[1] wāpahki kita-wīhkohtohk miyāskākēwi-kīsikāw, Jesus kiskēyihtam ē‑otihcipayiyik kita-nakatahk ōma askiy ēkwa kita-nātāt ohtāwiya. tāpitawi kī‑sākihēw anihi kā‑pimitisahokot, ēkwa kī‑sākihēw iskwēyānihk isko.
[2] Jesus ēkwa okiskinohamawākana kī‑otākwani-mīcisowak. macāyis āsay kī‑sākōcimēw omitonēyihcikaniyihk Judasa, okosisiyiwa Simon Iscariota kita-misihāyit Jesusa.
[3] Jesus kī‑kiskēyihtam ohtāwiya ē‑kī-miyikot māwaci-sōhkātisiwin ē‑itēyihtahk kita-tōtahk omaskawisīwinihk. kī‑kiskēyihtam kisē-manitowa ē‑pē-itisahokot ēkwa kita-wī-kīwētotawāt kisē-manitowa.
[4] Jesus ē‑nīpawit mīcisowināhtikohk kī‑kētasākēw, ēkwa kī‑pakwahtēhototam pāhkohkwēhon.
[5] ēkwa kī‑sīkinam nipiy kāsīhkwēwiyākanihk ē‑ati-kisīpēkinisitēnāt okiskinohamawākana ēkwa ati-pāhkwahamwēw anima ohci kā‑pakwahtēhototahk.
[6] ati-otihtēw Simon Petera, ōmisi kā‑itikot, “kā‑tipēyihcikēyan, ē‑wī-kisīpēkinaman cī nisita?”
[7] Jesus itēw ēsa, “namōya kinisitohtēn tānēhki ōma kā‑tōtamān, māka mwēstas kika-nisitohtēn.”
[8] “namōya wīhkāc kika-kisīpēkinisitēnin!” itēw Peter. Jesus itēw, “kīspin ēkāya kisīpēkinisitēnitāni, namōya kika-okiskinohamawākanimitin.”
[9] ōmisi kā‑itāt Simon Peter, “kā‑tipēyihcikēyan, namōya piko nisita, māka kisīpēkina mīna nicihciya ēkwa nistikwān!”
[10] ōmisi Jesus itēw, “awiyak ē‑kī-kisīpēkastēt kanācihow ēkwa namōya katāc kīhtwām kita-kisīpēkīt, osita piko. kahkiyaw kikanātisināwāw, pēyak piko namōya.”
[11] (āsay kī‑kiskēyihtam Jesus awīniwa ē‑wī-misimikot, ēwako ohci kōh‑itwēt, “kahkiyaw kikanātisināwāw, pēyak piko namōya!”)
[12] ē‑kī-kīsi-kisīpēkinisitēnāt Jesus kī‑postiskam otākwētawēsākay nitawi-apiw mīcisowināhtikohk. “kikiskēyihtēnāwāw cī tānisi ōma kā‑tōtātakok?” itēw Jesus ēsa.
[13] “‘okiskinohamākēw’ kitisiyihkāsināwāw, ēkwa ‘otipēyihcikēw.’ kwayask anima kititwānāwāw, ayisk ēkotowihk niya.
[14] niya kōtipēyihcikēmiwāw mīna kikiskinohamākēmiwāw, nikisīpēkinēn kisitiwāwa. kiyawāw ēkosi kita-kī-tōtātoyēk.
[15] kikiskinohamātināwāw kita-kiskinawāpamiyēk tānisi kita-tōtamēk.
[16] ē‑tāpwēyān ōma, namwāc atoskēyākan ayiwāk itēyihtākosiw ispīhci otōkimāma, ēkwa otitwēstamākēw namwāc ayiwāk itēyihtākosiw ispīhci anihi kā‑pē-itisahokot.
[17] ēkwa ōma ē‑kiskēyihtamēk tāpwēwin. kika-miywēyihtēnāwāw tōtamēko ōhi kā‑wīhtamātakok.
[18] “namōya kahkiyaw kā‑āyimōmitakok; nikiskēyihtēn awīniki kā‑kī-nawasōnakik. māka anima kihci-masinahikēwinihk kā‑itastēk piko kita-tipipayik, ‘ana kā‑wīci-mīcisōmit nimāci-nōtinik.’
[19] kiwīhtamātināwāw ōma pāmwayēs ēkosi ispayik, ēkosi ispayiki kika-tāpwēhtēnāwāw ‘niya ōma kākikē kā‑ohci-ihtakoyān.’
