[1] 97 ᒋᑫᒫ ᓇᒪᐃᐧᔭ ᓂ ᓇᑕᐁᐧᔨᑌᐣ, ᓂᒋᐋᐧᒥᑎᐠ, ᑭᑕ ᐁᑳ ᑭᐢᑫᔨᑕᒣᐠ, ᑖᓂᓯ ᑯᑖᐃᐧᓇᐊᐧᐠ ᑲᐦᑭᔭᐤ ᓯᐸ ᐊᐧᐢᑯᕽ ᐁ ᑭ ᐊᔮᒋᐠ, ᒥᓇ ᑲᐦᑭᔭᐤ ᐁ ᑭ ᓵᐳᐢᑲᑭᐠ ᑭᐦᒋᑲᒥ;
[2] ᐁᑯᓯ ᑲᐦᑭᔭᐤ ᐁ ᑭ ᐸᑊᑕᐃᓯᐃᐧᒋᐠ ᒧᓯᐢ ᐃᓯ ᐊᐧᐢᑯᕽ ᒥᓇ ᑭᐦᒋᑲᒥᕽ;
[3] ᒥᓇ ᑲᐦᑭᔭᐤ ᐁ ᑭ ᒥᒋᒋᐠ ᐁ ᐯᔭᑲᐧᕽ ᐊᐦᒑᐦᑯᐃᐧ ᒥᒋᐃᐧᐣ;
[4] ᒥᓇ ᑲᐦᑭᔭᐤ ᐁ ᑭ ᒥᓂᑫᐧᒋᐠ ᐁ ᐯᔭᑲᐧᕽ ᐊᐦᒑᐦᑯᐃᐧ ᒥᓂᑫᐧᐃᐧᐣ: ᒋᑫᒫ ᑭ ᒥᓂᑳᐧᑐᑕᒪᐧᐠ ᐊᓂᒪ ᐊᐦᒑᐦᑯᐃᐧ ᑭᐢᑖᐱᐢᑯᕽ ᐁ ᐅᐦᒋᐠ ᑳ ᐱᒥᑎᓴᐅᑯᒋᐠ: ᐊᓇ ᒫᑲ ᑭᐢᑖᐱᐢᐠ ᐁᐊᐧᑯ ᙭.
[5] ᐁᔨᐁᐧᕽ ᒫᑲ ᐅᓵᑦ ᐱᑯ ᓇᒪᐃᐧᔭ ᑭ ᒥᔪᔭᐁᐧᐁᐊᐧᐠ ᑭᓭᒪᓂᑐᐊᐧ: ᐁᑯᓯ ᑭ ᓂᓯᐊᐧᓈᒋᐃᑲᐧᐠ ᐱᑲᐧᑕᐢᑭᕽ.
[6] ᐅᐦᐃ ᒫᑲ ᑭᔮᓇᐤ ᑭ ᑲᑫᐢᑭᒥᑯᓈᓇᐤ, ᐁᑳ ᑭᔮᓇᐤ ᑭᑕ ᒧᐢᑕᐁᐧᔨᑕᒪᕽ ᒪᒋ ᑫᑲᐧᔭ, ᑖᐱᐢᑯᐨ ᐃᐧᔭᐋᐧᐤ ᑳ ᑭ ᐃᓯ ᒧᐢᑕᐁᐧᔨᑕᐦᑭᐠ.
[7] ᒥᓇ ᐁᑳᐃᐧᔭ ᑭᔭᐋᐧᐤ ᒪᓂᑐᑫᐢᑭᐠ, ᑖᐱᐢᑯᐨ ᐋᑎᐦᐟ ᐁᐊᐧᑯᓂᐠ; ᑳ ᐃᑕᓯᓇᐦᐃᑳᑌᐠ, ᐊᔨᓯᔨᓂᐊᐧᐠ ᑭ ᓇᐦᐊᐱᐊᐧᐠ ᑭᑕ ᒥᒋᓱᒋᐠ ᒥᓇ ᑭᑕ ᒥᓂᑫᐧᒋᐠ, ᐁᑯᓯ ᑭ ᐸᓯᑯᐊᐧᐠ ᑭᑕ ᒣᑕᐁᐧᒋᐠ.
