[1] Isos agoli wakay batang sa sapa Ordan, siyo piyagbalayan gayed in Betek pag Abyan. Siyo piyaanggat in Abyan sa moyod.
[2] Apatnapo ka ibeng siyo piyagtepeng in diyablo. Ina pag kadogayen siyo yewed mamangan. Paka kalbas siyo agkayawes wa gayed.
[3] In diyablo keyen sa kansiyo, No kao ngani in Bodang Diyos, na sogowen anda pag bato matang mipangwat pamangnen.
[4] Kamay keyen Isos, In Agisolat keyen, Yewed sa pamangnen waget agkaboway in mangyan.
[5] Isos piyaanggat in diyablo sa osai ka mabwat pag kobat. Isos piyarongaw, piyapangkit sa kansiyo kadogayte agpenpenek in boo mga sakopan sa boo kobat.
[6] Keyen in diyablo, Ina pag boo kangay batay piyagpasakop sa kaimo, osai in boo kalakoyen kangay batay piyagtaboy sa kaimo. Angkataw ina tiyaboy wa sa kangay, matang kangay wakay taboyen kamayba sa nakay kangay beet.
[7] Matang no kao somamba sa kangay na ina boo kaimo wa.
[8] Kamay keyen Isos, In Agisolat keyen, In Diyos waget in kaimo sambaen, siyo in kaimo Kapwan. Siyo waget in kaimo paniwalaen.
[9] Kalbas Isos piyaanggat in diyablo sa tangrawan in bobongan sa balay lakoy Diyos sa Irosalim. Keyen in diyablo, No kao ngani in Bodang Diyos na kao palabo asin.
[10] Angkataw keyen in Agisolat, In Diyos batay agsogo kansiyo mga angil agalapet sa kaimo.
[11] Osai keyen, Kao kansiro batay piyagatang, karam kaimo bitis batay asolpo sa bato.
[12] Kamay keyen Isos, Apo din Agisolat keyen, Ayaw kaimo agtepengen in Diyos in kaimo Kapwan.
[13] Paka in diyablo alobosan wa mga padalan agtepeng kay Isos, siyo panaw wa, agpanaya wakay sa osai kay ka kabetek agtepeng sa kansiyo.
[14] Isos moli wakay sa kobat Galiliya, apo in kabaloyan in Betek pag Abyan. In barita panawen sa kansiyo biyaba asin pag boo kobat.
[15] Siyo agpatoldo sa kansiro mga balay pagpaniponan, kalbas siyo piyaglakonaw in boo mangyan.
[16] Isos pataboy sa bayan Nasarit, asin tangona siyo mistobo. Sa Ibeng Pamainga siyo misoroy sa balay pagpaniponan, kataw ina in kansiyo ogali. Siyo tomaydek batay agbasa sa mga Agisolat.
[17] In tiyaboy sa kansiyo in aklat siyolat in poropita Isayas. Kansiyo biyoswang in aklat, kansiyo piyamangkit, kalbas biyasa in kabetek in agisolat, keyen,
[18] In Abyan in Kapwan sa kangay, angkataw ako kansiyo iidang agpatoldo sa mga maidap in Maal pag Barita. Ako kansiyo siyogo agsabi sa mga piyagbilanggo keyen kamo batay wa piyagpalpas, osai sa mga beleg keyen kamo batay wakay kangitan. Ako siyogo agpaboway sa mga piyagpaidapan,
[19] osai agbarita keyen ngona daan pag dagon in Kapwan batay agpamaboway.
[20] Kalbas kansiyo wakay kiyopot in aklat piyaoli wa sa agalapet. Kalbas siyo tomokkaw. In boo sa balay pagpaniponan agpangkit gayed sa kansiyo.
[21] Kansiyo siyabi sa kansiro keyen, Ngona wa daan in kamo agparengey, mibaloy wa in siyabi ina pag Agisolat.
[22] Siro boo agmaal sa kansiyo. Siro agsoyo sa kaalenen in kansiyo mga agiplaong. Siro keyen, Yewed mana ina in bodang Osi?
