[1] Osai ka Ibeng Pamainga Isos pataboy sa balay osai ka poon sa mga Parisiyo, matang mamangan. Siyo piyagpangkit wa gayed in mga mangyan.
[2] Pasabangen kay Isos in osai ka kaliyakiyan mabaktek in boo bilog.
[3] Kalbas miplaong Isos sa mga Parisiyo osai sa mga agpatoldo in mga Batas keyen, Maal lames sa mga Batas in agpaoraw sa Ibeng Pamainga? O, yewed wa?
[4] Siro idapo somagot. Kalbas yaatang Isos in apo maskit, piyaoraw, kalbas piyapanaw wa.
[5] Kalbas siyabi wakay Isos sa kansiro keyen, No kamo apo bodang kamayba baka malabo sa balao, nakay, idbatay wa lames kanyo kiyowa kamayba Ibeng Pamainga?
[6] Siro yewed wa kasagot.
[7] Asin sa balay Parisiyo ngiitan Isos piyagidang in mga mangyan in mga maalno pag panokkawan. Kalbas kansiyo siyabi anda pag alimbawa
[8] keyen, No apo agpanaya sa kanyo sa kasalan, na ayaw agidangen in maalno pag panokkawan. Karam apo kay piyagpanaya mangyan mabwat kay sa kanyo.
[9] Kalbas in agberya sa kanyo tanan batay pasabangen sa kaimo keyen, Ina pag panokkawan taboyen atai pag mangyan. No kataw ina na kao batay arikoyan, batay tomokkaw sa piyagpakabwatte pag panokkawan.
[10] In maal kay no kao piyagpanaya na kao tomokkaw sa piyagpakabwatte pag panokkawan, angkataw no isag kao ngiitan in agberya na kansiyo batay siyabi sa kaimo keyen, Laki belag, kao atai wa sa maalno pag panokkawan. Kataw ina kao piyagmaal sa pangkit in mga mangyan asin agpalpamangan.
[11] Angkataw in agpakabwat batay piyagpakabwatte. Osai in agpakabwatte batay piyagpakabwat.
[12] Kalbas siyabi wakay Isos sa agberya sa kansiyo keyen, No kao agsandata wakay batay kainan, na ayaw agberyaen in kaimo barkadaan, in kaimo mga belag, in kaimo mga kawaras, in mga aronaw sangkap sa bangen kaimo balay. Angkataw in mga ina batay wakay daan din agberya sa kaimo. No kataw ina, na biyayadan wakay.
[13] Dayem no kao agsandata lakoy batay kainan na in kaimo beryaen in mga maidap, mga pilaw, mga pilay, osai in mga beleg.
[14] Siro idbatay kabayad sa kaimo. Na kao batay agkaanggay, angkataw paka piyaboway wakay in mga maalno pag mangyan na kao batay piyakan Diyos bayad.
[15] In osai ka asin agpamangan karengey in siyabi Isos, kalbas siyabi kay Isos keyen, Agkaanggay in mangyan batay agkoman sa sakopan Diyos.
[16] Keyen Isos, Apo osai ka kaliyakiyan agsandata lakoy batay kainan. Aronaw in piyaalam.
[17] Paka rateng wa in kabetek kansiyo wa siyogo agsabi sa mga piyaalam keyen, Aywawa. Sandata wa in boo.
[18] Kamay siro boo agkabibel. Siyabi in osai keyen, Ako kabili wa kobat. Kailangan ako ista pataboy manibaw. Kao keyen ayaw manremrem daet, laki.
[19] Siyabi wakay in osai keyen, Ako komwa sampo ka baka pangarado. Kailangan ako ista kangay piyatepeng. Kao keyen, Ayaw manremrem daet, laki.
[20] Siyabi in ka tolo keyen, Ako yewed kapataboy angkataw ako bayo taybalang.
[21] Moli wakay in sogowan, ina boo piyaalam sa kansiyo kapwan. Agalitan in kapwan balay, siyabi sa kansiyo sogowan keyen, Kao ista pataboy pakalakas sa mga tongkodan, sa mga dalan, atai paanggaten in mga maidap, in mga pilaw, in mga beleg, in mga pilay.
[22] Kadogayte moli wakay in sogowan, keyen, Laki, mipangwat wa in kaimo piyagsogo kamay maliway kay.
[23] Siyabi in kapwan sa kansiyo keyen, Kao ista wakay sa mga dalan, sa mga kobat, kaimo piliten in mga mangyan, atai paanggaten matang makno kangay balay.
[24] Kangay piyagsabi sa kanyo in mga tokaw piyaalam idapono batay kakoman sa kangay siyandata pamangnen.
[25] Karowan wano ka mangyan in agyanggat kay Isos, kalbas siyo patobang sa kansiro keyen,
[26] No siyo pag mangyan in beet agadar sa kangay, no kansiyo amang osai inang, babai, mga bodang, mga belag, kamayba in kansiyo wa daan boway, no in mga ina kansiyo piyagpakalakonaw labi kay sa kangay na yewed maal siyo kangay pagsarig.
[27] No siyo yewed sandata agyanggat sa kangay kamayba batay piyagbono, na yewed maal siyo agadar sa kangay.
[28] Alimbawa in osai sa kanyo agremrem batay agpangwat balay lakoy bato. Tokaw kay siyo batay tomokkaw agbilang no nangkalakoy in batay bayad, no sibay in kansiyo kowarta.
[29] Kansiyo piyagkalimo karam no agpangwat wa siyo alobosan kowarta na in balay idbatay mibaloy, kalbas siyo batay piyagpatawaan in mga kangitan,
[30] keyen, Ina pag mangyan agpangaas agpangwat kalakoy ina, bago idbatay daan mibaloy.
[31] Alimbawa wakay, osai ka poon lakoy batay piyaglabanan osai wakay ka poon lakoy. Na siyo agsandata batay wa din tomagbo aggira, kamay tokaw kay siyo manremrem no in kansiyo sampo ka libo ka sondalo sibay mandaeg sa kansiyo kalaban apo dalwampo ka libo ka sondalo.
[32] No kansiyo remrem siyo batay diyaeg, na adayonaw kay in kalaban siyo batay agsogo kansiyo mga konsiyal papolong sa kalaban.
[33] Na kataw daan din ina, no in mangyan agalwasi sa boo kansiyo mga sangkap na yewed mayadi siyo agadar sa kangay.
[34] Maal in asing. Kamay no in asing idapo wa matamis, na idapo wa masadap.
[35] Ina idapo wa kabolowan kamayba sa kobat, kamayba sa bongsodan lalosen pampataba diya. Ina piyagbenglay wa. No apo talinga na mamarengey wa.