦᒑᕽ ᒥᓇ ᓂᐱ ᒥᓇ ᒥᐦᑯ; ᐁᑯᓯ ᐅᑭ ᓂᐢᑐ ᐯᔭᑲᐧᓂᔨᐤ ᐅᐟ ᐋᒋᒧᐃᐧᓂᐋᐧᐤ.
[9] ᑭᐢᐱᐣ ᑯᑎᓇᒫᐧᓇᐤ ᐅᐟ ᐋᒋᒧᐃᐧᓂᐋᐧᐤ ᐊᔨᓯᔨᓂᐊᐧᐠ, ᐅᐟ ᐋᒋᒧᐃᐧᐣ ᑭᓭᒪᓂᑐ ᐊᔨᐋᐧᐠ ᑭᐢᑌᔨᑖᑲᐧᓂᔨᐤ; ᒋᑫᒫ ᐁᐊᐧᑫᐧᔨᐤ ᐅᒪ ᐅᐟ ᐋᒋᒧᐃᐧᐣ ᑭᓭᒪᓂᑐ ᑳ ᑭ ᐃᓯ ᐋᒋᒫᐟ ᐅᑯᓯᓴ.
[10] ᐊᓇ ᑳ ᑖᐯᐧᑕᐋᐧᐟ ᑭᓭᒪᓂᑐ ᐅᑯᓯᓴ ᑭᑭᐢᑳᐠ ᐋᒋᒧᐃᐧᐣ; ᐊᓇ ᐁᑳ ᑳ ᑖᐯᐧᑕᐋᐧᐟ ᑭᓭᒪᓂᑐᐊᐧ ᐅᑭᔮᐢᑭᐢᑭᐊᐧ ᐃᑕᔦᐤ; ᒋᑫᒫ ᐁᑳ ᐁ ᑭ ᐅᐦᒋ ᑖᐯᐧᑕᒫᐧᐟ ᑭᓭᒪᓂᑐᐊᐧ ᑳ ᑭ ᐃᓯ ᐋᒋᒫᔨᐟ ᐅᑯᓯᓯᔨᐊᐧ.
[11] ᐁᐊᐧᑯ ᒫᑲ ᐅᒪ ᐋᒋᒧᐃᐧᐣ ᑭᓭᒪᓂᑐ ᐁ ᑭ ᒥᔨᑯᔭᕽ ᑳᑭᑫ ᐱᒫᑎᓯᐃᐧᐣ, ᐅᒪ ᒫᑲ ᐱᒫᑎᓯᐃᐧᐣ ᑭᑭᐢᑳᑯᔨᐊᐧ ᐅᑯᓯᓴ.
[12] ᐊᓇ ᑳ ᐊᔮᐋᐧᐟ ᐅᑯᓯᓯᒫᐊᐧ ᐊᔮᐤ ᐱᒫᑎᓯᐃᐧᐣ; ᐊᓇ ᐁᑳ ᑳ ᐊᔮᐋᐧᔨᐟ ᑭᓭᒪᓂᑐ ᐅᑯᓯᓴ ᓇᒪᐃᐧᔭ ᐊᔮᐤ ᐱᒫᑎᓯᐃᐧᐣ.
[13] ᐁᐊᐧᑯᓂ ᐅᐦᐃ ᑭ ᑭ ᒪᓯᓂᐊᒫᑎᓈᐋᐧᐤ ᑭᑕ ᑭᐢᑫᔨᑕᒣᐠ ᐁ ᐊᔮᔦᐠ ᑳᑭᑫ ᐱᒫᑎᓯᐃᐧᐣ, ᑭᔭᐋᐧᐤ ᐅᑎ ᑳ ᑖᐯᐧᑕᒫᐧᔦᐠ ᐅ ᐃᐧᔪᐃᐧᐣ ᑭᓭᒪᓂᑐ ᐅᑯᓯᓴ.
[14] ᐁᐊᐧᑯ ᒫᑲ ᐅᒪ ᑳ ᐃᓯ ᓱᑫᔨᒧᐢᑕᐋᐧᔭᕽ, ᑭᐢᐱᐣ ᑫᑲᐧᐩ ᑭ ᓇᑐᑕᒪᐋᐧᓇᐤ ᐁ ᐃᑕᐢᑌᔨᐠ ᐅᐟ ᐃᑌᔨᑕᒧᐃᐧᐣ ᑭ ᓇᑐᐦᑖᑯᓇᐤ;
[15] ᑭᐢᐱᐣ ᒫᑲ ᑭ ᑭᐢᑫᔨᑌᓈᓇᐤ ᐁ ᓇᑐᐦᑕᑯᔭᕽ ᑫᑲᐧᐩ ᐁ ᓇᑐᑕᒪᐋᐧᔭᕽ, ᑭ ᑭᐢᑫᔨᑌᓈᓇᐤ ᐁ ᐊᔮᔭᕽ ᐊᓂᐁ ᓇᑐᑕᒫᐃᐧᓇ ᑳ ᑭ ᓇᑐᑕᒪᐋᐧᔭᕽ.
