<1 Corinthians ᓂᐢᑕᑦ ᑲᕒᐃᐣᑎᔭᓇ 13

[1] ᐋᑕ ᐱᑭᐢᑫᐧᔮᓂ ᐅᑌᔭᓂᐋᐧᐤ ᐅᐦᒋ ᐊᔨᓯᔨᓂᐊᐧᐠ ᒥᓇ ᐅᑭᓯᑯᐊᐧᐠ, ᒫᑲ ᐁᑳ ᐊᔮᔮᓂ ᓵᑭᐦᐃᐁᐧᐃᐧᐣ, ᑖᐱᐢᑯᐨ ᐅᓵᐋᐧᐱᐢᐠ ᑳ ᐯᑖᑲᐧᕽ ᓂᐟ ᐃᑌᔨᑖᑯᓯᐣ, ᐊᐦᐳ ᑭᑐᐁᐧᔮᐱᐢᑲᐃᑲᐣ.

[2] ᒥᓇ ᐋᑕ ᐃᓯ ᒥᔨᑯᐃᐧᓯᔭᓂ ᑭᑕ ᑭᐢᑭᐁᐃᑫᔮᐣ, ᒥᓇ ᓂᓯᑐᐦᑕᒫᓂ ᑲᐦᑭᔭᐤ ᑳ ᒫᒪᐢᑳᑎᑲᐧᕽ ᒥᓇ ᑲᐦᑭᔭᐤ ᑭᐢᑫᔨᑕᒧᐃᐧᐣ; ᒥᓇ ᑭᐢᐱᐣ ᐊᔮᔮᓂ ᑲᐦᑭᔭᐤ ᑖᐯᐧᔦᔨᑕᒧᐃᐧᐣ, ᑭᑕ ᑲᐢᑭᑖᔮᐣ ᑭᑕ ᐋᑕᐢᑖᔮᐣ ᐋᐧᒋᔭ, ᒫᑲ ᐁᑳ ᐊᔮᔮᓂ ᓵᑭᐦᐃᐁᐧᐃᐧᐣ, ᓇᒪ ᑫᑲᐧᐩ ᓂᐟ ᐃᑕᑭᓱᐣ.

[3] ᒥᓇ ᐋᑕ ᒣᑭᔮᓂ ᑲᐦᑭᔭᐤ ᑫᑲᐧᐩ ᑳ ᐊᔮᔮᐣ ᑭᑕ ᐊᓴᒪᑭᐠ ᐅᑭᑎᒫᑭᓯᐊᐧᐠ, ᒥᓇ ᐋᑕ ᐸᑭᑎᓇᒫᓂ ᓂᔭᐤ ᑭᑕ ᐃᐢᑳᐧᓯᑳᑌᐠ, ᒫᑲ ᐁᑳ ᐊᔮᔮᓂ ᓵᑭᐦᐃᐁᐧᐃᐧᐣ, ᓇᒪ ᓈᐣᑕᐤ ᓂᐟ ᐃᓯ ᐋᐸᒋᐃᑯᐣ.

[4] ᓵᑭᐦᐃᐁᐧᐃᐧᐣ ᑭᓀᐧᐢ ᓯᐯᔨᑕᒧᒪᑲᐣ, ᒥᓇ ᑭᓭᐋᐧᑎᓯᒪᑲᐣ; ᓵᑭᐦᐃᐁᐧᐃᐧᐣ ᓇᒪᐃᐧᔭ ᐃᓴᐋᐧᓇᑫᔨᑕᒧᒪᑲᐣ; ᓵᑭᐦᐃᐁᐧᐃᐧᐣ ᓇᒪᐃᐧᔭ ᓇᓂᑳᓀᔨᒥᓱᒪᑲᐣ, ᓇᒪᐃᐧᔭ ᑭᐢᑌᔨᒧᒪᑲᐣ,

[5] ᓇᒪ ᓈᐣᑕᐤ ᐃᓯ ᒫᔨ ᐋᐧᐸᐦᑕᐦᐃᐁᐧᒪᑲᐣ, ᓇᒪᐃᐧᔭ ᐯᔭᑫᐧᔨᒥᓱᒪᑲᐣ, ᓇᒪᐃᐧᔭ ᑭᔨᐱ ᑭᓯᒫᐤ, ᓇᒪᐃᐧᔭ ᒪᒋ ᓇᑐᓇᑦ;

[6] ᓇᒪᐃᐧᔭ ᒥᔭᐋᐧᑕᒧᒪᑲᐣ ᒪᒋᑐᑕᒧᐃᐧᓂᕽ, ᒫᑲ ᑖᐯᐧᐃᐧᓂᕽ ᒥᔭᐋᐧᑕᒧᒪᑲᐣ;

[7] ᑲᐦᑭᔭᐤ ᑫᑲᐧᐩ ᓇᔭᑕᒧᒪᑲᐣ, ᑲᐦᑭᔭᐤ ᑫᑲᐧᐩ ᑖᐯᐧᑕᒧᒪᑲᐣ, ᑲᐦᑭᔭᐤ ᑫᑲᐧᐩ ᐸᑯᓭᔨᑕᒧᒪᑲᐣ, ᑲᐦᑭᔭᐤ ᑫᑲᐧᐩ ᓴᓯᐯᔨᑕᒧᒪᑲᐣ.