[23] Keyen Isos, Tiyak kanyo batay siyabi sa kangay in piyagsabi keyen, Laki Agpanggamot, kaimo paorawen in kaimo sadiri maskit. Osai kanyo batay din siyabi keyen, Kaimo din pangwaten atai sa kaimo daan kobat in kami abaritaan kaimo piyangwat sa Kapirnaom.
[24] Isos keyen kay, Totoo ngani idapo poropita piyagkaanggayan sa kansiyo daan kobat.
[25] In kangay piyagsabi, tangona sa kabetek idapo odan sa kobat Israil tolo ka dagon kalaati anggan maloba wa in yawes, ina in kabetek Iliyas, aronaw nges asin sa mga kasokponan Israil mga kagbaiyan balo,
[26] kamay Iliyas yewed siyogo kamayba kay nakay sa kansiro, dayem sa osai ka kagbaiyan balo yewed Odyo sa bayan Saripta sa kobat Sidon.
[27] Osai sa kabetek Ilisiyo, aronaw nges in mga apo kagwali panyakit sa kobat Israil, kamay idapo piyaoraw sa kansiro no yewed Naaman in taga Siriya agbangen.
[28] Paka in mga asin sa balay pagpaniponan karengey ina pag siyabi Isos, siro boo maloba wano agkagalit sa kansiyo,
[29] anggan rateng agpaltaydekan. Isos biyaba sa awak bayan, sa pimpingan in boksor in pagtadyokan kansiro bayan. Siyo batay liyabo sa lintoy lakoy.
[30] Kamay Isos domalan daan sa kansiro kagwaraan, siyo panaw wa.
[31] Kalbas Isos mongali wa pataboy sa bayan Kapirnaom sa kobat din Galiliya. Sa Ibeng Pamainga siyo agpatoldo sa mga mangyan.
[32] Siro agsoyo sa kansiyo agpatoldo, kataw apo kabaloyan in kansiyo mga agiplaong.
[33] Ista sa balay pagpaniponan apo osai ka kaliyakiyan piyaglowasan mamaw, maloba wano daet. Siyo mango maksen
[34] keyen, Isos taga Nasarit, nakay in kaimo panawen sa kanyam? Kaya lames kao atai matang kami bonowen? Ako katawan no nakay kao. Kao in Betek, in siyogo Diyos.
[35] Siyo piyangelel Isos keyen, Kao ayaw aglalae. Kao bali wa asin pag mangyan. In boo mangyan agpangkit, in mangyan liigan in mamaw, kalbas biyaliwan wa, idapo kiyaskitan.
[36] Siro boo agsoyo, agsabi sa baatte osai keyen, Nakay lames pag yangaw ina? Baina, Isos apo kabaloyan agboyaw sa mga mamaw, kalbas in mamaw domalagan ngani.
[37] Matang in barita Isos piyarateng asin pag boo kobat.
[38] Isos panaw sa balay pagpaniponan pataboy sa kay Simon balay. Kay Simon babai inang apo maskit maibeng wano in bilog, matang siro omayay kay Isos keyen, Paorawen nges ina.
[39] Isos tomaydek sa bangen in kagbaiyan, biyoyaw in lagnat, toloy maidapo. In inang toloy miyorog, agalapet sa kansiro.
[40] Paka agapon wa in ibeng in boo apo maskit, kamayba nakay pag maskit, biyaba kansiro mga pagbelag kay Isos. Kansiyo yaatang in baatte osai ka apo maskit, piyaoraw.
[41] Osai in mga mamaw domalagan sa aronaw kansiro mga piyaglowasan. In mga mamaw agpango keyen, Kao in Bodang Diyos. Kamay siro piyangelel Isos, yaayaw miplaong, angkataw kansiro atawanan siyo in Kiristo.
[42] Goribaste pasodip panaw wa Isos pataboy sa osai ka moyod, kamay siyo piyagpamangkit in mga mangyan. Paka siyo ngiitan siro agpilit nges keyen, Kami ayaw agbaliwanen.
[43] Kamay siyo keyen, Ako kailangan din sa roma pag mga bayan, agpatoldo in Maal pag Barita panawen sa Diyos agpapoon angkataw ina in dailan kaya ako siyogo.
[44] Kadogay siyo agpatoldo wa sa mga balay pagpaniponan in mga Odyo.