[1] ᒫᑎᑲ ᐃᔨᑯᕽ ᓵᑭᐦᐃᐁᐧᐃᐧᐣ ᐁᐧᔪᑖᐃᐧᕽ ᑳ ᑭ ᐸᑭᑎᓇᒫᑯᔭᕽ ᑭᓭᒪᓂᑐ ᐅᐟ ᐊᐋᐧᓯᒥᓴ ᑭᑕ ᐃᑎᑲᐃᐧᔭᕽ; ᐁᑯᑐᐊᐧ ᒫᑲ ᑭᔮᓇᐤ. ᐁᐊᐧᑯ ᐅᒪ ᐅᐦᒋ ᐊᐢᑭ ᓇᒪᐃᐧᔭ ᑭ ᑭᐢᑫᔨᒥᑯᓈᓇᐤ ᒋᑫᒫ ᐁᑳ ᐁ ᑭ ᑭᐢᑫᔨᒥᑯᐟ.
[2] ᓯᔮᑭᐦᐃᑕᑯᐠ, ᐁᑲᐧ ᑭᔮᓇᐤ ᑭᓭᒪᓂᑐ ᐅᐟ ᐊᐋᐧᓯᒥᓴ ᓇᒣᐢᑲᐧ ᒫᑲ ᓄᑲᐧᐣ ᑫ ᐃᓯ ᐊᔮᔭᕽ. ᑭ ᑭᐢᑫᔨᑌᓈᓇᐤ ᐃᐧᔭ ᑭᐢᐱᐣ ᑫ ᓄᑯᓯᑫᐧ ᑭ ᑲ ᐃᓯ ᐊᔮᓇᐤ ᑖᐱᐢᑯᐨ ᐃᐧᔭ; ᒋᑫᒫ ᑭ ᑲ ᐋᐧᐸᒫᓇᐤ ᑳ ᐃᓯ ᐊᔮᐟ.
[3] ᑲᐦᑭᔭᐤ ᒫᑲ ᐊᐃᐧᔭᐠ ᐅᒪ ᑳ ᐃᑕᐢᑌᔨᐠ ᐅ ᐸᑯᓭᔨᒧᐃᐧᐣ ᐯᑭᐃᓱ ᑖᐱᐢᑯᐨ ᑳ ᐃᓯ ᐯᑭᓯᔨᐟ.
[4] ᑲᐦᑭᔭᐤ ᐊᐃᐧᔭᐠ ᑳ ᐃᑐᑕᕽ ᒪᒋᑎᐃᐧᐣ ᐱᑯᓇᑦ ᒥᓇ ᐅᔭᓱᐁᐧᐃᐧᐣ ᒋᑫᒫ ᒪᒋᑎᐃᐧᐣ ᐁᐊᐧᑯ ᐁ ᐱᑯᓇᒥᕽ ᐅᔭᓱᐁᐧᐃᐧᐣ.
[5] ᐁᑯᓯ ᑭ ᑭᐢᑫᔨᑌᓈᐋᐧᐤ ᐁ ᑭ ᓄᑯᓯᐟ ᑭᑕ ᐅᑎᓇᕽ ᒪᒋᑎᐃᐧᓇ; ᐃᐧᔭ ᒫᑲ ᓇᒪᐃᐧᔭ ᑭᑭᐢᑳᐠ ᒪᒋᑎᐃᐧᐣ.
[6] ᐊᐃᐧᔭᐠ ᑭᑭᐢᑳᑯᒋ ᓇᒪᐃᐧᔭ ᒪᒋᐃᑎᐤ; ᐊᐃᐧᔭᐠ ᒪᒋᐃᑎᒋ ᓇᒪᐃᐧᔭ ᐅᐦᒋ ᐋᐧᐸᒣᐤ ᒥᓇ ᓇᒪᐃᐧᔭ ᑭᐢᑫᔨᒣᐤ.
