[1] Sa kalabing lima ka dagon Tibiryo Sisar mabwat pag poon lakoy, Ponsiyo Pilato poon sa kobat Odiya, Irodis in poon sa kobat Galiliya, in kansiyo belag Pilipi in poon sa kobat Itoriya osai Tarakoniti, osai Lisanyas in agpoon sa Abilinya.
[2] Anas osai Kaypas in mabwat sa mga poon sasirdoti. Ina pag mga betek Owan in bodang Sakaryo sa moyod. Kalbas siyo wa in siyogo Diyos agpatoldo in kansiyo agiplaong.
[3] Matang siyo agipanawan sa boo kobat sa balabaan sapa Ordan agpatoldo keyen, Benglayen wa in kanyo mga daet, pabaotismo wa, na batay wa liibangaw Diyos in kanyo mga daet.
[4] Kataw ina in siyolat in poropita Isaiyas sa kansiyo aklat keyen, Anda in piyagsabi in osai ka agpango sa moyod keyen, Kanyo sandataen in pagdalanan in Kapwan. Pakapyaen wa kamo in kansiyo batay dalan.
[5] In baatte malkep kanyo wa bongsodanen. In baatte boksor baatte bolod kanyo wa papatagen. In agibaliko pag dalan kanyo wa toronen. In daeten pag dalan kanyo wa linisen.
[6] Matang atawanan in boo mangyan in Diyos agpamaboway.
[7] Aronaw in mangyan pataboy kay Owan matang siro biyaotismo. Kalbas kansiyo siyabi sa kansiro keyen, Kamo kagwali mga dopong, nakay in agpatoldo sa kanyo domalagan sa parosa Diyos agrateng?
[8] Pangwaten wa in mga maal pag ogali matang atawanan in mga mangyan keyen biyenglay wa ngani in kanyo mga daet. Ayaw kanyo agremremen keyen kamo kay Abraam mga kasokponan. Kangay piyagsabi sa kanyo, batang atai pag mga bato in Diyos kabaloy agpangwat mga kasokponan kay Abraam.
[9] Ngona daan in wasay agisandata wa batay agpokan sa mga yangaw anggan sa mga dalig. Kamayba nakay pag yangaw in yewed agpanggalem maal batay piyagpokan piyagbenglay sa baya.
[10] In mga mangyan agtanong kay Owan keyen, Na nakay in batay kanyam piyangwat?
[11] Owan keyen, No kamo dowai ka lambong na in osai taboyen sa idapo. Osai no apo pamangnen na agtaboy din.
[12] Apo din mga agpaningil bowis rateng sa kansiyo matang agpabaotismo. Siro keyen, Ai kami, laki Agpatoldo, in kanyam batay piyangwat nangkataw?
[13] Siyo keyen, Ayaw agsingilen in labi kay sa kailangan singilen.
[14] Apo wakay mga sondalo agtanong sa kansiyo keyen, Al kami, nakay in kanyam? Siyo keyen, No kamo agpangayay na ayaw agpamilit, ayaw agbintang. Osai ayaw agsolang sa kanyo bayad.
[15] In mga mangyan agpanaya sa agrateng in Kiristo. In karowan agremrem kay Owan keyen, Karam ina wa.
[16] Matang Owan miplaong sa kansiro keyen, Kamo kangay piyagsogbo sa sapa, kamay in agrateng sa kangay paoriyan, siyo in batay agsogbo sa kanyo sa Betek pag Abyan, osai sa baya. In kansiyo kabaloyan labi kay sa kangay. Ako kalakoyte yewed sibay kamayba sogowan waget aglowat kansiyo tapatos.
[17] Kansiyo wa piyagatang in kansiyo birao matang benglayen in talinga. In paray kansiyo batay piyagbetang sa banglin. Kamay in talinga batay piyagtebed sa baya idapo kalobosan.
[18] Owan aronaw kay bilin sa mga mangyan in siyo agpatoldo in Maal pag Barita.
[19] Kamay kansiyo siyabiyan Irodis in poon panawen kansiyo kiyowa Irodyas in babai kansiyo belag, osai panawen sa aronaw kay pag mga daet kansiyo piyangwat.
[20] Matang Owan piyabilanggo Irodis. Ina osai kay ka daet piyadagdag Irodis sa kansiyo mga daet.
[21] Paka in boo mangyan biyaotismowan wa, Isos din biyaotismowan. In siyo agpandalangin maboswang in langit,
[22] in Betek pag Abyan aglompot, omapon sa kansiyo, apo bilog kagwali bantog kalapati. Apo agiplaong batang sa langit keyen, Kao in kangay piyagmaal pag Bodang. Kao kangay wano piyagkaanggayan.
[23] In Isos mga tatlompo wa ka dagon siyo agparakay wa agpatoldo. In remrem in mga mangyan in kansiyo amang Osi, in kay Osi amang Ili,
[24] in kay Ili amang Matat, in kay Matat amang Libi, in kay Libi amang Milki, in kay Milki amang Diyana, in kay Diyana amang Osi, in kay Osi amang Matatyas, in kay Matatyas amang Amos, in kay Amos amang Naom, in kay Naom amang Isli, in kay Isli amang Nagi, in kay Nagi amang Maat, in kay Maat amang Matatyas, in kay Matatyas amang Simi, in kay Simi amang Osi, in kay Osi amang Oda, in kay Oda amang Diyowana, in kay Diyowana amang Risa, in kay Risa amang Sorobabil, in kay Sorobabil amang Salatil, in kay Salatil amang Niri, in kay Niri amang Milki, in kay Milki amang Adi, in kay Adi amang Kosam, in kay Kosam amang Ilmodan, in kay Ilmodan amang Iir, in kay Iir amang Oswi, in kay Oswi amang Ilisir, in kay Ilisir amang Orim, in kay Orim amang Matat, in kay Matat amang Libi, in kay Libi amang Simyong, in kay Simyong amang Oda, in kay Oda amang Osi, in kay Osi amang Diyonan, in kay Diyonan amang Iliyakim, in kay Iliyakim amang Milya, in kay Milya amang Mainan, in kay Mainan amang Matata, in kay Matata amang Natan, in kay Natan amang Dabid, in kay Dabid amang Isi, in kay Isi amang Obid, in kay Obid amang Boos, in kay Boos amang Salmon, in kay Salmon amang Naason, in kay Naason amang Aminadab, in kay Aminadab amang Admin, in kay Admin amang Arni, in kay Arni amang Isrom, in kay Isrom amang Paris, in kay Paris amang Oda, in kay Oda amang Akob, in kay Akob amang Isaak, in kay Isaak amang Abraam, in kay Abraam amang Tari, in kay Tari amang Nakor, in kay Nakor amang Sirog, in kay Sirog amang Riyo, in kay Riyo amang Pilig, in kay Pilig amang Ibir, in kay Ibir amang Sila, in kay Sila amang Kainan, in kay Kainan amang Arpaksad, in kay Arpaksad amang Siim, in kay Siim amang Nowi, in kay Nowi amang Lamik, in kay Lamik amang Matosalim, in kay Matosalim amang Inok, in kay Inok amang Arid, in kay Arid amang Malalil, in kay Malalil amang Kainan, in kay Kainan amang Inos, in kay Inos amang Siit, in kay Siit amang Adan, Adan in sa Diyos bodang.