[1] Pilate kī‑itasowēw simākanisa kita-wīkatētahāyit Jesusa ēkwa kita-pasastēhwāyit.
[2] simākanisak kī‑wāskānēnēwak okāminakasīwāhcikosa ē‑tēhtahācik ostikwāniyihk. ēkwa ē‑nīpāmāyātaniyik akohp kī‑akwanahwēwak ēsa.
[3] ēkwa ē‑pē-nātācik kā‑kīhtwām ē‑pasihkwēhwācik ēkwa ē‑itācik “kiya Jewak okihci-ōkimāmiwāwa; kika-wī-pimātisin kinwēs.”
[4] āsay mīna kīhtwām Pilate kī‑wayawīkāpawiw ēkwa ōmisi itēw Jewa, “pēhtamok, ōta kita-pē-itohtahāw kita-kiskēyihtamēk ēkāya kīkway kita-kī-ohci-wiyasiwātak.”
[5] ēkwa Jesus ēsa pē‑wayawīhtahāw ē‑kī-kikiskamōhiht okāminakasiya ēkwa ē‑akwanahoht ē‑nīpāmāyātaniyik akohp. Pilate itwēw ēsa, “wāpamihk, awīta awa nāpēw.”
[6] ispīhk kihci-ayamihēwiyiniwak mīna kā‑kanawēyihtahkik ayamihēwikamik ē‑wāpamācik, kī‑tēpwēwak ēsa ē‑itwēcik “nipah pimitāskwahikanihk! nipah pimitāskwahikanihk!” Pilate ēsa ōmisi itēw, “otinihk kiyawāw, ēkosi kika-nipahāwāw pimitāskwahikanihk. namōya nimiskēn kita-kī-ohci-wiyasiwātak.”
[7] Jewak ēsa ōmisi itwēwak, “nitayānān wiyasiwēwin ēkota itastēw piko kita-nipit, ayisk kī‑itwēw, ‘niya ōma okosisa kisē-manitow.’”
[8] ispīhk Pilate ē‑pēhtahk ōma ē‑itwēyit ayiwāk kī‑astāsiw ēsa.
[9] Pilate ēsa pīhtikwēw okimāwikamikohk ēkwa kakwēcimēw Jesusa, “tānitē ōma ē‑ohcīyan?” itēw ēsa. namōya ēsa wī‑naskwēwasimik.
[10] Pilate itēw ēsa, “tānēhki ēkāya kā‑wī-kitosiyan? okimānāhk ohci nimiyikawin sōhkisiwin kita-pakitinitān ahpō kita-cīstahāskwātikawiyan.”
[11] Jesus itēw ēsa, “namōya sōhkisiwin kitayān kita-tipēyimiyan, piko ispimihk ohci kita-miyikawiyan, ēkosi ana kā‑pakitinit nawac ayiwāk misihow maci-tōtamowinihk.”
[12] ēwako ōma ē‑pēhtahk Pilate kī‑kakwē-pakitinēw Jesusa. aniki Jewak tēpwēwak ēsa ē‑itwēcik, “kīspin pakitinaci, ēkosi ēsa ēkāya ē‑owīcēwākaniyan māmawēyas-kihci-okimāw. awiyak ē‑itwēt, ‘niya ōma kihci-okimāw’ ēwako ē‑māyēyimāt māmawēyas-kihci-okimāwa!”
[13] mayaw ē‑pēhtahk ōma ē‑itwēwiht Pilate pē‑wayawīhtahēw Jesusa ēkwa ē‑apit wiyasiwēwi-apiwinihk “mōcihk kā‑asinīwi-isihcikahtēk” kā‑itamihk. (Jewak otitwēwin “Gabbatha”.)
[14] kēkāc ē‑āpihtā-kīsikāk mwayēs ē-miyāskākēwi-wīhkohtohk. Pilate itēw ēsa ayisiyiniwa, “awīta kikihci-okimāmiwāw!”
