[1] ᐹᓬ ᑳ ᑭ ᓇᑐᒥᐦᐟ ᑭᑕ ᐅᐟ ᐊᐹᐢᑎᓬᐃᒥᐟ ᒋᓴᐢ ᙭ ᐁ ᐃᑌᔨᑕᕽ ᑭᓭᒪᓂᑐ, ᒥᓇ ᓵᐢᑎᓂᐢ ᑭᒋᐋᐧᒥᓇᐤ,
[2] ᑳ ᐅᑕᔭᒥᐋᐃᐧᔨᓂᒥᐟ ᑭᓭᒪᓂᑐ ᐊᓂᑕ ᑳᕒᐃᐣᐟ ᑳ ᐊᔮᔨᐟ, ᐊᓂᑭ ᐅᑎ ᑳ ᑲᓈᒋᐃᐦᒋᐠ ᙭ ᒋᓴᓯᕽ, ᐅᑲᓈᑎᓯᐊᐧᐠ ᑳ ᐃᓯᐃᐦᒋᐠ, ᐊᓯᒋ ᑲᐦᑭᔭᐤ ᑳ ᒪᐃᐧᒧᐢᑕᒫᐧᒋᐠ ᐅ ᐃᐧᔪᐃᐧᓂᔨᐤ ᑳ ᑎᐯᔨᒥᑯᔭᕽ ᒋᓴᐢ ᙭ ᒥᓯᐁᐧ ᐃᑕ, ᐃᐧᔭᐋᐧᐤ ᒥᓇ ᑭᔮᓇᐤ ᑳ ᑎᐯᔨᒥᑯᔭᕽ:
[3] ᓂᓱᑲᒫᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᑯᐋᐧᐤ ᑭᓭᒪᓂᑐ ᑯᑖᐃᐧᓇᐤ ᒥᓇ ᑳ ᑎᐯᔨᒥᑯᔭᕽ ᒋᓴᐢ ᙭.
[4] ᓂ ᓇᓈᐢᑯᒫᐤ ᓂ ᑭᓭᒪᓂᑐᑦ ᑳᑭᑫ ᑭᔭᐋᐧᐤ ᐅᐦᒋ, ᐅ ᓂᓱᑲᒫᑫᐃᐧᐣ ᐅᐦᒋ ᑭᓭᒪᓂᑐ ᑳ ᑭ ᒥᔨᑲᐃᐧᔦᐠ ᙭ ᒋᓴᐢ ᐁ ᐃᐧᒉᐋᐧᔦᐠ;
[5] ᑲᐦᑭᔭᐤ ᑫᑲᐧᐩ ᐁ ᑭ ᐃᓯ ᐁᐧᔪᒋ ᐅᐦᑎᓇᒫᑯᔦᐠ, ᑲᐦᑭᔭᐤ ᐱᑭᐢᑫᐧᐃᐧᓂᕽ ᒥᓇ ᑲᐦᑭᔭᐤ ᑭᐢᑫᔨᑕᒧᐃᐧᓂᕽ;
[6] ᐁᑯᓯ ᐅᐟ ᐋᒋᒧᐃᐧᐣ ᙭ ᑳ ᑭ ᐃᓯ ᓱᑲᐢᑕᒫᑲᐃᐧᔦᐠ:
[7] ᐁᑯᓯ ᓇᒪ ᓈᐣᑕᐤ ᒣᑭᐃᐧᐣ ᑭ ᓄᑌᐸᔨᓈᐋᐧᐤ; ᐁ ᐯᑖᐋᐧᔦᐠ ᐅ ᑭᐢᑫᔨᑖᑯᑫᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭;
[8] ᐁᐊᐧᑯ ᒥᓇ ᑫ ᐋᔮᒋᐃᑯᔦᐠ ᐱᔨᐢ ᑭᓯᐸᓄᕽ, ᐁᑳ ᑭᑖ ᐋᓀᐧᔨᑖᑯᓯᔦᐠ ᐃᐢᐱ ᐅ ᑭᓯᑳᒥᒋ ᑳ ᑎᐯᔨᒥᑯᔭᕽ ᒋᓴᐢ ᙭.
