[1] pēyak nāpēw Lazarus ē‑isiyihkāsot, ē‑wīkit Bethany, kī‑āhkosiw. ēkota Bethany ōtēnāhk Mary mīna osīmisa Marthawa kī‑wīkiwak.
[2] ēwako awa Mary kā‑kī-tōminamwāt ositiyiwa kā‑tipēyihcikēyit ēkwa wēstakāya ohci ē‑pāhkwahamwāt, ēwako mīna ostēsa Lazarusa kā‑āhkosiyit,
[3] ēkosi ōki iskwēwak kā‑wīcisānihtocik nātitisahwēwak ēsa Jesusa, ē‑itācik, “kā‑tipēyihcikēyan, ana kā‑sākihat āhkosiw.”
[4] ispīhk Jesus ē‑pēhtahk ōma, ōmisi itēw, “ōma āhkosiwin namwāc kita-nāspici-nipit Lazarus, ēwako ōma kōh‑ispayik kita-ohci-wāpahcikātēk okistēyihtākosiwin kisē-manitōw, ēkota ohci ayisiyiniwak kita-wāpahtamwak okistēyihtākosiwin manitowikosisān.”
[5] ēkwa Jesus kī‑sākihēw Marthawa mīna wīcisāniyiwa mīna Lazarusa.
[6] māka kā‑pēhtahk ē‑āhkosiyit, pitamā nīso kīsikāw kī‑kisātam ita kā‑kī-kapēsit.
[7] ēkwa mwēstas kī‑itēw okiskinohamawākana, “kīhtwām itohtētāk Judea askīhk.”
[8] okiskinohamawākana ōmisi itik, “okiskinohamākēw, Jewak kinanātonākwak ē‑wī-pimwasinātiskik, ēkosi cī kāwi ēkotē ē‑wī-itohtēyan?”
[9] Jesus ēsa ōmisi itēw, “namōya cī nīsosāp tipahipīsimwān itahtinwa pēyak kīsikāw? kīspin awiyak pimohtēci ē‑kīsikāyik, namwāc ta-piswahcahikēw, ayisk wāpahtam ē‑sākāsoyit pīsimwa ōta askīhk.
[10] māka awiyak ē‑nīpāhtēt ta-piswahcahikēw, ayisk namwāc sākāstēnohk pimohtēw.”
[11] ēkwa ē‑kīsi-pīkiskwēt, itēw, “kitōtēminaw Lazarus kī‑nipēpayiw, māka niwī-nitawi-koskonāw.”
[12] okiskinohamawākana itik, “kā‑tipēyihcikēyan, kīspin māka nipāw, ta‑miywāyāw.”
[13] Lazarus onipiwiniyiw ōma Jesus kā‑wīhtamawāt, māka itēyihtamiyiwa ē‑na-nipāyit kā‑ohci-itwēt.
[14] ēkosi ēsa Jesus kwayask wīhtamawēw, “Lazarus pōni-pimātisiw.
[15] ēkwa kiyawāw ohci nimiywēyihtēn ēkāya ēkotē ē‑ohci-ayāyān, ēkosi kika-tāpwēhtēnāwāw. mahti ēkwa nitawāpamātān.”
[16] Thomas “nīsohtēw” kā‑itiht itēw kita-wīci-kiskinohamawākana, “mahti wīcēwātān okiskinohamākēw kita-wīci-nipiyahk kīstanaw.”
[17] ispīhk Jesus ēkotē ē-takohtēt, kī‑kiskēyihtamōhāw āsay ēsa Lazarus kī‑nahināw nēwo kīsikāw aspin.
[18] Bethany nānitaw nīso tipahāskān Jerusalemihk ohci,
[19] ēkosi mihcēt Jewak kī‑pē-kiyokawēwak Marthawa mīna Marywa kita-kākīcihācik ostēsiyiwa ē‑pōni-pimātisiyit ohci.
[20] ē‑pēhtahk Martha ē‑pē-itohtēyit Jesusa, kī‑nitawi-nakiskawēw, Mary wiya kī‑ay-apiw.
[21] Martha ōmisi itēw Jesusa, “kīspin ōta kī‑ayāyan, kā‑tipēyihcikēyan, nistēsipan namwāc ta‑pōni-pimātisiw.
