[1] Karowan wano pag mangyan in rateng, anggan agpaldeksean. Isos tokaw miplaong sa kansiyo mga agadar keyen, Ayaw agtolad sa mga Parisiyo agpakagwali waget. Ina kagwali pamaistobo tinapay.
[2] In boo piyagbetang batay daan piyagngitan, in boo piyagtabon batay daan atawanan.
[3] In kanyo siyabi sa lened batay daan arengeyan sa ibeng. In kanyo piyagkimkimot sa galem balay batay daan piyagpango sa karowan.
[4] Mga laki, kangay piyagsabi sa kanyo, kamo ayaw agkalimo sa mga agpamono mangyan. Paka in mangyan mabono wa siro idapo wa batay mibaloy.
[5] Kangay piyagsabi sa kanyo no sa nakay kailangan kamo agkalimo. Kailangan kamo agkalimo sa Diyos, angkataw siyo apo kabaloyan agbono sa mga mangyan, kalbas paka mabono wa in mangyan siyo apo kay din kabaloyan agbenglay sa toyongan. In Diyos agbangen in kanyo kalimowanen.
[6] Lima ka maya piyagpabili dowai waget ka sintimos. Kamay kamayba osai waget ka rnaya idbatay malibangaw sa remrem Diyos.
[7] Kamaybawa in kanyo mga abok boo kansiyo biilang. Na kamo ayaw agkalimo, angkataw kamo piyagmaal labi kay sa karowan pag mga maya.
[8] Kangay piyagsabi sa kanyo, in agpabelag sa kangay sa pangkit mga mangyan, na siyo batay din piyabelag ako in Bodang Mangyan sa pangkit in mga angil Diyos.
[9] Dayem in agpamangyan sa kangay sa pangkit mga mangyan, na siyo batay din kangay piyamangyan sa pangkit in mga angil Diyos.
[10] In miplaong aglaban sa kangay sa Bodang Mangyan, na ina pag daet in Diyos kabaloy aglibangaw, kamay in aglibak sa Betek pag Abyan, na ina pag daet in Diyos idbatay wa daan aglibangaw asin.
[11] No kamo batay wa piyagosap sa mga balay pagpaniponan, sa adapan mga poon, osai sa mga apo kabaloyan, na ayaw agpanremrem no nakay in batay kanyo siyabi, osai no nangkataw in agsabi,
[12] angkataw asin daan pag betek, in Betek pag Abyan in batay agpatoldo sa kanyo no nakay in maal kanyo siyabi.
[13] Osai ka kaliyakiyan sa tiponan miplaong kay Isos keyen, Laki Agpamatoldo, kaimo sogowen in kangay kakaan keyen taboyen wa sa kangay in kangay bagiyan in ogon kanyam amang.
[14] Isos keyen, Laki, idapo agpangwat sa kangay tanongan matang agbagi.
[15] Kalbas kansiyo siyabi sa kansiro boo keyen, Kamo agingat, ayaw kamo agkabeet sa aronaw sangkap, angkataw in kantam boway yewed sa karowen mga sangkap.
[16] Kalbas giisod Isos osai ka alimbawa keyen, In osai ka mangyan mayaman karowan wano ngani in ani sa kansiyo tobigan.
[17] Kalbas siyo manremrem keyen, Nangkataw wa anda ako? Idapo wa pagbetangan in kangay ani.
[18] Manremrem wakay keyen, A, maal kay mana in oraken in kangay mga banglin, agpangwat wakay mga balay lakoy, mga banwa, matang asin kangay biyetang in kangay ani osai in boote sa kangay.
[19] Na batay wa apyaan kangay remrem keyen, Yadi, aronaw wa in kangay sangkap, maal wa ako agpakabosog, maal wa agbarik, aglasing, angkataw in kangay pamangnen agibetang idbatay malobos anggan dogay wano.
