[1] ᓯᔮᑭᐦᐃᑕᑯᐠ ᐁᑳᐃᐧᔭ ᑖᐯᐧᑖᕽ ᑲᐦᑭᔭᐤ ᐊᐦᒑᕽ ᒫᑲ ᑲᑫᐧ ᑭᐢᑫᔨᒥᑯᐠ ᐊᐦᒑᐦᑲᐧᐠ ᑭᐢᐱᐣ ᑭᓭᒪᓂᑐᕽ ᐁᐧᒋᐋᐧᑫᐧ; ᒋᑫᒫ ᒥᐦᒉᐟ ᑭᔮᐢᑭᐃᐧ ᐅᑭᐢᑭᐁᐧᐦᐃᑫᐊᐧᐠ ᐊᐢᑭᕽ ᐊᔮᐊᐧᐠ.
[2] ᐁᑯᑕ ᐅᒪ ᐅᐦᒋ ᑭᐢᑫᔨᒥᕽ ᑭᓭᒪᓂᑐ ᐅᐟ ᐊᐦᒑᐦᑲᐧ; ᑲᐦᑭᔭᐤ ᐊᐦᒑᕽ ᑳ ᐋᒋᒧᐟ ᒋᓴᐢ ᙭ ᐁ ᑭ ᑕᑯᓯᕽ ᐃᐧᔮᓯᕽ ᑭᓭᒪᓂᑐᕽ ᐅᐦᒋᐤ;
[3] ᒥᓇ ᑲᐦᑭᔭᐤ ᐊᐦᒑᕽ ᐁᑳ ᑳ ᐋᒋᒫᐟ ᒋᓴᓴ ᓇᒪᐃᐧᔭ ᑭᓭᒪᓂᑐᕽ ᐅᐦᒋᐤ; ᐁᐊᐧᑯᓂ ᒫᑲ ᐅᐟ ᐊᐦᒑᐦᑲᐧ ᐋᐣᑎ᙭ ᑳ ᑭ ᐯᐦᑕᒣᐠ ᐁ ᐯ ᐃᑐᐦᑌᔨᐟ; ᓵᓴᐩ ᒫᑲ ᐊᐢᑭᕽ ᐊᔮᐤ.
[4] ᑭᔭᐋᐧᐤ ᑭᓭᒪᓂᑐᕽ ᑯᐦᒋᓈᐋᐧᐤ ᐊᐱᐢᑕᐋᐧᓯᓯᑎᐠ ᒥᓇ ᑭ ᑭ ᓵᑯᒋᐋᐋᐧᐊᐧᐠ; ᒋᑫᒫ ᐊᐊᐧᓯᒣ ᑭᐦᒑᔨᐃᐧᐤ ᐊᓇ ᑳ ᑭᑭᐢᑳᑯᔦᐠ ᐃᔨᑯᕽ ᐊᓇ ᐊᐢᑭᕽ ᑳ ᐊᔮᐟ.
[5] ᐃᐧᔭᐋᐧᐤ ᐊᐢᑭᕽ ᐅᐦᒋᐊᐧᐠ; ᐁᐊᐧᑯ ᐅᐦᒋ ᐊᐢᑭᕽ ᐃᓯ ᐱᑭᐢᑫᐧᐊᐧᐠ, ᒥᓇ ᓇᑐᑖᑲᐧᐠ ᐊᐢᑭ.
[6] ᑭᔮᓇᐤ ᐃᐧᔭ ᑭᓭᒪᓂᑐᕽ ᑯᐦᒋᓈᓇᐤ; ᐊᓇ ᑳ ᑭᐢᑫᔨᒫᐟ ᑭᓭᒪᓂᑐᐊᐧ ᑭ ᓇᑐᐦᑕᑰᓇᐤ; ᐊᓇ ᐁᑳ ᑭᓭᒪᓂᑐᕽ ᑳ ᐅᐦᒋᐟ ᓇᒪᐃᐧᔭ ᑭ ᓇᑐᐦᑖᑯᓇᐤ. ᐅᒫ ᐅᐦᒋ ᑭ ᑭᐢᑫᔨᒫᓇᐤ ᑖᐯᐧᐃᐧᓂ ᐊᐦᒑᕽ ᒥᓇ ᐊᐧᓂᓯᓄᐃᐧ ᐊᐦᒑᕽ.