[9] ᑭᓭᒪᓂᑐ ᑖᐯᐧᐤ, ᑳ ᑭ ᐃᓯ ᓇᑐᒥᑯᔦᐠ ᐅ ᐃᐧᒉᐋᐧᑲᓂᑳᐃᐧᓂᔨᕽ ᐅ ᑯᓯᓴ ᒋᓴᐢ ᙭ ᑳ ᑎᐯᔨᒥᑯᔭᕽ.
[10] ᐁᑲᐧ ᒫᑲ ᑭ ᐸᑯᓭᔨᒥᑎᓈᐋᐧᐤ, ᓂᒋᐋᐧᒥᑎᐠ, ᐅ ᐃᐧᔪᐃᐧᓂᕽ ᑳ ᑎᐯᔨᒥᑯᔭᕽ ᒋᓴᐢ ᙭, ᑲᐦᑭᔭᐤ ᑭᑕ ᐯᔭᑯᑖᔦᐠ ᐁ ᐃᑌᐧᔦᐠ, ᒥᓇ ᐁᑳ ᐸᐢᑫᐃᐧᐦᐃᑐᐃᐧᓇ ᑭᑕ ᐊᔮᔦᐠ; ᒫᑲ ᑭᑕ ᒫᒪᐃᐧ ᒪᒥᑐᓂᐃᑲᐃᐧᔦᐠ ᐯᔭᐠ ᒪᒥᑐᓀᔨᒋᑲᓂᕽ ᒥᓇ ᐯᔭᐠ ᐅᔭᓱᐋᐧᓯᐁᐧᐃᐧᓂᕽ.
[11] ᒋᑫᒫ ᓂ ᑭ ᐋᒋᒧᐢᑖᑲᐧᐠ ᑭᔭᐋᐧᐤ ᐅᐦᒋ, ᓂᒋᐋᐧᒥᑎᐠ, ᐊᓂᑭ ᐃᐧᑭᕽ ᑲᓬᐅᐃ ᑳ ᐅᐦᒋᒋᐠ, ᒫᔨ ᐃᐧᒉᑐᐃᐧᓇ ᐁ ᐊᔮᔦᐠ.
[12] ᐁᐊᐧᑯ ᐅᒪ ᑳ ᐃᑕᒫᐣ, ᐁ ᐃᑕᓯᐟ ᐊᔨᓯᔨᓂᐤ ᐹᐱᑐᐢ ᑭᐟ ᐃᑖᐧᓈᐋᐧᐤ, ᓂᔭ ᐹᓬ ᓂ ᐃᐧᒉᐋᐧᐤ; ᐁᑲᐧ ᓂᔭ ᐊᐹᓬᐊᐢ ᓂ ᐃᐧᒉᐋᐧᐤ; ᐁᑲᐧ ᓂᔭ ᓯᐹᐢ ᓂ ᐃᐧᒉᐋᐧᐤ; ᐁᑲᐧ ᓂᔭ ᙭ ᓂ ᐃᐧᒉᐋᐧᐤ.
[13] ᓇᓈᓂᐢᒋ ᐊᔮᐤ ᒋ ᙭? ᐹᓬ ᒋ ᑳ ᑭ ᒋᐢᑕᐦᐋᐢᑳᐧᑎᐦᐟ ᑭᔭᐋᐧᐤ ᐅᐦᒋ? ᐊᐦᐳ ᒋ ᐹᓬ ᐅ ᐃᐧᔪᐃᐧᓂᕽ ᑳ ᑭ ᐹᑊᑕᐃᓯᐃᐧᐃᑲᐃᐧᔦᐠ?
