[1] “ē‑tāpwēyān ōma kā‑itwēyān, awiyak nāpēw ēkāya kā‑pīhtikwēt iskwāhtēmihk ohci māyatihko-mēnikanihk, māka ē‑pāstāstawiht nānitaw ohci, ēwako okimotiw mīna okimotisk.
[2] ana nāpēw kā‑pīhtikwēt iskwāhtēmihkānihk ohci, ēwako kā‑kanawēyimāt māyatihkwa.
[3] okanawiskwāhtawēw yōhtēnamawēw okanawēyimāyatihkwēwa ēkwa pēhtāk ē‑tēpwātāt omāyatihkoma, ē‑wīhāt nisitohtāk ēkwa wayawīhtahēw.
[4] ispī ē‑kī-wayawīhtahāt nīkānohtēw, ēkosi pimitisahok, ayisk nisitohtāk ē‑itihtākosit.
[5] namwāc kotaka awiya ta‑pimitisahwēyiwa, māka ta‑tapasīyiwa, ayisk ēkāya ē‑nisitohtākot.”
[6] ēwako ōma otaspahākēmowin Jesus, māka namōya ohci-nisitohtāk tānisi ē‑wī-kakwē-nisitohtamōhāt.
[7] ēkwa kīhtwām ōmisi itēw Jesus, “nitāpwān ōma kā‑itwēyān, niya tāpiskōc iskwāhtēmihkān māyatihkwak kita-ohci-pīhtikwēcik.
[8] kahkiyaw kotakak kā‑kī-pē-nīkānīstawicik ēwakonik okimotiwak mīna okimotiskak, māka namwāc ohci-natohtākwak māyatihkwa.
[9] niya ōma iskwāhtēmihkān. aniki kā‑pē-pīhtikwēcik niya ohci kita-pimācihāwak. ta‑pē-pīhtikwēw ēkwa kita-ati-wayawīw mīna ta‑miskam ka‑ohci-mīcisot.
[10] okimotisk pē‑pīhtikwēw nayēstaw piko ohci kita-kimotit, ta‑nipahtākēt, mīna ta‑misiwanācihiwēt. nikī-pē-itohtān ēkota ohci kita-ayācik wēyōci-pimātisiwin.
[11] “niya tāpiskōc okanawi-māyatihkwēw ē‑tēpakēyimot kita-nipōstamawāt omāyatihkoma.
[12] māka awiyak kā‑masinahikēhiht ēkāya wīhkāc ē‑kanawēyimāt māyatihkwa mīna ēkāya ē‑tipēyimāt, nakacipahēw ispī ē‑wāpamāt mahihkana, ēkosi ana mahihkan otihtinēw māyatihkwa mīna siswēyāmohkēw.
[13] ana masinahikēhākan tapasīw ayisk masinahikēhāw, ēkwa namōya nākatohkēw māyatihkwa.
[14] niya miyo okanawēyimāyatihkwēw. ē‑isi-kiskēyimit ohtāwīmāw, mīna nīsta nikiskēyimāw ohtāwīmāw, mīna ēkosi isi nikiskēyimāwak nimāyatihkomak, mīna nīsta nikiskēyimikwak mīna nitēpakēyimon kita-nipōstamawakik.
[16] kotakak ihtakowak māyatihkwak ē‑tipēyimakik, ēkāya ē‑ayācik ōta pīhci-mēnikanihk. ēwakonik mīna piko kita-pēsiwakik; kita-natohtamwak nipīkiskwēwin mīna kita-pēyakōskānēsiwak ēkwa pēyakoyiwa kita-kanawēyimikocik.
[17] “ohtāwīmāw nisākihik ayisk nitēpēyimon kita-nipiyān, ēkota ohci kāwi kita-miyikawiyān nipimātisiwin kīhtwām.
[18] namōya awiyak nika-kī-nipahik. niya pakitinamāni kita-nipahikawiyān. nikitāpamikon kita-pakitinamān ēkwa kāwi kita-otinamān. ēwako ōma ohtāwīmāw kā‑kī-itasowāsit kita-itōtamwak.”
[19] ōhi pīkiskwēwina ohci, Jewak pahpiskihci kī‑isi-māmitonēyihtamwak.
[20] mihcēt ēsa itwēwak, “maci-ahcāhkwa pīhciyawēskāk, ka‑kīskwē-ayāw! tānēhki kā‑natohtawāyēk?”
[21] kotakak ayisiyiniwak itwēwak, “awiyak ayisiyiniw kīspin pīhciyawēskāk maci-ahcāhkwa namwāc ēkosi ta‑kī-isi-pīkiskwēw. awiyak ē‑pīhciyawēskākot maci-ahcāhkwa ta‑kī-kaskihtāw cī kita-wāpihāt nāpēwa ēkāya ē‑wāpiyit?”