[7] ᐊᐱᐢᑕᐋᐧᓯᓯᑎᐠ ᐁᑳᐃᐧᔭ ᐊᐃᐧᔭᐠ ᐊᔨᓯᔨᓂᐤ ᑭ ᑲ ᐊᐧᓂᒥᑎᒣᑕᐃᑯᐋᐧᐤ; ᐊᓇ ᑳ ᐃᑐᑕᕽ ᑲᐧᔭᐢᑳᐧᑎᓯᐃᐧᐣ ᑲᐧᔭᐢᑳᐧᑎᓯᐤ, ᑖᐱᐢᑯᐨ ᑳ ᐃᓯ ᑲᐧᔭᐢᑳᐧᑎᓯᔨᐟ;
[8] ᐊᓇ ᑳ ᐃᑐᑕᕽ ᒪᒋᑎᐃᐧᐣ ᒪᒑᔭ ᐁᑯᑕ ᐅᐦᒋᐤ ᒋᑫᒫ ᒥᒋᒫᐨ ᐅᐦᒋ ᒪᒑᔭ ᑭ ᒪᒋᐃᑎᐤ. ᐁᐊᐧᑯ ᐅᒪ ᐅᐦᒋ ᑭᓭᒪᓂᑐ ᐅᑯᓯᓴ ᑳ ᑭ ᓄᑯᓯᔨᐟ ᑭᑕ ᓂᓯᐊᐧᓈᒋᑖᔨᐟ ᐅᐟ ᐃᓯᐦᒋᑫᐃᐧᓂᔨᐊᐧ ᒪᒑᔭ.
[9] ᐱᑯ ᐊᐃᐧᔭᐠ ᐁ ᓂᐦᑖᐃᐧᑭᐦᐃᑯᐟ ᑭᓭᒪᓂᑐᐊᐧ ᓇᒪᐃᐧᔭ ᐃᑐᑕᑦ ᒪᒋᑎᐃᐧᐣ ᒋᑫᒫ ᐅ ᓂᐦᑖᐃᐧᑭᐃᑯᐃᐧᐣ ᑭᑭᐢᑲᐠ; ᐁᑯᓯ ᓇᒪᐃᐧᔭ ᑭᑕ ᑭ ᐃᑐᑕᕽ ᒪᒋᑎᐃᐧᐣ ᒋᑫᒫ ᐁ ᓂᐦᑖᐃᐧᑭᐦᐃᑯᐟ ᑭᓭᒪᓂᑐᐊᐧ.
[10] ᐁᑯᑕ ᐅᒪ ᐁᓯ ᑭᐢᑫᔨᑖᑯᓯᔨᐟ ᐅᐟ ᐊᐋᐧᓯᒥᓴ ᑭᓭᒪᓂᑐ ᒥᓇ ᒪᒑᔭ ᐅᐟ ᐊᐋᐧᓯᒥᓴ; ᐊᐃᐧᔭᐠ ᐁᑳ ᑳ ᐃᑐᑕᕽ ᑲᐧᔭᐢᑳᐧᑎᓯᐃᐧᐣ ᓇᒪᐃᐧᔭ ᑭᓭᒪᓂᑐᕽ ᐅᐦᒋᐤ ᒥᓇ ᐊᓇ ᐁᑳ ᑳ ᓵᑭᐋᐟ ᐅᒋᐋᐧᒪ.
[11] ᒋᑫᒫ ᐁᐊᐧᑯ ᐅᒪ ᐃᑌᐧᐃᐁᐧᐃᐧᐣ ᑳ ᑭ ᐯᐦᑕᒣᐠ ᒥᒋᒫᐨ ᐅᐦᒋ, ᑭᑕ ᓵᑭᐦᐃᑐᔭᕽ;
[12] ᓇᒪᐃᐧᔭ ᑖᐱᐢᑯᐨ ᑫᐣ ᒪᒑᔭ ᑳ ᑭ ᐅᐦᒋᐟ ᐁᑯᓯ ᑳ ᑭ ᓂᐸᐦᐋᐟ ᐅᒋᐋᐧᒪ. ᑖᓀᑭ ᒫᑲ ᑳ ᑭ ᓂᐸᐦᐋᐟ? ᐃᐧᔭ ᐅᐟ ᐃᓯᐦᒋᑫᐃᐧᓇ ᐁ ᒫᔮᑕᓂᔨᑭ ᐁᑯᓯ ᐅᒋᐋᐧᒪ ᐃᐧᔭ ᐁ ᒥᔮᐧᓯᓂᔨᑭ.