[14] ᓂ ᓇᓈᐢᑯᒫᐤ ᑭᓭᒪᓂᑐ ᓇᒪᐋᐧᐨ ᐊᐃᐧᔭᐠ ᑯᐦᒋ ᐹᑊᑕᐃᓯᐃᐧᐦᐃᑎᓈᐋᐧᐤ, ᐱᑯ ᑲᕒᐃᐢᐸᐢ ᒥᓇ ᑫᔭᐢ;
[15] ᐁᑳ ᓈᐣᑕᐤ ᐊᔨᓯᔨᓂᐤ ᑭᑕ ᑭ ᐃᑌᐧᐟ ᐁ ᑭ ᐸᑊᑕᐃᓯᐃᐧᐃᑲᐃᐧᔦᐠ ᓂᔭ ᓂ ᐃᐧᔪᐃᐧᓂᕽ.
[16] ᒥᓇ ᓂ ᑭ ᐹᑊᑕᐃᓯᐃᐧᐃᒫᐊᐧ ᐁ ᐃᐦᑕᓯᔨᐟ ᐃᐧᑭᕽ ᐃᐢᑎᐸᓈᐢ: ᐊᔨᐋᐧᐠ, ᓇᒪᐃᐧᔭ ᓂ ᑭᐢᑫᔨᑌᐣ ᑳ ᐹᑊᑕᐃᓯᐃᐧᐋᐊᐧᑫ ᐊᐃᐧᔭᐠ ᑯᑕᐠ.
[17] ᒋᑫᒫ ᓇᒪᐃᐧᔭ ᑭᑕ ᐹᑊᑕᐃᓯᐃᐧᐃᐁᐧᔮᐣ ᑳ ᑭ ᐯ ᐃᓯᑎᓴᐦᐅᐟ ᙭. ᒫᑲ ᑭᑕ ᑲᑫᐢᑭᑫᒧᔮᐣ ᒥᔮᐧᒋᒧᐃᐧᐣ: ᓇᒪᐃᐧᔭ ᒥᓇ ᐃᔨᓂᓯᐃᐧ ᐊᔭᒥᐃᐧᓇ ᐅᐦᒋ, ᐁᑳ ᐅ ᐱᒥᑖᐢᑯᐃᑲᐣ ᙭ ᑭᑕ ᓄᑕᐤ ᐃᑕᑭᑌᐠ.
[18] ᒋᑫᒫ ᐁ ᑕᓯᑕᒥᕽ ᐱᒥᑖᐢᑯᐃᑲᐣ ᐱᑯᓇᑕ ᐃᑎᑕᒪᐧᐠ ᑳ ᓂᓯᐊᐧᓈᒋᐦᐅᒋᐠ; ᒫᑲ ᐃᐧᔭ ᑭᔮᓇᐤ ᑳ ᐱᒫᒋᐃᑲᐃᐧᔭᕽ ᐁᐊᐧᑯ ᐅ ᒪᐢᑲᐃᐧᓯᐃᐧᐣ ᑭᓭᒪᓂᑐ.
[19] ᒋᑫᒫ ᐃᑕᓯᓇᐦᐃᑳᑌᐤ, ᓂ ᑲ ᓂᓯᐊᐧᓈᒋᑖᐋᐧᐣ ᐅᐟ ᐃᔨᓂᓯᐃᐧᐣ ᑳ ᐃᔨᓂᓯᐟ, ᒥᓇ ᐅᐟ ᐊᔮᑳᐧᒥᓯᐃᐧᐣ ᑳ ᐊᔮᑳᐧᒥᓯᐟ ᓂ ᑲ ᐋᑕᐁᐧᔨᑕᒫᐧᐣ.
[20] ᑖᓂᐋᐧ ᑳ ᐃᔨᓂᓯᐟ? ᑖᓂᐋᐧ ᒪᓯᓇᐦᐃᑫᐃᐧᔨᓂᐤ? ᑖᓂᐋᐧ ᑳ ᐋᔮᓯᑌᒥᐁᐧᐟ ᐅᑕ ᐊᐢᑭᕽ? ᓇᒪ ᒋ ᑭᓭᒪᓂᑐ ᑭ ᐃᑕᑭᑕᑦ ᐱᑯᓇᑕ ᐊᐢᑭᐃᐧ ᐃᔨᓂᓯᐃᐧᐣ?