[15] tēpwēwak ōki ē‑itwēcik, “nipah! nipah! cīstahāskwās!” Pilate kakwēcimēw, “ē‑nitawēyihtamēk cī kita-cīstahāskwātak kikihci-okimāmiwāw?” kihci-ayamihēwiyiniwak itēwak, “māmawēyas kihci-okimāw ana piko kā‑pimipayihikoyāhk,” itēwak ēsa.
[16] ēkosi nitawāc ē‑wī-nahēyihtamihāt Jewa, Pilate kī‑pakitinamawēw simākanisa kita-cīstahāskwātāyit. ēkosi simākanisak kī‑sipwēhtahēwak Jesusa.
[17] kī‑ati-wayawīhtahāw ē‑ati-nayōmāt opimitāskwahikana wayawītim-ōtēnāhk isi, nētē piyisk ē‑takohtēcik ispatināw “mistikwānikanihk” kā‑itamihk. (“Golgotha” Jewak otitwēwin kā-isiyihkātek.)
[18] ēkotē ēsa kā‑nipahācik ē‑sakahwācik pimitāskwahikanihk asici kotaka nīso nāpēwa, āh‑ayītaw ē‑akociniyit, wiya tāwāyihk Jesus.
[19] Pilate kī‑isīhcikēw kita-masinahamoht ōhi itwēwina, “Jesus Nazarethihk ohci, Jewak okihci-okimāmiwāwa.” ēkwa kī‑akwahikātēyiw pimitāskwahikanihk tahkohc ita Jesus kā‑sakahoht.
[20] mihcēt ayisiyiniwak kī‑ayamihtāwak, ayisk namōya wāhyaw kihci-ōtēnāhk ohci kā‑cīstahāskwātācik ēsa. nistwāw ēsa ē‑masinahikātēk, nistam Jewak otitowēwin, ēkwa Latin ēkwa Greek.
[21] kihci-ayamihēwiyiniwak ēsa itēwak Pilata, “ēkāya itastā, ‘Jewak okihci-okimāmiwāwa,’ māka nawac ōmisi kita-itastāyan, ‘awa nāpēw kī‑itwēw niya ōma Jewak okihci-okimāmiwāwa.’”
[22] Pilate ēsa ōmisi itēw, “anima kā‑kī-masinahamān namwāc kita-kwēskasinahikātēw.”
[23] ē‑kī-cīstahāskwātācik Jesusa, simākanisak kī‑otinamāsowak okikiskācikaniyiwa pā‑pēyak ē‑ayācik. kī‑otinamwak ēsa otakohpiyiw misiwē ē‑apihkātēyik ēkāya nānitaw ē‑kaskikwācikātēyik
[24] ōki simākanisak ēsa ititowak, “kiyām ēkāya tātopitētān, mahti sīkiwēpinikētān, ēkosi awiyak otahowēci kita-ayāw.” ēwako ē‑kī-ihkihk kita-ohci-tipipayik kihci-masinahikēwin ōmisi ē‑itastēk: “kī‑mātinamātowak nitayiwinisa ēkwa kī‑astwātowak nitakohp.” ēwako ōma kā‑tōtahkik ōki simākanisak.
[25] cīki pimitāskwahikanihk ita Jesus kā‑akocihk, ēkota kī‑nīpawiyiwa okāwiya, ēkwa okāwīsa, Mary owīkimākana Clopas, ēkwa Mary Magdalene.
[26] Jesus ē‑wāpamāt okāwiya ēkwa anihi okiskinohamawākana kā‑sākihāt ēkota ē‑nīpawiyit, ōmisi itēw okāwiya, “tāpiskōc kikosis isi kitāpamāhkan.”
[27] ēkwa ōmisi itēw anihi kiskinohamawākana, “pēyakwan kikāwiy isi pamihāhkan.” ēkospīhk ohci kī‑kīwētahēw ta‑wīkiyit wīkihk.
[28] Jesus kiskēyihtam ēsa kahkiyaw kīkway kita-kī-tōtahk āsay ē‑kīsihtāt. ēkota ohci kita-tipipayiyik kihci-masinahikēwinihk kā‑itastēyik kita-tāpwēmakaniyik itwēw ēsa, “ninōhtēyāpākwān.”