[8] ᒥᓇ ᐁᑳᐃᐧᔭ ᐃᑐᑕᑖᐠ ᐱᓯᑳᐧᑎᓯᐃᐧᐣ, ᑖᐱᐢᑯᐨ ᐋᑎᐦᐟ ᑳ ᑭ ᐃᑐᑕᐦᑭᐠ, ᐁᑯᓯ ᑳ ᑭ ᐸᐦᑭᓯᐦᑭᐠ ᐯᔭᐠ ᑭᓯᑳᐤ ᓂᓯᑕᓇᐤ ᓂᐢᑐ ᐊᔨᐋᐧᐠ ᑕᐦᑐ ᑭᐦᒋ ᒥᑖᑕᐦᑐᒥᑕᓇᐤ.
[9] ᒥᓇ ᐁᑳᐃᐧᔭ ᑲᑫᐧᒋᐊᑖᐠ ᑳ ᑎᐯᔨᐦᒋᑫᐟ, ᑖᐱᐢᑯᐨ ᐋᑎᐦᐟ ᑳ ᑭ ᐃᓯ ᑲᑫᐧᒋᐋᒋᐠ, ᐁᑯᓯ ᑳ ᑭ ᓂᓯᐊᐧᓈᒋᐃᑯᒋᐠ ᑭᓀᐱᑲᐧ.
[10] ᒥᓇ ᐁᑳᐃᐧᔭ ᒥᐦᑕᐁᐧᐠ, ᑖᐱᐢᑯᐨ ᐋᑎᐦᐟ ᑳ ᑭ ᐃᓯ ᒥᐦᑕᐁᐧᒋᐠ, ᐁᑯᓯ ᑳ ᑭ ᓂᓯᐊᐧᓈᒋᐦᐃᑯᒋᐠ ᐅᓂᓯᐊᐧᓈᒋᐦᐃᐁᐧᐊᐧ.
[11] ᑲᐦᑭᔭᐤ ᒫᑲ ᐅᐦᐃ ᑭ ᐊᔨᐢᐸᔨᐃᑲᐧᐠ ᑭᑕ ᑲᑫᐢᑭᒧᐦᐃᑯᒋᐠ; ᒥᓇ ᑭ ᒪᓯᓇᐃᑳᑌᐊᐧ ᑭᔮᓇᐤ ᑭᑕ ᐊᔮᑳᐧᒥᒥᑯᔭᕽ, ᑳ ᐅᑎᐦᑎᑯᔭᕽ ᐁᑲᐧ ᐅᒪ ᐁ ᐊᑎ ᑲᑭᓯᒋᑫᐸᔨᐠ.
[12] ᐁᑯᓯ ᒫᑲ ᐊᓇ ᓂ ᓂᐸᐃᐧᐣ ᑳ ᐃᑌᔨᑕᕽ ᑭᑕ ᐊᔮᑳᐧᒥᓯᐤ ᐁᑳ ᑭᑕ ᐸᐦᑭᓯᕽ.
[13] ᓇᒪᐃᐧᔭ ᑫᑲᐧᐩ ᑲᑫᐧᒋᐃᑯᐃᐧᐣ ᑯᐦᒋ ᐅᑎᑎᓂᑯᓈᐋᐧᐤ ᐱᑯ ᑐᐊᐧ ᐊᔨᓯᔨᓂᐤ ᐁ ᑲᐢᑭᑖᐟ ᑭᑕ ᓂᐸᐃᐧᐢᑕᕽ: ᒫᑲ ᑭᓭᒪᓂᑐ ᑫᒋᓈ ᑭᑕ ᑭ ᐊᐢᐯᔨᒧᕽ, ᐁᐊᐧᑯ ᓇᒪᐃᐧᔭ ᑭ ᑲ ᐸᑭᑎᓂᑯᐋᐧᐤ ᑭᑕ ᑯᑌᔨᒥᑲᐃᐧᔦᐠ ᐊᐊᐧᓯᒣ ᐃᔨᑯᕽ ᐁ ᑲᐢᑭᑖᔦᐠ; ᒫᑲ ᑭᑭ ᐊᓂᒪ ᑯᑌᔨᒥᑯᐃᐧᐣ ᑭᑕ ᑕᐃᐧᓇᑦ ᑭᑕ ᑭ ᐃᓯ ᐸᐢᐱᔦᐠ, ᑭᑕ ᑭ ᒫᑲ ᐁᑳ ᓵᑯᒋᐃᑯᔦᐠ.