[20] Kamay siyabi in Diyos sa kansiyo keyen, Kao idapo bait. Isag daan pag yabi batay wa piyagkowa in kaimo boway. Na kay nakay wa ina aro pag mga boote?
[21] Kataw ina ngani in batay mibaloy sa mga agpasandig sa sangkap, kamay sa pangkit Diyos siro maidap wano.
[22] Siyabi Isos sa kansiyo mga agadar keyen, Ina in dailan kaya ako keyen ayaw agkariyaban keyen, idapo batay kiyoman matang kitam agkaboway, idapo batay damit sa bilog.
[23] Angkataw osai pamangnen osai in boway, in boway agbangen in lakonaw. Osai damit osai in bilog, in bilog agbangen in lakonaw.
[24] Kanyo remremen in mga owak. Siro yewed agtogda, yewed din agkali. Siro idapo kalongkong pagbetangan pamangnen kamay siro piyagpakoman daan in Diyos. Na kamo piyagmaal in Diyos labi kay sa mga bantog.
[25] Sa agkariyaban idapo batay kabaloy agpakadogay sa kansiyo boway kamayba osai wagette ka dodo ibeng, aon?
[26] Na no kamo yewed kapangwat kalakoyte ina, na nakay batang kamo agkariyaban kay sa mga pamangnen, sa mga damit.
[27] Kanyo remremen in mga agitalo betakan sa kobat. Siro yewed agpanawen, yewed agsimat, kamay in kangay piyagsabi sa kanyo, in poon lakoy Solomon, kamayba siyo mayaman wano, siyo idbatang agsoroy damit kamaalno ina kamayba osai waget asin pag mga betakan.
[28] Na no in mga lalosen, ngona agkaboway, isagte piyagsonog, no ina piyakan damit in Diyos, na kamo labi kay piyagpakan. Kamo mana maloba wano mainaen sa agpasandig sa Diyos.
[29] Na kamo ayaw maloba agpanremrem sa agpamangkit pamangnen osai sapa.
[30] Ina in mga piyagkariyaban in mga yewed kay agpasandig sa Diyos. In kantam Amang sa langit katawan ina boo kantam piyagkailangan.
[31] Labi kay sa boo kitam pasakop sa Diyos, na ina pag boo kansiyo batay piyagtaboy sa kantam.
[32] Kamo pag barkadaante, ayaw agkalimo, angkataw in beet Diyos in kantam Amang in kamo batay din kansiyo sarig agpapoon.
[33] Pabiliyen wa in kanyo mga sangkap, kalbas taboyen sa mga maidap, palitanen osai wakay ka pagsoroyan, pagtiponan mga sangkap sa langit. Ista siro idbatay lobos, idapo batay kapasabangen agpanakaw, idapo din mga ipes agpansida.
[34] Angkataw no saano agbangen in kanyo mga sangkap, na batay din asin in kanyo remrem.
[35] Kailangan kamo sandata kamayba nakay in rateng, alapeten in igang kanyo mga tinglaw.
[36] Kamo nges kataw daan in mga sogowan agpanaya sa kansiro kapwan batang sa kasalan, matang paka rateng osai agberya na toloy agkowa in bengbeng sakbawan.
[37] Agkaanggay in mga sogowan aratengan in kansiro kapwan agpanaya. Kangay piyagsabi sa kanyo, in kapwan batay agkowa in kansiyo maalno pag lambong, in mga sogowan kansiyo batay piyatokkaw, kalbas siyo batay agbagi pamangnen sa kansiro.
[38] No siyo rateng kagwaraan yabi, kamayba ikkay agkaboka, na siro agkaanggay no siro aratengan sandata.
[39] Kanyo remremen, no nges atawanan in kapwan balay no nakay pag betek in agrateng in agpanakaw na idbatay kansiyo piyabayaan iisoroy in kansiyo balay.