[22] nikiskēyihtēn māka piko kīkway nitawēyihtamani, kisē-manitow kika-miyik sēmāk.”
[23] “kistēs kita-āpisisin,” itik Jesusa.
[24] “nikiskēyihtēn kita-āpisisihk iskwēyāc kīsikāki ispīhk kahkiyaw ayisiyiniwak āpisisihkwāwi,” itēw.
[25] Jesusa ōmisi itēw, “niya ōma āpisisiniwin, piko ani awiyak tāpowakēyimici kita-pimātisiw, kiyām āta pōni-waskawīci.
[26] ēkwa piko ana awiyak pimātisici mīna tāpowakēyimici namōya wīhkāc kita-pōni-waskawīw. kitāpwēhtēn cī ōma?”
[27] “ēha, kā‑tipēyihcikēyan, nitāpowakēyihtēn kiya kisē-manitow onawasōnākan, manitowikosisān kā‑kī-wī-pē-itohtēt ēsa ōta askīhk,” itēw.
[28] ēkwa ē‑kīsi-pīkiskwēt, Martha kī‑kīwēw ē‑nitawi-wīhtamawāt osīmisa Marywa, “okiskinohamākēw takohtēw ēkwa kinitawēyimik,” itēw.
[29] ēkosi Mary, mayaw ē‑pēhtahk ōma, kī‑pasikōw mīna kī‑nitawi-nakiskawēw.
[30] namōya ōma cēskwa ōtēnāhk ē‑takohtēyit Jesusa, māka kēyāpic ē‑ayāyit ita kā‑kī-nakiskawāyit Marthawa.
[31] anihi Jewa kā‑kī-wītapimikot Mary wīkihk ē‑kākīcihikot mīna kī‑pimitisahok ispīhk ē‑wāpamikot ē‑wayawīt ē‑papāsīt, ē‑itēyimikot ē‑wī-itohtēt ita kā‑kī-nahinimiht ostēsa, ēkotē ē‑wī-nitawi-mātot.
[32] Mary ē‑takohtēt ita Jesusa ē‑ayāyit mīna ē‑wāpamāt, kī‑apipayihow ositiyihk mīna itēw, “kā-tipēyihcikēyan, kīspin ōta kī‑ayāyan, namwāc ta‑pōni-waskawīw nistēs.”
[33] Jesus māka ē‑wāpamāt ē‑mātoyit Marywa, ēkwa Jewa ē‑pē-wīcēwikoyit ēwakoni mīna ē‑mātoyit, kī‑pakwātam mitoni ē‑kīsinātēyihtahk.
[34] “tānitē māka kā‑kī-nahināyēk?” itikwak. “āstam, pē‑wāpahta, kā-tipēyihcikēyan,” itēwak.
[35] Jesus kī‑mātow.
[36] ēkwa Jewa itwēyiwa, “tāpwē ēsa kī‑sākihēw.”
[37] māka ātiht itwēyiwa, “namōya cī kī‑wāpihēw anihi nāpēwa ēkāya kā‑kī-wāpiyit oskac, namōya cī ta‑kī-pimācihēw Lazarusa namwāc ta‑pōni-pimātisiyiwa?”
[38] āsay mīna Jesus mitoni ē‑mōsihtahk kī‑pē-itohtēw anita kā‑kī-nahinimiht sēkwātihkānihk asinīhk, ēkota ē‑kipāpiskapiyit kotaka asiniya.
[39] “wīkatē-tihtipinihk ana asiniy!” itēw Jesus. Martha, wītisāna awa ēkāya kā‑pimātisit, itēw, “kā‑tipēyihcikēyan, āsay ani nēwo kīsikāw aspin kā‑nahastāhk; ta‑māyimākwan āsay.”
[40] Jesus ōmisi itēw, “namōya cī kikī-wīhtamātin kita-wāpahtaman kisē-manitow okistēyihtākosiwin kīspin tāpowakēyihtamani?”
[41] ēkosi anihi asiniya kī‑wīkatē-tihtipinēwak. Jesus ē‑tastasāpit itwēw, “hāw nohtā, kinanāskomitin ē‑natohtawiyan.