[14] ᐁᑯᓯ ᒫᑲ ᓯᔮᑭᐦᐃᑕᑯᐠ, ᑕᐸᓯᑖᐠ ᒪᓂᑐᑫᐃᐧᐣ.
[15] ᐁ ᐃᔨᓂᓯᒋᐠ ᐊᔨᓯᔨᓂᐊᐧᐠ ᑭᐟ ᐃᓯ ᑭᑐᑎᑎᓈᐋᐧᐤ; ᒫᒥᑐᓀᔨᑕᒧᐠ ᐅᒪ ᑳ ᐃᑌᐧᔮᐣ.
[16] ᑳ ᒥᔮᐧᑭᑌᐠ ᒥᓂᑳᐧᑲᐣ ᑳ ᒥᔭᐧᑭᑕᒫᕽ, ᓇᒪ ᒋ ᐁᐊᐧᑯ ᐁ ᒫᒪᐃᐧ ᐃᐧᒋᐃᐁᐧᕽ ᐅ ᒥᐦᑯ ᙭? ᐊᓇ ᐸᑫᐧᓯᑲᐣ ᑳ ᐸᑫᐧᓈᔮᕽ ᓇᒪ ᒋ ᐁᐊᐧᑯ ᐁ ᒫᒪᐃᐧ ᐃᐧᒋᐃᐁᐧᕽ ᐃᐧᔭᐃᐧᕽ ᙭?
[17] ᐃᐧᔭ ᑭᔮᓇᐤ ᐁ ᒥᐦᒉᑎᔭᕽ, ᐯᔭᐠ ᐸᑫᐧᓯᑲᐣ ᑭᐟ ᐃᓯ ᐊᔮᓈᓇᐤ, ᐯᔭᐠ ᒥᔭᐤ: ᒋᑫᒫ ᑲᐦᑭᔭᐤ ᑯᐦᑕᒫᓇᐤ ᐊᓇ ᐯᔭᐠ ᐸᑫᐧᓯᑲᐣ.
[18] ᒫᑎᑲ ᐃᐢᕒᐁᐃᓬ ᐊᔨᓯᔨᓂᕽ ᐃᓯ: ᓇᒪ ᒋ ᐊᓂᑭ ᑳ ᒥᒋᒋᐠ ᐸᑭᑎᓈᓱᐃᐧᓇ ᐅᐦᒋ ᒫᒪᐃᐧ ᐊᔮᐊᐧᐠ ᐸᑭᑎᓈᓱᐃᐧᓈᐱᐢᑯᕽ?
[19] ᑖᓂᓯ ᒫᑲ ᑳ ᐃᑌᐧᔮᐣ? ᐊᓂᒪ ᑳ ᐸᑭᑎᓈᓱᐢᑕᒫᐦᒋᐠ ᒪᓂᑐᑳᓇᐠ ᓈᐣᑕᐤ ᐁ ᐃᑖᐸᑕᕽ, ᐊᐦᐳ ᒪᓂᑐᑳᐣ ᓈᐣᑕᐤ ᐁ ᐃᑖᐸᑎᓯᐟ?
[20] ᒫᑲ ᓂᐟ ᐃᑖᐧᐣ, ᐊᓂᐦᐃ ᒉᐣᑕᐃᓬᐊᐠ ᑳ ᐸᑭᑎᓈᓱᒋᐠ, ᐸᑭᑎᓇᒪᐁᐧᐊᐧᐠ ᒪᒑᔭ, ᓇᒪᐃᐧᔭ ᑭᓭᒪᓂᑐᐊᐧ: ᐁᑯᓯ ᓇᒪᐃᐧᔭ ᓂ ᓇᑕᐁᐧᔨᑌᐣ ᑭᑕ ᐃᐧᒋ ᒫᒪᐃᐧ ᐊᔮᒫᔦᑯᐠ ᒪᒑᔭᐠ.