[29] ēkota kī‑astēw wāwiyēyākanihk sōmināpoy ē‑sīwākamastēk; ēkosi kī‑pakastawēhamwak kā‑otahcikēmakahk sāpopēkinikan sōmināpōhk ēwako ē‑itāskwahamawācik mistikohk Jesusa otōniyihk.
[30] Jesus ēsa kī‑otahtam anima sōmināpoy otōn ohci ēkwa itwēw ēsa, “kīsihtāniwiw.” ēkwa ē‑tapahtiskwēyit kī‑ati-pōni-pimātisiw.
[31] ēkwa Jewak onīkānīwak kakwēcimēwak ēsa Pilata mahti ta‑kī-pakitinamākocik kita-kī-kaskikātēhomiht ēkwa kita-nihtinamiht anihi miyawa kā‑akociniyit pimitāskwahikanihk. ōma kā‑kakwēcimācik ē‑niyānano-kīsikāk ohci, ēkosi ēkāya ē‑nitawēyihtahkik kita-akociniyit ē‑ayamihēwi-kīsikāyik, wiya ēwako ē‑kihci-ayamihēwi-kīsikāk.
[32] ēkwa simākanisak kī‑nitawi-kaskikātēhwēwak anihi nāpēwa kā‑kiki-nipahimiht Jesusa.
[33] māka ē‑otihtācik Jesusa, ē‑wāpahtākik āsay ēsa nipiyiwa, ēkosi namōya kaskikātēhwēwak ēsa.
[34] māka pēyak ana simākanis kī‑tahkamēw ēsa Jesusa ospikēkaniyihk, ēkwa mihko ēkwa nipiy ohcikawiniyiw ēkota ohci.
[35] ana kā‑wāpahtahk ōma kī‑āyimōtam ēsa ēkota ohci kita-tāpowakēyihtamihk. kiskēyihtam ēsa anima kā‑kī-itwēt tāpwē ēkosi ē‑kī-ispayiniyik.
[36] ēwako ōma ē‑kī-tōcikātēk kita-tipipayiyik kihci-masinahikan, “namōya kita-ispayihik kita-pīkonamoht oskana.”
[37] ēkwa kotakihk itastēw, “kita-wāpamēwak anihi kā‑kī-tahkamācik.”
[38] ōma ē‑kī-ispayik Joseph, Arimathea ōtēnāhk ohci, kakwēcimēw ēsa Pilata kīspin kita-kī-nihtinahk Jesusa wiyawiyiw kita-nahastāt. Joseph ēsa kī‑pimitisahwēw Jesusa, māka namwāc awiya ē‑ohci-wīhtamawāt ayisk ē‑kī-kostāt Jewikimāwa. Pilate itēw ka‑kī-ayāyit miyaw, ēkosi Joseph itohtēw ē‑nitawi-otināk ē-sipwētatāt.
[39] Nicodemus ēwako nīkān kā‑kī-nīpā-kiyokawāt Jesusa, kī‑wīcōhkamawēw Josepha, ē‑pimowitāt ēsa mitātahtomitanaw kosikwan maskihkiya kā‑wīkimākwahki, pikiw ēkwa wīkimākohon mistikohk ohci aloes isiyihkātamwak.
[40] ōki nīso nāpēwak kī‑wēwēkinamwak anima miyaw wāpiskēkin ohci ē‑kikinahkik ōhi miyākohona ēwako māna ēsa ē‑isīhcikēcik Jewak.
[41] ēkota kistikān kī‑ayāw ita Jesus kā‑kī-nipahiht, ēkwa ēkota sēkwātihkānihk kī‑ayāw ēkāya wīhkāc cēskwa miyaw ēkota ē‑kī-nahastāhk.
[42] wiya ē‑wi-otākosiniyik kita-ayamihēwi-kīsikāk, ēkwa kisiwāk ē‑nēhpēmastēk ita kita-nahiniht, ēkosi kī‑nahastāwak ēkota.