[7] ᓯᔮᑭᐦᐃᑕᑯᐠ, ᓵᑭᐦᐃᑐᑖᐠ; ᒋᑫᒫ ᓵᑭᐦᐃᐁᐧᐃᐧᐣ ᑭᓭᒪᓂᑐᕽ ᐅᐦᒋᒪᑲᐣ; ᑲᐦᑭᔭᐤ ᒫᑲ ᐊᐃᐧᔭᐠ ᑳ ᓵᑭᐦᐃᐁᐧᐟ ᓂᐦᑖᐃᐧᑭᐃᐠ ᑭᓭᒪᓂᑐᐊᐧ ᒥᓇ ᑭᐢᑫᔨᒣᐤ ᑭᓭᒪᓂᑐᐊᐧ.
[8] ᐊᓇ ᐁᑳ ᑳ ᓵᑭᐦᐃᐁᐧᐟ ᓇᒪᐃᐧᔭ ᑭᐢᑫᔨᒣᐤ ᑭᓭᒪᓂᑐᐊᐧ; ᒋᑫᒫ ᑭᓭᒪᓂᑐ ᓵᑭᐦᐃᐁᐧᐃᐧᓂᐃᐧᐤ.
[9] ᐁᑯᑕ ᐅᒪ ᑭᓭᒪᓂᑐ ᑳ ᑭ ᓄᑯᑖᐟ ᐁ ᓵᑭᐃᑯᔭᕽ, ᐁ ᑭ ᐃᓯᑎᓴᐋᐧᐟ ᑭᓭᒪᓂᑐ ᐅ ᐯᔭᑯᑯᓯᓵᓇ ᐊᐢᑭᕽ ᐁᐊᐧᑯ ᑭᑕ ᐅᐦᒋ ᐱᒫᑎᓯᔭᕽ.
[10] ᐁᐊᐧᑯ ᐅᒪ ᓵᑭᐦᐃᐁᐧᐃᐧᐣ, ᓇᒪᐃᐧᔭ ᐁ ᑭ ᓵᑭᐋᔭᕽ ᑭᓭᒪᓂᑐ, ᒫᑲ ᐁ ᑭ ᓵᑭᐃᑯᔭᕽ ᐁᑯᓯ ᐁ ᑭ ᐃᓯᑎᓴᐋᐧᐟ ᐅᑯᓯᓴ ᑭᑕ ᑎᐸᐦᐃᑫᐢᑕᒫᑯᔭᕽ ᑭ ᒪᒋᑎᐃᐧᓂᓇᐊᐧ.
[11] ᓯᔮᑭᐦᐃᑕᑯᐠ, ᑭᐢᐱᐣ ᑭᓭᒪᓂᑐ ᐁᑯᓯ ᑭ ᑭ ᐃᓯ ᓵᑭᐃᑯᓇᐤ, ᑭᔮᓇᐤ ᒥᓇ ᑭ ᑲ ᓵᑭᐦᐃᑐᑖᓇᐤ.
[12] ᓇᒪᐃᐧᔭ ᐃᐧᑳᐨ ᐊᔨᓯᔨᓂᐤ ᑭ ᐅᐦᒋ ᐋᐧᐸᒣᐤ ᑭᓭᒪᓂᑐᐊᐧ; ᑭᐢᐱᐣ ᑭ ᓵᑭᐦᐃᑐᓈᓇᐤ ᑭᓭᒪᓂᑐ ᑭ ᑭᑭᐢᑳᑯᓇᐤ ᒥᓇ ᐅ ᓵᑭᐦᐃᐁᐧᐃᐧᐣ ᑭ ᒥᑐᓂᑖᐧᑲᐃᐧᓈᓇᐤ;
[13] ᐅᑕ ᑯᐦᒋ ᑭᐢᑫᔨᑌᓈᓇᐤ ᐁ ᑭᑭᐢᑳᑯᔭᕽ ᒥᓇ ᐁ ᑭᑭᐢᑲᐋᐧᔭᕽ ᒋᑫᒫ ᐁ ᑭ ᒥᔨᑯᔭᕽ ᐅᐟ ᐊᐦᒑᐦᑲᐧ.
[14] ᐁᑯᓯ ᑭ ᑭ ᐋᐧᐸᑌᓈᓇᐤ ᒥᓇ ᑭᐟ ᐋᑐᑌᓈᓇᐤ ᐁᐧᔪᑖᐃᐧᕽ ᐁ ᑭ ᐃᓯᑎᓴᐋᐧᐟ ᐅᑯᓯᓴ ᑭᑕ ᐱᒫᒋᑖᔨᐟ ᐊᐢᑭ.