[21] ᓇᒪᐃᐧᔭ ᑭ ᑲ ᑭ ᒥᓂᑳᐧᓈᐋᐧᐤ ᐅ ᒥᓂᑳᐧᑲᐣ ᑳ ᑎᐯᔨᐦᒋᑫᐟ, ᒥᓇ ᐅ ᒥᓂᑳᐧᑲᓂᐋᐧᐤ ᒪᒑᔭᐠ: ᓇᒪᐃᐧᔭ ᑭ ᑲ ᑭ ᐃᐧᒋᐃᐋᐧᓈᐋᐧᐤ ᐅ ᒥᒋᓱᐃᐧᓈᑎᐠ ᑳ ᑎᐯᔨᐦᒋᑫᐟ, ᒥᓇ ᐅ ᒥᒋᓱᐃᐧᓈᑎᑯᐋᐧᐤ ᒪᒑᔭᐠ.
[22] ᑭᐟ ᐃᑐᑕᐋᐧᓇᐤ ᒋ ᑭᑕ ᐅᐦᑌᔨᒥᑯᔭᕽ ᑳ ᑎᐯᔨᐦᒋᑫᐟ? ᓇᐊᐧᐨ ᒋ ᑭᔮᓇᐤ ᑭ ᒪᐢᑲᐃᐧᓯᓈᓇᐤ ᐃᔨᑯᕽ ᐃᐧᔭ?
[23] ᑲᐦᑭᔭᐤ ᑫᑲᐧᐩ ᓇᒪᐃᐧᔭ ᑭᑕᐊᒫᑳᓂᐊᐧᐣ; ᒫᑲ ᓇᒪᐃᐧᔭ ᑲᐦᑭᔭᐤ ᑫᑲᐧᐩ ᓂ ᓇᐃᐢᑳᑯᐣ. ᑲᐦᑭᔭᐤ ᑫᑲᐧᐩ ᓇᒪᐃᐧᔭ ᑭᑕᐊᒫᑳᓂᐊᐧᐣ; ᒫᑲ ᓇᒪᐃᐧᔭ ᑲᐦᑭᔭᐤ ᑫᑲᐧᐩ ᐃᐧᒋᑖᓱᒪᑲᐣ.
[24] ᑭᔮᑦ ᐁᑳᐃᐧᔭ ᐊᐃᐧᔭᐠ ᐊᔨᓯᔨᓂᐤ ᑭᑕ ᓇᑐᓇᑦ ᐃᐧᔭ ᐱᑯ ᑎᐱᔭᐤ, ᒫᑲ ᑲᐦᑭᔭᐤ ᐃᐧᒋ ᐊᔨᓯᔨᓂᐊᐧ ᑭᑕ ᐃᓯ ᐋᐸᒋᐃᑯᔨᐟ
[25] ᐱᑯ ᑫᑲᐧᐩ ᐁ ᐊᑖᐋᐧᑫᕽ ᐃᐧᔮᓯᑲᒥᑯᕽ, ᒥᒋᐠ, ᐁᑳ ᑫᑲᐧᐩ ᐁ ᑲᑫᐧᒋᑫᒧᔦᐠ ᑭᐢᑫᔨᒥᓱᐃᐧᐣ ᐅᐦᒋ;
[26] ᒋᑫᒫ ᐊᐢᑭ ᑎᐯᔨᑕᑦ ᑳ ᑎᐯᔨᐦᒋᑫᐟ, ᒥᓇ ᐁ ᐃᓯ ᒧᐢᑭᓀᐠ.
[27] ᑭᐢᐱᐣ ᐊᐃᐧᔭᐠ ᐊᓂᑭ ᐁᑳ ᑳ ᑖᐯᐧᑕᐦᑭᐠ ᑭ ᐃᐧᑯᒥᑯᐋᐧᐤ ᐃᐧᐦᑯᐦᑐᐃᐧᓂᕽ, ᐁᑯᓯ ᑭ ᐃᐧ ᐃᑐᐦᑖᓈᐋᐧᐤ; ᐱᑯ ᑫᑲᐧᐩ ᐁ ᐅᔭᐢᑖᐧᑲᐃᐧᔦᐠ ᒥᒋᐠ, ᐁᑳ ᑫᑲᐧᐩ ᐁ ᑲᑫᐧᒋᑫᒧᔦᐠ ᑭᐢᑫᔨᒥᓱᐃᐧᐣ ᐅᐦᒋ.
