[1] Paka agkaboka wa Linggo in mga kagbaiyan agtaboy sa lebengan piyagbaba in mga pamada kansiro siyandata.
[2] Rateng wa siro, kansiro ngiitan kiyowa wa in bato pangkopot, boswang wa in sakbawan lebengan.
[3] Siro misoroy kamay idapo ngiitan in bilog in Kapwan Isos.
[4] In siro agkaidapowan remrem panawen asin, toloy ngiitan dowai ka kaliyakiyan agitaydek sa kansiro balabaan, agrawa in damit.
[5] Siro patalegeb kataw maloba agkalimo. Siyabi in dokalaki keyen, Nakay batang kanyo piyagpamangkit in agkaboway sa pagpabolalangan mga matay?
[6] Idapo wa atai siyo. Siyo boway wakay. Kanyo remremen in kansiyo siyabi sa kanyo in siyo sa Galiliya kay tangona,
[7] in siyo keyen kailangan siyo in Bodang Mangyan batay piyagtaboy sa kabaloyan mga agpamangwat daet, piyako sa kodos, kalbas sa katolo ka ibeng siyo boway wakay.
[8] Kalbas riyemrem wakay in mga kagbaiyan in siyabi Isos.
[9] Siro moli wakay batang sa lebengan. Ina pag boo kansiro giisod sa labing osai, kadayo sa roma pag mga sarig.
[10] Ina pag mga kagbaiyan kora Mariya taga Magdala, Owana, osai Mariya inang Santiyago, osai kansiro kay din pagsarig mga kagbaiyan. Siro in aggisod ina pag boo sa mga katiwala Isos.
[11] Kamay ina pag agiplaong kansiro riyemrem idapo kabolowan, matang idwa piyagpaniwalaan in dokabaiyan.
[12] Kamay Pidro tomaydek, domalagan pataboy sa lebengan. Siyo pabokkong paserek sa leyang, siyo idapo ngiitan no yewed in benang waget. Kalbas siyo moli agsoyo sa mibaloy.
[13] Ina daan din pag ibeng in dowai ka mga agadar agipanaw agtaboy sa bayanan piyagawit Imaos. In kadayowen ina sa Irosalim mga labing osai ka kilomitro.
[14] Kansiro piyaggisod in boo mga mibaloy.
[15] In siro agbarogi agpanggisodan Isos lomwas miyanggat sa kansiro.
[16] Kamay yewed kansiro atawanan keyen ina Isos.
[17] Keyen Isos, In kamo agipanaw nakay ina in kanyo piyagpanggisod? Siro tomaydek wa, agpaypamaereng.
[18] In osai in ngaran Kilyopas keyen, Sa boo mga mangyan agpamataw sa Irosalim ngona kao waget mana in yewed katawan in mibaloy taite wagette?
[19] Isos keyen wakay, Nakay in mibaloy? Siro keyen, In mibaloy kay Isos taga Nasarit. Siyo osai ka poropita in kansiyo kabaloyan agiplaong osai agpanawen lakonaw sa pangkit Diyos osai sa boo mga mangyan.
[20] Siyo tiyaboy in kantam mga koyay osai in kantam mga poon sasirdoti kay Pilato matang bonowen, kalbas siyo piyako sa kodos.
[21] Bago siyo nges in kanyam piyagpanaya batay agpalpas sa mga kasokponan Israil. Osai din sogod mibaloy ina ngona mataw wa ibeng.
[22] Kamay kami agsoyo wano sa biyarita in kalaati mga kagbaiyan sa kanyam barkadaan. Siro karai pasodip pataboy sa lebengan,
[23] kamay yewed kansiro ngiitan in kansiyo bilog. Siro moli wakay agsabi siro apo ngiitan mga angil agsabi keyen Isos agkaboway.
[24] Matang in kalaati kanyam barkadaan pataboy din sa lebengan. Kansiro ngiitan kataw ngani in siyabi in mga kagbaiyan, kamay yewed kansiro ngiitan Isos.