[40] Kailangan din kamo agsandata angkataw batay agrateng ako in Bodang Mangyan sa betek yewed kanyo piyagpanaya.
[41] Miplaong Pidro keyen, Laki Kapwan, kay nakay lames kaimo piyagsabi ina pag alimbawa, no sa kanyam, no sa boo mangyan?
[42] Keyen in Kapwan, Kailangan kamo kataw in apo katawanan pag sogowan yewed aglimbang. Siyo in piyangwat kansiyo kapwan katiwala sa amat mga sogowan matang agtaboy kansiro pamangnen sa kabetek.
[43] Agkaanggay ina pag sogowan no moli kansiyo kapwan siyo aratengan agpanawen daan.
[44] Kangay ngani piyagsabi sa kanyo, siyo batay piyagpaalapetan in kansiyo kapwan sa boote kansiyo mga sangkap.
[45] Kamay no ina pag sogowan agremrem keyen dogay kay bayo batay rateng in kansiyo kapwan, kalbas siyo agparakay agbogbog sa kansiyo belag mga sogowan kaliyakiyan kadayo kagbaiyan, kadogay siyo agpakabosog, ag barik, aglasing,
[46] na kansiyo kapwan batay rateng sa ibeng yewed kansiyo piyagremrem, sa kabetek yewed kansiyo atawanan. Siyo batay maloba piyagparosa kansiyo kapwan, piyaagem sa parosa in mga yewed agpaniwala.
[47] In sogowan in katawan in remrem kansiyo kapwan, kamay no siyo yewed agsandata, yewed agpangwat in kansiyo beet, na siyo batay piyarosa maloba wano.
[48] Kamay in sogowan yewed katawan in remrem kansiyo kapwan, kamay siyo agpangwat in sibay piyagparosa, na kalakoyte in kansiyo parosa. In piyakan lakonaw, na piyagasaan in Kapwan batay lakonaw. In piyakan labi kay lakonaw, na piyagasaan in Kapwan batay labi kay lakonaw.
[49] Kaya ako atai pataboy matang agbaba baya sa kobat. Dayem nges maraet wa ina.
[50] Kataw in piyagbaotismo piyagsogbo sa sapa na kailangan kay ako siyogbo sa kaidapan. Maloba maidap in kangay remrem anggan ina yewed kay mibaloy.
[51] Kanyo lames remrem kaya ako atai pataboy matang apyaan in mga mangyan? Yewed. Dayem malsowayan in mga remrem.
[52] Ibat ngona in lima ka mangyan agpaykamalayan batay malawayan. In tolo batay aglaban sa dowai, in dowai batay aglaban sa tolo.
[53] Siro batay malawayan. Batay malaway in amang osai in kansiyo bodang kaliyakiyan. Batay malaway in inang osai in kansiyo bodang kagbaiyan. Batay malaway in biyaran osai in kansiyo manogang.
[54] Siyabi Isos sa karowan mangyan keyen, Paka kanyo ngiitan aglened sa kalabowan ibeng na kamo keyen batay omodan, kalbas ngani omodan.
[55] Osai no in bariyos batang sa paglowasan ibeng na kamo keyen, A, batay agibeng. Kalbas ngani agibeng.
[56] Kamo mga agpakagwali waget. Kamo katawan agpangkit sa mga tanda sa kobat, mga sa langit. Nakay batang yewed kanyo piyagpangkit in mangibaloy wa tandaan ngona pag betek?
[57] Nakay batang kamo yewed kaksiyote agremrem no nakay in maal?
[58] No kao yaabla batay piyagosapan, na sa dalan kay, ayaw kay rateng sa osap maypolong wa. No yewed maypolong na karam kao batay giyoyod sa tiponan in mga poon, kadogayte tiyaboy sa polis, batay biilanggo.
[59] Kangay piyagsabi kao idbatay ngani piyagpalpas anggan apo kay tera in kaimo otang kamayba osai wagette ka sintimos.