[28] ᒫᑲ ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᐃᑎᑯᔦᑯ, ᐅᒪ ᑭ ᐸᑭᑎᓈᓱᓈᓂᐊᐧᐣ, ᐁᑳᐃᐧᔭ ᒥᒋᐠ, ᐊᓇ ᐅᐦᒋ ᑳ ᐃᐧᐦᑕᒫᐢᐠ, ᒥᓇ ᑭᐢᑫᔨᒥᓱᐃᐧᐣ ᐅᐦᒋ:
[29] ᑭᐢᑫᔨᒥᓱᐃᐧᐣ ᓂᐟ ᐃᑖᐧᐣ, ᓇᒪᐃᐧᔭ ᑭᔭ ᑎᐱᔭᐤ ᒫᑲ ᐊᓇ ᑯᑕᐠ; ᒋᑫᒫ ᑖᓀᑭ ᓂ ᑎᐯᔨᒥᓱᐃᐧᐣ ᑳ ᐅᔭᓱᐋᐧᑕᒥᕽ ᑯᑕᐠ ᐊᐃᐧᔭᐠ ᐅ ᑭᐢᑫᔨᒥᓱᐃᐧᐣ ᐅᐦᒋ?
[30] ᑭᐢᐱᐣ ᓂᔭ ᓂᓱᑲᒫᑯᐃᐧᐣ ᐅᐦᒋ ᓂ ᐃᐧᒋᐃᐋᐧᐣ, ᑖᓀᑭ ᓇᐢᐹᐨ ᑳ ᐃᑎᑲᐃᐧᔮᐣ ᐊᓂᒪ ᐅᐦᒋ ᑳ ᓇᓈᐢᑯᒧᔮᐣ?
[31] ᐁᑯᓯ ᒫᑲ ᑭᐢᐱᐣ ᑭ ᒥᒋᓱᓈᐋᐧᐤ, ᐊᐦᐳ ᑭ ᒥᓂᑳᐧᓈᐋᐧᐤ, ᐊᐦᐳ ᐱᑯ ᑫᑲᐧᐩ ᐁ ᐃᑐᑕᒣᐠ, ᑲᐦᑭᔭᐤ ᐃᑐᑕᒧᐠ ᐅ ᑭᐢᑌᔨᑖᑯᓯᐃᐧᓂᕽ ᑳ ᑎᐯᔨᐦᒋᑫᐟ.
[32] ᐁᑳᐃᐧᔭ ᑫᑲᐧᐩ ᐃᑐᑕᒧᐠ ᑭᑕ ᐅᐦᒋ ᐸᐦᑭᓯᐦᑭᐠ, ᓂᑯᑖᐧ ᒍᐊᐧᐠ, ᐊᐦᐳ ᑲᕒᐃᑲᐠ, ᐊᐦᐳ ᑳ ᐊᔭᒥᐦᐁᐢᑕᐋᐧᒋᐠ ᑭᓭᒪᓂᑐᐊᐧ:
[33] ᑖᐱᐢᑯᐨ ᓂᔭ ᒥᓇ ᑳ ᐃᐧ ᒥᔪᔭᐁᐧᐊᑭᐠ ᑲᐦᑭᔭᐤ ᐊᔨᓯᔨᓂᐊᐧᐠ ᒥᓯᐁᐧ ᐃᓯ, ᓇᒪᐃᐧᔭ ᐁ ᓇᑐᓇᒫᐣ ᓂᔭ ᑭᑕ ᐅᐦᑎᓯᔮᐣ, ᒫᑲ ᒥᐦᒉᐟ ᑭᑕ ᐃᓯ ᐅᐦᑎᓯᒋᐠ, ᑭᑕ ᑭ ᐱᒫᒋᐃᐦᒋᐠ.