[21] ᒋᑫᒫ ᐁ ᐋᐧᐸᐦᑕᒥᕽ ᐅᐟ ᐃᔨᓂᓯᐃᐧᓂᕽ ᑭᓭᒪᓂᑐ ᐊᐢᑭ ᐁ ᐃᔨᓂᓯᒪᑲᕽ ᐅᐦᒋ ᓇᒪᐃᐧᔭ ᑭ ᑭᐢᑫᔨᒥᐠ ᑭᓭᒪᓂᑐ, ᑭ ᐃᓯ ᒥᔦᐧᔨᑕᑦ ᑭᓭᒪᓂᑐ ᐁ ᐃᓯ ᐁᑳ ᐃᔨᓂᓯᐃᐧᓂᐋᐧᕽ ᑲᑫᐢᑫᐧᐃᐧᐣ ᑭᑕ ᐱᒫᒋᐦᐋᐟ ᐊᓂᐦᐃ ᑳ ᑖᐯᐧᑕᒥᔨᐟ.
[22] ᒋᑫᒫ ᒍᐊᐧᐠ ᓇᑕᐁᐧᔨᑕᒪᐧᐠ ᑭᐢᑭᓇᐋᐧᒋ ᐋᐧᐸᐦᑕᐦᐃᐁᐧᐃᐧᓇ, ᒥᓇ ᑲᕒᐃᑲᐠ ᓇᑐᓇᒪᐧᐠ ᐃᔨᓂᓯᐃᐧᐣ:
[23] ᒫᑲ ᓂ ᑲᑫᐢᑭᒥᐋᐧᓈᐣ ᙭ ᑳ ᑭ ᒋᐢᑕᐦᐋᐢᑳᐧᑎᐦᐟ, ᒍᐊᐧᐠ ᐃᐧᔭ ᐁᐊᐧᑫᐧᔨᐤ ᐱᓱᑫᓯᓄᐃᐧᐣ, ᐁᑯᓯ ᒉᐣᑕᐃᓬᐊᐠ ᐃᐧᔭ ᐁᑳ ᑳ ᐃᔨᓂᓯᐊᐧᑫᔨᑕᐦᑭᐠ;
[24] ᒫᑲ ᐃᐧᔭ ᐊᓂᑭ ᑳ ᓇᑐᒥᐦᒋᐠ, ᑖᐱᐢᑯᐨ ᒍᐊᐧᐠ ᒥᓇ ᑲᕒᐃᑲᐠ, ᙭ ᐅ ᒪᐢᑲᐃᐧᓯᐃᐧᐣ ᑭᓭᒪᓂᑐ ᒥᓇ ᐅᐟ ᐃᔨᓂᓯᐃᐧᐣ ᑭᓭᒪᓂᑐ.
[25] ᒋᑫᒫ ᐊᓂᒪ ᐁᑳ ᑳ ᐃᔨᓂᓯᐊᐧᑫᔨᒥᐦᐟ ᑭᓭᒪᓂᑐ ᐊᐊᐧᓯᒣ ᐃᔨᓂᓯᐤ ᐃᔨᑯᕽ ᐊᔨᓯᔨᓂᐤ; ᒥᓇ ᐅ ᓀᓱᐃᐧᓯᐃᐧᐣ ᑭᓭᒪᓂᑐ ᐊᐊᐧᓯᒣ ᒪᐢᑲᐃᐧᓯᒪᑲᓂᔨᐤ ᐃᔨᑯᕽ ᐊᔨᓯᔨᓂᐊᐧᐠ.