[13] ᐁᑳᐃᐧᔭ ᒫᒪᐢᑳᑕᒧᐠ ᓂᒋᐋᐧᒥᑎᐠ ᑭᐢᐱᐣ ᐸᑳᐧᑎᑯᔦᑯ ᐊᐢᑭ.
[14] ᑭ ᑭᐢᑫᔨᑌᓈᓇᐤ ᐁ ᑭ ᐸᐢᐱᔭᕽ ᓂᐳᐃᐧᓂᕽ ᐅᐦᒋ ᐱᒫᑎᓯᐃᐧᓂᕽ ᐃᓯ ᒋᑫᒫ ᐁ ᓵᑭᐋᔭᑯᐠ ᐅᒋᐋᐧᒥᒫᐊᐧᐠ. ᐊᓇ ᐁᑳ ᑳ ᓵᑭᐦᐃᐁᐧᐟ ᓂᐳᐃᐧᓂᕽ ᐊᔮᐤ.
[15] ᐊᐃᐧᔭᐠ ᐸᑳᐧᑖᒋ ᐅᒋᐋᐧᒪ ᐅᓂᐸᑖᑫᐤ ᐁᐊᐧᑯ; ᐁᑯᓯ ᑭ ᑭᐢᑫᔨᑌᓈᐋᐧᐤ ᓇᒪᐃᐧᔭ ᐊᐃᐧᔭᐠ ᐅᓂᐸᑖᑫᐤ ᐊᔮᐤ ᑳᑭᑫ ᐱᒫᑎᓯᐃᐧᐣ ᐁ ᑭᑭᐢᑳᑯᐟ.
[16] ᐁᑯᑕ ᐅᒪ ᐅᐦᒋ ᑳ ᑭᐢᑫᔨᑕᒪᕽ ᓵᑭᐦᐃᐁᐧᐃᐧᐣ, ᒋᑫᒫ ᐁ ᑭ ᐸᑭᑎᓇᕽ ᐅ ᐱᒫᑎᓯᐃᐧᐣ ᑭᔮᓇᐤ ᐅᐦᒋ; ᐁᑯᓯ ᑭᔮᓇᐤ ᑭ ᑲ ᐸᑭᑎᓀᑖᓇᐤ ᑭ ᐱᒫᑎᓯᐃᐧᓂᓇᐤ ᐅᒋᐋᐧᒥᒫᐊᐧᐠ ᐅᐦᒋ.
[17] ᒫᑲ ᐊᐃᐧᔭᐠ ᐁ ᐊᔮᐟ ᐊᐢᑭᐃᐧ ᒥᔪ ᐊᔮᐃᐧᓇ ᐁᑯᓯ ᐋᐧᐸᒫᒋ ᐅᒋᐋᐧᒪ ᐁ ᑭᐧᑕᒫᔨᐟ ᑭᐸᐦᐊᒪᐋᐧᒋ ᒫᑲ ᐅ ᑭᓭᐋᐧᑎᓯᐃᐧᐣ, ᑖᓂᓯ ᐃᓯ ᐃᐧᔭ ᐁᐊᐧᑯ ᐁᓯ ᑭᑭᐢᑳᑯᐟ ᐅ ᓵᑭᐦᐃᐁᐧᐃᐧᓂᔨᐤ ᑭᓭᒪᓂᑐᐊᐧ?