[20] mitoni ē‑tāpwēyān, awiyak miyo-otināci nititwēstamākēma ēwako mīna nimiyo-otinik; ēkwa ē‑kī-miyo-otinit miyo-otinēw anihi kā‑pē-isitisahoyit.”
[21] mwēstas ēkwa Jesus mitoni kī‑mikoskātēyihtam ēkwa namōya kīkway kātāw ē‑itwēt, “tāpwē ōma pēyak kiyawāw ē‑wī-misimit.”
[22] kiskinohamawākanak kitāpahtowak mitoni ē‑māmaskātahkik awīniwa ōma kā‑itāt.
[23] pēyak anihi okiskinohamawākana kā‑sākihāt wītapimik.
[24] Simon Peter ēsa itwahamawēw ē‑itāt, “kakwēcim awīniwa ōma kā‑itāt.”
[25] ēkosi ana okiskinohamawākan cīki ispayihow Jesusa ē‑itāt, “awīna ana, kā‑tipēyihcikēyan?”
[26] Jesus ōmisi itēw “hāw, nika-akohcimāw pahkwēsikanis aspahcikanihk ēkwa nika-miyāw; ēwako ana kā‑itak.” ēkosi pahkwēsikanisa ē‑otināt kī‑akohcimēw aspahcikanihk, ēkwa miyēw Judasa okosisiyiwa Simon Iscariota.
[27] mayaw ē‑otināt pahkwēsikanisa Judas, maci-manitow kī‑māci-tipēyimik. Jesus itēw ēsa, “kakwēciyāho, tōta anima kā‑wī-tōtaman sēmāk.”
[28] aniki wiya kotakak mīcisowināhtikohk kā‑apicik namwāc nisitohtamwak ēsa tānēhki Jesus kā‑ohci-itāt Judasa.
[29] wiya Judas kā‑kī-kanawi-sōniyāwēt, itēyihtamwak ētikwē kiskinohamawākanak Jesus ē‑sīhkimāt kīkway kita-nitawi-atāwēyit kita-āpacihtācik wīhkohtowinihk, ahpō cī kita-miyāyit kīkway okitimākisiwa.
[30] Judas kī‑otinēw anihi pahkwēsikanisa ēkwa ati-wayawīw ēsa. ē‑mēkwā-tipiskāyik ōma.
[31] ē‑kī-wayawīyit Judasa, ōmisi itēw Jesus, “hāw, ayisiyinīwikosisān ēkwa okihcēyihtākosiwin kita-kiskēyihtākwaniyiw; ēkwa kisē-manitow okistēyihtākosiwin kita-kiskēyihcikātēyiw wiya ohci.
[32] ēkwa kīspin kisē-manitow okistēyihtākosiwin kiskēyihtākwaniyiw wiya ohci, ēkosi kisē-manitow wiya ohci kita-wāpahtihēw ē‑isi-kistēyihtākosiyit ayisiyinīwikosisāna ēkwa ēkosi kita-tōtam sēmāk.
[33] nicawāsimisitik, namōya kinwēs kika-wīci‑ayāmitināwāw. kika-nanātonawināwāw, māka ēkwa kiwīhtamātināwāw tānisi ē‑kī-itakik Jewak onīkānīwak, ‘namōya kika-kī-itohtānāwāw itē kā‑wī-itohtēyān.’
[34] ēkosi kimiyitināwāw oski-wiyasiwēwin, ēwako: kā‑isi-sākihitakok, ēkosi isi sākihitok.
[35] kīspin sākihitoyēko, ta‑kiskēyihtākwan nikiskinohamawākanak kiyawāw.”
[36] Simon Peter ēsa kakwēcimēw, “kā‑tipēyihcikēyan, tānitē māka ōma ē‑wī-itohtēyan?” “namōya sēmāk kika-kī-wīcēwināwāw itē kā‑wī-itohtēyān,” itēw ēsa Jesus, “māka mwēstas kika-pimitisahonāwāw.”
[37] Simon Peter itēw ēsa, “kā‑tipēyihcikēyan, tānēhki ēkāya sēmāk ta‑kī-wīcēwitān? nitēpēyimon kita-nipōstamātān!”
[38] Jesus ōmisi itēw, “tāpwē cī ē‑tēpēyimoyan kita-nipōstamawiyan? nitāpwān ōma kā‑ititān, namōya kita-kitow nāpē-pāhpahāhkwān ati-wāpahki iyikohk kī‑itwēyani nistwāw ēkāya ē‑nisitawēyimiyan.”