[1] መንፈስ ፥ በኋላ ዘመን ብዙዎች ሃይማኖታቸውን እንደሚክዱ፥ የሚያስቱ አጋንንትንና የሰይጣናትን ትምህርትም እንደሚከተሉ በግልጥ ይናገራል።
[2] እነርሱም በግብዝነት ሐሰትን የሚናገሩ፥ በገዛ አሳባቸውም የሚቃጠሉ ናቸው።
[3] ጋብቻን እርም ይላሉ፤ እውነት የሚያውቁ ምእመናንም በልተው ያመሰግኑ ዘንድ እግዚአብሔር የፈጠራቸውን ምግቦች ይከለክላሉ።
[4] እግዚአብሔር የፈጠረው ፍጥረት ሁሉ መልካም ነውና፤ እያመሰገኑም ቢቀበሉት ምንም የሚጣል የለበትምና።
[5] በእግዚአብሔር ቃልና በጸሎት ይቀደሳልና።
[6] ይህንም ለወንድሞችህ አስተምራቸው፤ የሃይማኖትን ቃልና የተከተልኸውን መልካም ትምህርት እየመገብሃቸው፥ የተመረጠ የኢየሱስ ክርስቶስ አገልጋይ ትሆናለህ።
[7] ከረከሰ ጨዋታና ከባልቴቶች ተረት ግን ራቅ፤ ራስህንም ለመልካም አምልኮ አስገዛ።
[8] ለሥጋ መገዛት ለጥቂት ዘመን ይጠቅማል፤ መልካም አምልኮ ግን በሁሉ ግዳጅን ትፈጽማለች፤ በዚህ ዓለምና በሚመጣውም ዓለም የሕይወት ተስፋ አላት።
[9] ነገሩ የታመነ ነው፤ በሁሉም ሊቀበሉት ይገባል።
[10] ስለዚህ እንደክማለን፤ እንሰደባለንም፤ ሰውን ሁሉ፥ ይልቁንም የሚአምኑትን አዳኝ በሆነው በሕያው እግዚአብሔር ታምነናልና።
[11] ይህን እዘዝና አስተምር።
[12] በቃልና በኑሮ፥ በፍቅርም፥ በእምነትም፥ በንጽሕናም ለሚያምኑት ምሳሌ ሁን እንጂ ታናሽነትህን ማንም አይናቀው።
[13] እስክመጣ ድረስ በማንበብና በመምክር፥ በማስተማርና በመጸለይ ተጠንቀቅ።
[14] ትንቢት ከመናገር ጋር በጳጳሳት እጅ መጫን የተሰጠህን በአንተ ላይ ያለውን ጸጋ አታቃልል።
[15] ፍጹምነትህ በሁሉ ይታወቅ ዘንድ ይህን አንብብ፤ በዚህም ጸንተህ ኑር።
[16] እንግዲህ ለራስህና ለትምህርትህ ተጠንቀቅ፤ በእነዚህም ጸንተህ ኑር፤ ይህን ብታደርግ ራስህንም፥ የሚሰሙህንም ታድናለህና።