[42] nikiskēyihtēn tāpitawi ē‑natohtawiyan. māka ōma nikī-itwān ōki ayisiyiniwak ohci ōta kā‑ayācik, ta‑ohci-tāpowakēyihtahkik ē‑kī-pē-isitisahoyan.”
[43] ēkwa kī‑tēpwēw ē‑kisīwēt, “Lazarus, pē‑wayawī.”
[44] ēkwa ana nāpēw kā‑kī-pōni-waskawīt kī‑pē-wayawīw, ocihciya mīna osita ē‑wēwēkinikahtēyiki mīna ostikwān ē‑wēwēkahpitēyik papakiwayān ohci. Jesus itēw, “mahti āpahohk mīna pakitinihk.”
[45] mihcēt aniki Jewak kā‑kī-pē-kiyokawācik Marywa, ē‑kī-wāpamācik Jesusa ē‑tōtamiyit, kī‑tāpowakēyimēwak.
[46] māka ātiht kī‑nitawāpamēwak Phariseewa ēkwa kī‑wīhtamawēwak tānisi ē‑kī-tōtamiyit Jesusa.
[47] ēkosi ēkwa Phariseewak mīna kihci-ayamihēwiyiniwak kī‑wīci-māmawōpiwak onīkānīwa ē‑itācik, “tānisi ōma kakī‑tōtamahk? mihcēt mamāhtāwi-isīhcikēwina awa nāpēw kā‑tōtahk.
[48] kīspin pakitināyahko kita-ati-tōtahk ōhi kīkwaya, kahkiyaw awiya kita-tāpowakēyimik mīna onīkānīwak Romanak kita-waskawītōtamwak ēkwa kita-misiwanācihtāwak ōma kihci-ayamihēwikamik, kīstanaw pēyakoskān ayisiyiniwak kika-misiwanācihikawinānaw.”
[49] māka pēyak ana Caiaphas, ēwako māwaci-kihci-ayamihēwiyiniw ēwako askīwin, itēw, “mitoni namōya kīkway kikiskēyihtēnāwāw.
[50] ēkāya cī ē‑kiskēyihtamēk nawac ta‑miyopayihikoyēk kiyawāw pēyak nāpēw kita-nipōstamawāt ayisiyiniwa ispīhci wiya iyawisk pēyakōskān ayisiyiniwak kita-misiwanācihihcik?”
[51] namōya wiya ohci ōma kā‑itwēt, māka ē‑māwaci-kihci-ayamihēwiyiniwit ēwako askīwin, ē‑kī-kiskiwēhikēt Jesusa ē‑wī-nipōstamawāyit kahkiyaw Jewa,
[52] namōya piko ēwakoni māka mīna kita-māwasakonāyit kotaka piko itē ē‑isi-ohtaskānēsiyit, nanānis otawāsimisiyiwa kisē-manitowa.
[53] ēkospī ohci kīsikāw kī‑wā-wiyasiwēwak tānisi ta‑isi-nipahācik Jesusa.
[54] ēkosi ēsa Jesus namwāc ohci mosē-pimohtēw Jewak otaskīwāw, māka kī‑sipwēhtēw cīki pakwataskīhk ōtēnāhk Ephraim kī‑kisātam asici okiskinohamawākana.
[55] Jewak kī‑otihcipayiyiw kita-wīhkohtocik miyāskākēwi-wīhkohtowin kā‑itahkik, ēkosi mihcēt ayisiyiniwak kī‑pimohtēhowak wāsakām ohci, Jerusalemihk isi, kita-nitawi-pēkihisocik mwayēs wīhkohkēwinihk wīcihiwēcik.
[56] kī‑nanātawāpamēwak ēsa Jesusa, ē‑kā-kakwēcimitocik mēkwāc ē‑nīpawicik pīhci kihci-ayamihēwikamikohk, “tānisi ē‑itēyihtaman, ta‑pē-itohtēw cī wīhkohtowinihk?” ē‑itwēcik.
[57] aniki kihci-ayamihēwiyiniwak mīna Phariseewak ēsa kī‑itasowēwak kīspin awiya kita-kiskēyihtamiyit tānita Jesusa kā‑ayāyit, ēkosi wīhtamāhtwāwi kita-otinācik.