[8] ᓵᑭᐦᐃᐁᐧᐃᐧᐣ ᓇᒪᐃᐧᑳᐨ ᓄᑌᐸᔨᐤ; ᒫᑲ ᑭᐢᐱᐣ ᐃᑕᑲᐧᑳᐧᐃᐧ ᑭᐢᑭᐁᐧᐦᐃᑫᐃᐧᓇ, ᑭᑕ ᒣᐧᐢᑕᑕᐋᐧᐸᒋᑳᑌᐊᐧ; ᑭᐢᐱᐣ ᐃᑕᑲᐧᑳᐧᐃᐧ ᐱᑭᐢᑫᐧᐃᐧᓇ, ᑭᑕ ᐳᓂᐸᔨᐊᐧ; ᑭᐢᐱᐣ ᐁᑕᑲᐧᓄᑫᐧ ᑭᐢᑫᔨᑕᒧᐃᐧᐣ, ᑭᑕ ᒣᐧᐢᑕᑕᐁᐧᔨᒋᑳᑌᐤ.

[9] ᒋᑫᒫ ᐸᐦᑭ ᑭ ᑭᐢᑫᔨᑌᓈᓇᐤ, ᒥᓇ ᐸᐦᑭ ᑭ ᑭᐢᑭᐁᐧᐦᐃᑳᓈᓇᐤ:

[10] ᒫᑲ ᐃᐢᐱ ᐊᓂᒪ ᒥᑐᓂ ᑳ ᑭᓯᒋᑳᑌᐠ ᐅᑎᐦᒋᐸᔨᑭ, ᐁᑲᐧ ᐊᓂᒪ ᐸᐦᑭ ᐱᑯ ᑳ ᐊᔮᐠ ᑫ ᐳᓂᐸᔨᐠ.

[11] ᒣᑳᐧᐨ ᐁ ᐊᐋᐧᓯᓯᐃᐧᔮᐣ, ᑖᐱᐢᑯᐨ ᐊᐋᐧᓯᐢ ᓂ ᑭ ᐃᓯ ᐱᑭᐢᑳᐧᐣ, ᑖᐱᐢᑯᐨ ᐊᐋᐧᓯᐢ ᓂ ᑭ ᐃᓯ ᒧᓯᐅᐣ, ᑖᐱᐢᑯᐨ ᐊᐋᐧᓯᐢ ᓂ ᑭ ᐃᓯ ᒫᒥᑐᓀᔨᑌᐣ: ᒫᑲ ᐁᑲᐧ ᐁ ᑭᓵᐯᐃᐧᔮᐣ ᓂ ᑭ ᐁᐧᐱᓀᐣ ᐊᓂᐦᐃ ᑳ ᐊᐋᐧᓯᓯᐁᐧᔨᑖᑲᐧᑭ.

[12] ᒋᑫᒫ ᐊᓄᐦᐨ ᐋᐧᐸᒧᓂᕽ ᑭ ᐋᐧᐸᑌᓈᓇᐤ ᐊᑳᐋᐧᐨ; ᒫᑲ ᐁᑯᐢᐱ ᒥᑐᓂ ᒥᑳᐧᑲᓂᕽ; ᐊᓄᐦᐨ ᐸᐦᑭ ᓂ ᑭᐢᑫᔨᑌᐣ; ᒫᑲ ᐁᑯᐢᐱ ᓂ ᑲ ᑭᐢᑫᔨᑌᐣ ᑖᐱᐢᑯᐨ ᑳ ᐃᓯ ᑭᐢᑫᔨᒥᑲᐃᐧᔮᐣ.

[13] ᒫᑲ ᐁᑲᐧ ᐃᑕᑲᐧᓇᐧ ᑖᐯᐧᔦᔨᑕᒧᐃᐧᐣ, ᐊᐢᐯᔨᒧᐃᐧᐣ, ᓵᑭᐦᐃᐁᐧᐃᐧᐣ, ᐅᐦᐃ ᓂᐢᑐ; ᒫᑲ ᒫᐊᐧᒋ ᐁ ᓂᑳᓀᔨᑖᑲᐧᕽ ᐁᐊᐧᑯ ᓵᑭᐦᐃᐁᐧᐃᐧᐣ.