[16] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐋᐧᐸᒫᒋ ᐅᒋᐋᐧᒪ ᐁ ᐃᑐᑕᒥᔨᐟ ᒪᒋᐃᑎᐃᐧᐣ ᐁᑳ ᓂᐳᐃᐧᓂᕽ ᑳ ᐃᓯ ᐊᔮᐠ, ᑭᑕ ᓇᑐᑕᒫᐤ, ᐁᑯᓯ ᑭᓭᒪᓂᑐᐊᐧ ᑭᑕ ᒥᔨᐠ ᐱᒫᑎᓯᐃᐧᐣ ᐊᓂᐦᐃ ᐅᐦᒋ ᐁᑳ ᓂᐳᐃᐧᓂᕽ ᑳ ᐃᓯ ᒪᒋᑐᑕᒥᔨᐟ. ᐃᐦᑕᑲᐧᐣ ᒪᒋᐃᑎᐃᐧᐣ ᓂᐳᐃᐧᓂᕽ ᐃᓯ; ᓇᒪᐃᐧᔭ ᐁᐊᐧᑯ ᑳ ᐃᑌᐧᔮᐣ ᑭᑕ ᓇᑐᑌᐢᑕᒪᐋᐧᑕᕽ.
[17] ᑲᐦᑭᔭᐤ ᐊᐧᓂᑐᑕᒧᐃᐧᐣ ᒪᒑᔨᐊᐧᐣ; ᐃᐦᑕᑲᐧᐣ ᒫᑲ ᒪᒋᐃᑎᐃᐧᐣ ᐁᑳ ᓂᐳᐃᐧᓂᕽ ᑳ ᐃᓯ ᐊᔮᐠ.
[18] ᑭ ᑭᐢᑫᔨᑌᓈᓇᐤ ᐱᑯ ᐊᐃᐧᔭᐠ ᐁ ᓂᐦᑖᐃᐧᑭᐦᐃᑯᐟ ᑭᓭᒪᓂᑐᐊᐧ ᓇᒪᐃᐧᔭ ᒪᒋᐃᑎᐤ; ᒫᑲ ᐊᓂᐦᐃ ᑳ ᑭ ᓂᐦᑖᐃᐧᑭᐃᑯᔨᐟ ᑭᓭᒪᓂᑐᐊᐧ ᑲᓇᐁᐧᔨᒥᐠ ᐁᑯᓯ ᒪᒑᔭ ᓇᒪᐃᐧᔭ ᓵᒥᓂᐠ.
[19] ᑭ ᑭᐢᑫᔨᑌᓈᓇᐤ ᑭᓭᒪᓂᑐᕽ ᐁ ᐅᐦᒋᔭᕽ ᐁᑯᓯ ᒥᓯᐁᐧ ᐊᐢᑭ ᒪᒑᔨᕽ ᐁ ᐊᐢᑌᐠ.
[20] ᑭ ᑭᐢᑫᔨᑌᓈᓇᐤ ᒫᑲ ᑭᓭᒪᓂᑐ ᐅᑯᓯᓴ ᐁ ᑭ ᑕᑯᓯᕽ ᐁᑯᓯ ᐁ ᑭ ᒥᔨᑯᔭᕽ ᓂᓯᑐᐦᑕᒧᐃᐧᐣ ᑭᑕ ᑭᐢᑫᔨᒫᔭᕽ ᐊᓇ ᑳ ᑖᐯᐧᐟ, ᐁᑯᓯ ᑭ ᑭᑭᐢᑳᑯᓇᐤ ᐊᓇ ᑳ ᑖᐯᐧᐟ, ᐁᐊᐧᑯᓂ ᐅᑯᓯᓴ ᒋᓴᐢ ᙭ᐊ. ᐁᐊᐧᑯ ᐊᐊᐧ ᑖᐯᐧ ᑭᓭᒪᓂᑐ ᒥᓇ ᑳᑭᑫ ᐱᒫᑎᓯᐃᐧᐣ.
[21] ᐊᐱᐢᑕᐋᐧᓯᓯᑎᐠ ᐊᔮᑳᐧᒥᓯᐢᑖᑯᐠ ᒪᓂᑐᑳᓇᐠ.