[15] ᐱᑯ ᐊᐃᐧᔭᐠ ᒫᑲ ᑫ ᐋᑐᑕᒧᑫᐧ ᒋᓴᐢ ᐁᐊᐧᑯ ᑭᓭᒪᓂᑐ ᐅᑯᓯᓴ, ᑭᓭᒪᓂᑐᐊᐧ ᑭᑭᐢᑲᐁᐧᐤ ᒥᓇ ᑭᑭᐢᑳᐠ ᑭᓭᒪᓂᑐᐊᐧ.
[16] ᐁᑯᓯ ᑭ ᑭᐢᑫᔨᑌᓈᓇᐤ ᒥᓇ ᑭ ᑭ ᑖᐯᐧᑌᓈᓇᐤ ᐊᓂᒪ ᑳ ᑭ ᐃᓯ ᓵᑭᐃᑯᔭᕽ ᑭᓭᒪᓂᑐ. ᑭᓭᒪᓂᑐ ᓵᑭᐦᐃᐁᐧᐃᐧᓂᐃᐧᐤ; ᒥᓇ ᐊᓇ ᓵᑭᐦᐃᐁᐧᐃᐧᓂᕽ ᑳ ᐊᔮᐟ ᑭᑭᐢᑳᐠ ᑭᓭᒪᓂᑐᐊᐧ ᒥᓇ ᑭᑭᐢᑲᐁᐧᐤ ᑭᓭᒪᓂᑐᐊᐧ.
[17] ᐁᑯᑕ ᐅᒪ ᓵᑭᐦᐃᐁᐧᐃᐧᐣ ᑭ ᒪᒥᑐᓂᑖᐧᑲᐃᐧᓈᓇᐤ, ᑭᑕ ᐊᔮᔭᕽ ᓱᑫᔨᒧᐃᐧᐣ ᐅᔭᓱᐁᐧᐃᐧ ᑭᓯᑳᑭ; ᒋᑫᒫ ᑳ ᐃᓯ ᐊᔮᐟ ᐁᑯᓯ ᒥᓇ ᑭᐟ ᐃᓯ ᐊᔮᓈᓇᐤ ᐅᑕ ᐊᐢᑭᕽ.
[18] ᓇᒪᐃᐧᔭ ᐃᐦᑕᑲᐧᐣ ᐊᐢᑖᓯᐃᐧᐣ ᓵᑭᐦᐃᐁᐧᐃᐧᓂᕽ ᐃᐧᔭ; ᒫᑲ ᐁ ᒥᑐᓂ ᐊᔮᐠ ᓵᑭᐦᐃᐁᐧᐃᐧᐣ ᐊᐧᔭᐃᐧᐁᐧᐱᓂᒧᒪᑲᐣ ᐊᐢᑖᓯᐃᐧᐣ ᒋᑫᒫ ᐊᐢᑖᓯᐃᐧᐣ ᐃᐧᔭ ᑯᑕᑭᐦᐃᐁᐧᐤ; ᐁᑯᓯ ᐊᓇ ᑳ ᐊᐢᑖᓯᐟ ᓇᒪᐃᐧᔭ ᒪᒥᑐᓂᐋᐤ ᓵᑭᐦᐃᐁᐧᐃᐧᓂᕽ.
[19] ᑭ ᓵᑭᐋᓇᐤ ᒋᑫᒫ ᐃᐧᔭ ᓂᑳᐣ ᐁ ᑭ ᓵᑭᐃᑯᔭᕽ.
[20] ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐃᑌᐧᒋ, ᓂ ᓵᑭᐦᐋᐤ ᑭᓭᒪᓂᑐ, ᐸᑳᐧᑖᒋ ᒫᑲ ᐅᒋᐋᐧᒫ, ᑭᔮᐢᑭᐤ; ᒋᑫᒫ ᐊᓇ ᐁᑳ ᑳ ᓵᑭᐋᐟ ᐅᒋᐋᐧᒪ ᑳ ᑭ ᐋᐧᐸᒫᐟ, ᓇᒪᐃᐧᔭ ᑭᑕ ᑭ ᓵᑭᐋᐟ ᑭᓭᒪᓂᑐᐊᐧ ᐁᑳ ᑳ ᑭ ᐅᐦᒋ ᐋᐧᐸᒫᐟ.
[21] ᐁᑯᓯ ᐅᒪ ᐅᔭᓱᐁᐧᐃᐧᐣ ᑭ ᑭ ᒥᔨᑯᓇᐤ, ᐊᓇ ᑳ ᓵᑭᐋᐟ ᑭᓭᒪᓂᑐᐊᐧ ᑭᑕ ᓵᑭᐋᐟ ᐅᒋᐋᐧᒪ ᒥᓇ.