[22] ēkwa kī‑otihcipayiw wīhkohtowin ita ē‑kiskisitotamihk ispī kā‑kī-kīhtwām-kanātakihtamihk kihci-ayamihēwikamik Jerusalemihk, ē‑mēkwā-pipohk ōma.
[23] Jesus pa‑pimohtēw Solomon opiskihcikamikosihk kā‑itamihk pīhci kihci-ayamihēwikamikohk
[24] Jewak ēsa māwacihitowak ita ē‑ayāyit Jesusa ōmisi ē‑itācik, “tānēhki kā‑pēhoyan kita-wīhtamawiyāhk tāpwēwin? kiya cī ōma onawasōnākana kisē-manitow?”
[25] Jesus ōmisi itēw, “āsay kikī-wīhtamātināwāw, māka namwāc kiwī-tāpwēhtawināwāw. anihi isīhcikēwina kā‑tōtamān nohtāwiy owīhowinihk ohci ninātamākon ēwakoni.
[26] māka namōya kiwī-tāpwēhtēnāwāw ayisk namōya kiyawāw nimāyatihkomak.
[27] nimāyatihkomak natohtamwak kā-isi-itihtākosiyān, nikiskēyimāwak ēkosi nipimitisahokwak.
[28] nimiyāwak kākikē-pimātisiwin, ēkosi namōya wīhkāc kita-nipiwak ēkwa namōya awiyak nika-kī-maskamik.
[29] anihi kā‑kī-miyit nohtāwiy ayiwāk itēyihtākwanwa ispīhci kahkiyaw kotaka, ēkosi namōya awiyak ta‑kī-maskātwēw nohtāwiya opamihiwēwiniyihk ohci.
[30] nohtāwiy ēkwa niya tāpiskōc pēyak ayisiyiniw.”
[31] ēkosi ēkwa Jewa āsay mīna māwasakonēyiwa asiniya kita-pimwasinātikot.
[32] Jesus ōmisi itēw, “nikī-pē-tōtēn miyo-tōtamowina ē‑wāpahtamēk anihi nohtāwiy ē‑kī-miyit kita-tōtamān. tānānihi ēwakoni ohci kā‑wī-pimwasināsiyēk?”
[33] Jewak itēwak, “namōya wiya kimiyo-tōtamowina ohci kā‑wī-pimwasinātitāhk, māka kipāstāmowin ohci. kiya ōma piko ē‑nāpēwiyan, māka ē‑wī-kakwē-manitōwiyan!”
[34] Jesus ē‑naskwēwasimāt itēw, “masinahikātēw kiwiyasiwēwiniwāhk manitow ē‑kī-itwēt, ‘kiyawāw manitowak.’
[35] kikiskēyihtēnānaw ē‑itasinahikātēk kihci-masinahikēwin ē‑tāpwēmakahk kākikē, ēkosi kisē-manitow ‘manitowak’ kī‑isiyihkātēw anihi ayisiyiniwa kā‑kī-miyimiht otācimowin.
[36] māka niya wiya ohtāwīmāw ninawasōnik ēkwa ē‑pē-itisahot ōta askīhk, tānisi māka kā‑ohci-itwēyēk ē-pāstāhoyān, ayisk ē‑itwēyān niya ē‑manitowikosisāniwiyān.
[37] ēkosi ēkāwiya tāpwēhtawik kīspin namōya nitōtēn nohtāwiy kā‑nitawēyimit kita-tōtamwak.
[38] māka kīspin nitōtēn ēwakoni, kiyām āta ē‑ānwēhtawiyēk, kanakē kita-kī-tāpwēhtamēk nititōtamowina, ēkota ohci kita-kiskēyihtamēk tāpwē ohtāwīmāw ēkwa niya tāpiskōc pēyak ayisiyiniw.”
[39] āsay ēsa mīna kīhtwām wī‑kakwē-otinik, māka ēkota ohci patinik ē‑ati-sipwēhtēt.
[40] Jesus kāwi kī‑āsowaham Jordan sīpiy ita kā‑kī-sīkahāhtākēyit Johna ēkwa ēkotē kī‑kisātam.
[41] mihcēt ayisiyiniwak kī‑pē-nitawāpamēwak ē‑itwēcik, “John namōya ohci-tōtam mamāhtāwi-kīkwaya ōta, māka kahkiyaw kīkway kā‑kī-itācimāt ōhi nāpēwa ē‑kī-tāpwēmāt ēsa.”
[42] ēkwa mihcēt ēkota ayisiyiniwa kī‑tāpwēyēyimik.