[26] ᒋᑫᒫ ᐋᐧᐸᐦᑕᒧᐠ ᑳ ᐃᓯ ᓇᑐᒥᑲᐃᐧᔦᐠ, ᓂᒋᐋᐧᒥᑎᐠ, ᐊᓂᒪ ᐁᑳ ᒥᐦᒉᐟ ᑳ ᐃᔨᓂᓯᒋᐠ ᐃᐧᔮᓯᐃᐧᓂᕽ ᐃᓯ, ᐁᑳ ᒥᐦᒉᐟ ᐁ ᑭᐦᒑᔨᐃᐧᒋᐠ, ᐁᑳ ᒥᐦᒉᐟ ᐁ ᐅᑭᒫᐁᐧᔨᑖᑯᓯᒋᐠ, ᑳ ᓇᑐᒥᐦᒋᐠ:
[27] ᒫᑲ ᑭᓭᒪᓂᑐ ᑭ ᓇᐊᐧᓱᓇᑦ ᐁᑳ ᑳ ᐃᔨᓂᓯᐊᐧᑫᔨᑕᒥᕽ ᐊᐢᑭᕽ, ᑭᑕ ᓇᓀᐯᐃᐧᑖᐟ ᐊᓂᐦᐃ ᑳ ᐃᔨᓂᓯᒪᑲᑭ; ᒥᓇ ᑭᓭᒪᓂᑐ ᑭ ᓇᐊᐧᓱᓇᑦ ᑳ ᓀᓱᐊᐧᑭ ᐊᐢᑭᕽ, ᑭᑕ ᑭ ᓇᓀᐯᐃᐧᑕᐟ ᐊᓂᐦᐃ ᑳ ᒪᐢᑲᐃᐧᓯᒪᑲᑭ;
[28] ᒥᓇ ᓄᑕᐤ ᑳ ᐃᑕᑭᑌᑭ ᐅᑕ ᐊᐢᑭᕽ, ᒥᓇ ᐊᓂᐦᐃ ᑳ ᐱᐁᐧᔨᑖᑲᐧᑭ, ᑭᓭᒪᓂᑐ ᑭ ᓇᐊᐧᓱᓇᑦ, ᒥᓇ ᐊᐦᐳ ᐊᓂᐦᐃ ᐁᑳ ᑳ ᐊᔮᑭ, ᐁᑳ ᑭᑕ ᐃᑕᑲᐧᑭ ᐊᓂᐦᐃ ᑳ ᑭ ᐊᔮᑭ:
[29] ᐁᑳ ᐊᐃᐧᔭᐠ ᑳ ᐅ ᐃᐧᔮᓯᐟ ᑭᑕ ᒪᒥᐦᒋᒧᐟ ᐁ ᐃᓯ ᑭᑖᐸᑕᕽ ᑭᓭᒪᓂᑐ.
[30] ᒫᑲ ᐁᐊᐧᑯ ᐅᐦᒋ ᑭᐟ ᐊᔮᓈᐋᐧᐤ ᙭ ᒋᓴᓯᕽ, ᐊᓇ ᑳ ᑭ ᐃᓯᐃᑯᐟ ᑭᓭᒪᓂᑐᐊᐧ ᑭᔮᓇᐤ ᐅᐦᒋ ᐃᔨᓂᓯᐃᐧᐣ, ᒥᓇ ᑲᐧᔭᐢᑭᑖᑎᓯᐃᐧᐣ ᒥᓇ ᑲᓈᑎᓯᐃᐧᐣ, ᒥᓇ ᑎᐸᐦᐃᑫᐢᑕᒫᑫᐃᐧᐣ:
[31] ᐁᑯᓯ ᒫᑲ, ᑳ ᐃᑕᓯᓇᐦᐃᑳᑌᐠ, ᐊᓇ ᑳ ᒪᒥᒋᒧᐟ, ᑭᔮᑦ ᑳ ᑎᐯᔨᐦᒋᑫᔨᐟ ᑭᑕ ᒪᒥᐦᒋᒣᐤ.