[18] ᐊᐱᐢᑕᐋᐧᓯᓯᑎᐠ ᐁᑳᐃᐧᔭ ᓵᑭᐦᐃᐁᐧᑖᐠ ᐃᑌᐧᐃᐧᓇᕽ ᐊᐦᐳ ᒥᑌᔭᓂ ᐅᐦᒋ; ᒫᑲ ᐃᓯᐦᒋᑫᐃᐧᓂᕽ ᒥᓇ ᑖᐯᐧᐃᐧᓂᕽ.
[19] ᐁᑯᑕ ᐅᐦᒋ ᑭ ᑲ ᑭᐢᑫᔨᑌᓈᓇᐤ ᑖᐯᐧᐃᐧᓂᕽ ᐁ ᐃᐧᒋᐃᐁᐧᔭᕽ ᒥᓇ ᑭ ᑲ ᑫᒋᓈᑖᓈᓇᐤ ᑭᑌᐦᐃᓇᐊᐧ ᐁ ᐃᓯ ᐋᐧᐸᒥᑯᔭᕽ,
[20] ᐃᑕ ᐊᓂᒪ ᑭ ᑌᐃᓇᐤ ᐁ ᓇᓂᐳᒥᑯᔭᕽ; ᒋᑫᒫ ᑭᓭᒪᓂᑐ ᐊᔨᐋᐧᐠ ᑭᐦᒑᔨᐃᐧᐤ ᐃᔨᑯᕽ ᐃᐧᔭ ᑭᑌᐦᐃᓇᐤ ᒥᓇ ᑭᐢᑫᔨᑕᑦ ᑲᐦᑭᔭᐤ ᑫᑲᐧᐩ.
[21] ᓯᔮᑭᐦᐃᑕᑯᐠ ᑭᐢᐱᐣ ᑭᑌᐦᐃᓇᐤ ᓇᒪᐃᐧᔭ ᑭ ᓇᓂᐳᒥᑯᓈᓇᐤ, ᑭ ᓱᑫᔨᒧᑐᑕᐋᐧᓇᐤ ᑭᓭᒪᓂᑐ;
[22] ᒥᓇ ᐱᑯ ᑫᑲᐧᐩ ᐁ ᓇᑐᑕᒪᐋᐧᔭᕽ ᑭ ᒥᔨᑯᓇᐤ, ᒋᑫᒫ ᐁ ᑲᓇᐁᐧᔨᑕᒫᐧᔭᕽ ᐅᔭᓱᐁᐧᐃᐧᓇ ᒥᓇ ᐁ ᐃᑐᑕᒪᕽ ᐊᓂᐦᐃ ᑳ ᒥᔮᐧᐱᓯᒥᑯᐟ.
[23] ᐁᐊᐧᑫᐧᔨᐤ ᒫᑲ ᐅᒪ ᐅᔭᓱᐁᐧᐃᐧᐣ ᑭᑕ ᑖᐯᐧᑕᒫᐧᔭᕽ ᐅ ᐃᐧᔪᐃᐧᓂᔨᐤ ᐅᑯᓯᓴ ᒋᓴᐢ ᙭ ᒥᓇ ᑭᑕ ᓵᑭᐦᐃᑐᔭᕽ ᑳ ᑭ ᐃᓯ ᒥᔨᑯᔭᕽ ᐅᔭᓱᐁᐧᐃᐧᐣ.
[24] ᐊᓂᐦᐃ ᒫᑲ ᑳ ᑲᓇᐁᐧᔨᑕᒥᔨᐟ ᐅᔭᓱᐁᐧᐃᐧᓇ ᑭᑭᐢᑳᐠ ᒥᓇ ᐃᐧᔭ ᑭᑭᐢᑲᐁᐧᐤ. ᐁᑯᑕ ᒫᑲ ᐅᐦᒋ ᑭ ᑭᐢᑫᔨᑌᓈᓇᐤ ᐁ ᑭᑭᐢᑳᑯᔭᕽ ᐊᐦᒑᐦᑲᐧ ᐅᐦᒋ ᑳ ᑭ ᒥᔨᑯᔭᕽ.