[1] Siyabi kay din Isos sa kansiyo mga agadar keyen, Alimbawa, apo osai ka mangyan aronaw in sangkap, apo piyaalapetan. Apo agsabi sa kansiyo keyen, In kaimo mga sangkap piyagsida in kaimo piyaalapetan.
[2] Kalbas kansiyo biyerya in piyaalapetan keyen, Nakay ina pag kangay arengeyan panawen sa kaimo? Kaimo wa kowintaen in boo kangay kowarta kaimo giyastos, kataw kao idwa maal agalapet kay.
[3] Kalbas manremrem in agalapet keyen, Nakay wa lames in kangay pangwaten? Siyabi in kangay amo piyagkowa wa sa kangay in kangay panawen. Ako yewed kabaloy agarado, makarikoy wakay in agpangayay waget.
[4] A mana, ako katawan wa in kangay batay piyangwat, matang kamayba kiyowa sa kangay in kangay panawen ako apo daan batay agpabelag sa kangay.
[5] Kalbas kansiyo biyerya in boo apo otang sa kansiyo amo. In osai kansiyo tiyanong keyen, Nangkalakoy in kaimo otang sa kangay amo?
[6] Siyo keyen, Osai ka daan kontinir langis. Keyen in agalapet, Anda in listaan in kaimo otang. Dali wa, kaimo wa listaen limampo waget.
[7] Kalbas tiyanong wakay in kadowai keyen, Kao wakay, angkalakoy in kaimo otang sa kangay amo? Keyen, Osai ka daan sako paray. Keyen in agalapet, Anda wa in listaan in kaimo otang. Kaimo wa solaten walompo waget.
[8] Siyabi in mayaman, Maalno in piyangwat in agpamadaya pag agalapet. Siyo katawan agpangwat padalan. Isos keyen kay, In mga agkasadapan sa kobat siro padalanan sa mga kataw siro, labi kay sa mga agkaanggay sa Diyos.
[9] Isos agiplaong kay keyen, Kangay piyagsabi sa kanyo, in kanyo mga kasangkapan atai sa kobat alapeten maal sa agpaybelagan. Na no lobos wa kamo batay piyabelag sa langit sa mga balay idapo kalobosan.
[10] No siyo in maal pag agalapet in kalakoyte na siyo maal din piyaalapetan in lakonaw. In mangyan wakay in agpadaya sa kalakoyte na ina agpadaya din sa lakonaw.
[11] No kamo yewed maal piyaalapetan in mga sangkap atai sa kobat, na nakay kay in batay agpaalapet sa kanyo in tonay gayed pag kasangkapan?
[12] Osai no kamo yewed maal agalapet in mga sangkap in roma, na nakay kay in batay agtaboy sa kanyo in batay nges sa kanyo?
[13] In sogowan yewed kapanawen sa dowai ka kapwan. No kataw ina siyo batay agkagalit sa osai, agpakayawte wakay sa osai. No yewed siyo batay agpanawen maal sa osai, agidapo kabolowan sa osai. Na kamo yewed din kabaloy agpanawen sa dowai, osai sa Diyos osai sa kowarta.
[14] In mga Parisiyo karengey in kay Isos siyabi, kalbas siro agpatawa sa kansiyo angkataw siro solangan sa mga sangkap.
[15] Kansiyo siyabi sa kansiro keyen, Kamo agpakagwali waget maalen sa pangkit mga mangyan, kamay atawanan in Diyos in kanyo galem. Angkataw in piyagpakalakonaw mga mangyan ina piyagidapo kabolowan in Diyos.
[16] Keyen Isos, In mga Batas Mowisis osai in mga siyolat in mga poropita, ina apo kabaloyan anggan sa kabetek Owan in Agpamaotismo. Sogod asin piyagpatoldo wa in Maal pag Barita panawen sa sakopan Diyos, kalbas in baatte osai agpilit misoroy asin.
[17] In langit osai in kobat batay maidapo kamay sa mga Batas idapono batay maidapo kamayba osaite ka pantig.
[18] Keyen Isos, No in kaliyakiyan agbaliwan sa kansiyo babai, mamangkit wakay sa roma, na siyo agpanggaraw wa. Osai no in mangyan miskapet sa biyaliwan wa, na siyo din agpanggaraw.
[19] Keyen Isos, Alimbawa, apo osai ka mangyan aronaw sangkap, mga maal wano in kolay kansiyo mga lambong, ibengibeng bonton in pamangnen.
[20] Sa poon kansiyo agdan apo piyabolalang osai ka mangyan maidap, in ngaran Lasaro, boo sogat in kansiyo bilog.
[21] Siyo beet mamangan sa mga lopisan piyagbenglay in aronaw sangkap. Yewed waget ina, no yewed siyo piyagpasabangenan in mga tito, piyagila in kansiyo mga sogat.
[22] Kalbas matay wa in maidap pag mangyan, biyaba wa mga angil sa saliliyan Abraam sa langit. In aronaw sangkap matay wa din, liyebeng.
[23] In siyo piyagparosa sa toyongan siyo manangra. Kansiyo ngiitan sa adayonaw Lasaro piyagsalili Abraam.
[24] Kalbas siyo mango keyen, Mambey Abraam, ako ayawte wa. Kaimo sogowen Lasaro, sogbowen sa sapa in kansiyo solo, temeken in kangay bibi, kataw ako piyagpakaskitan wano atai pag baya.
[25] Kamay keyen Abraam, Laki bodang, kaimo remremen kao tangona sa kobat maalno in kaimo boway, kamay Lasaro maloba wano agkaidapan. Na ngona siyo piyagpakan apyaan atai, kao wakay piyagpaidapan.
[26] Osai din apo lakoy lintoy sa kantam paywaraan, matang in mangyan atai yewed karateng asin, in asin yewed karateng atai.
[27] Keyen wakay in aronaw sangkap, Na no kataw ina, laki Amang, in kangay nges beet Lasaro pataboyen sa balay kangay amang,
[28] angkataw ako apo kay lima ka belag kaliyakiyan. Siyo kaimo ngani sogowen ista matang siro patoldowen, na dogayan siro idwa atai rateng pag maskit wano.
[29] Kamay keyen Abraam, Apo sa kansiro in mga siyolat Mowisis osai in mga poropita, maniwala wa siro asina.
[30] Kamay siyo keyen, A, laki Amang Abraam, yewed sibay ina, dayem nges pataboy sa kansiro osai ka batang wa matay kalbas boway wakay, na batay wa kansiro piyagbenglay in kansiro mga daet.
[31] Keyen wakay Abraam, No siro dayo maniwala sa mga siyolat Mowisis osai in mga poropita, na siro idbatay daan din maniwala kamayba sa osai ka batang matay boway wakay.