[25] Siyabi Isos sa kansiro keyen, Nakay batang kamo kagwali idapo bait? Nakay batang kamo yewed maniwala sa boo mga siyabi in mga poropita?
[26] Kailangan ngani in Kiristo domalan asin pag boo kaidapan bayo kansiyo kiyowa in kansiyo kalakoyen.
[27] Kalbas piyatoldo Isos sa kansiro in boo piyagsabi panawen sa kansiyo sa mga Agisolat. Piyarakay sa mga siyolat Mowisis anggan din sa siyolat in boo mga poropita.
[28] Paka bangen wa sa bayanan pagratengan in dokalaki, Isos batay kay nges lomampas.
[29] Kamay siyo yaayaw wa in dokalaki keyen, Kao atai wa mesek kanyam, bayapon wa, lened wa. Matang siyo misoroy wa sa balay.
[30] Paka tomokkaw wa batay agkoman, kiyowa Isos in pamangnen, kadogay mandalangin wa, kalbas piyandodo in pamangnen, tiyaboy sa kansiro.
[31] Kalbas toloy wakay siro karemrem, katawan wa keyen ina wa mana Isos. Kalbas siyo toloy wa mapasaw.
[32] Kalbas siro malsiterek keyen, Kaya mana agkaanggay wano in kanta remrem in kitam agpanggisodan karai sa dalan, osai in siyo agpaliwanag sa kanta in mga Agisolat.
[33] Kalbas siro toloy tomaydek moli wakay sa Irosalim. Paka rateng kansiro ngiitan agkatipon in labing osai ka agadar kadayo in roma kay din kansiro mga pagsarig.
[34] Siro boo agpanggisodan keyen, Totoo ngani in Kapwan boway wakay. Siyo papangkit kay Simon.
[35] Giisod wakay in dokalaki in mibaloy karai sa dalan, osai in kansiro bayo atawanan keyen Isos in siyo agbagi pamangnen.
[36] Ina piyagpanggisodan kay in mga agadar toloy asin Isos agtaydek sa kansiro kagwaraan. Kansiyo siyabi keyen, Kamo kataw wa nakay?
[37] Siro ariyaban, alimowan wa keyen kablag.
[38] Kamay siyabi Isos sa kansiro keyen, Nakay batang magolo in kanyo remrem? Nakay batang piyagbaslag kay in kanyo remrem kataw ina?
[39] Pangkiten in kangay mga dalokap, in kangay mga darapa. Ako wa ngani. Ako atangen, pangkiten. In kablag idapo galem, idapo bitol. Kamay maanda, ako bilog wa daan gayed, yewed kablag.
[40] Paka siyabi wa ina piyapangkit in kansiyo mga dalokap, mga darapa.
[41] Kamay siro yewed kay din katiyak panawen sa agkaanggay wano osai panawen din agsoyo. Matang kansiyo siyabi keyen, Atai lames apo pamangnen?
[42] Siyo piyakan dodo siba isda.
[43] Kansiyo kiyowa, kalbas kiyoman. Siro kangitan.
[44] Kalbas kansiyo siyabi keyen, Anda wa in kangay tangona piyagsabi sa kanyo in kitam agpaysarigan kay. Kailangan ngani mibaloy in boo mga agisolat panawen sa kangay sa mga Batas Mowisis, osai in siyolat in mga poropita, kadayo in sa mga Awit.
[45] Kalbas kansiro remrem piyakapya Isos matang atawanan wa in beet siyabi in mga Agisolat.
[46] Kansiyo siyabi keyen, In siyabi sa mga Agisolat keyen kailangan in Kiristo domalan asin pag kaidapan, kalbas sa katolo ka ibeng piyaboway wakay.
[47] Osai kailangan agparakay sa Irosalim anggan sa boo mga kobat, sa kabaloyan in Kiristo ina pabaritaen sa boo mga mangyan keyen, Benglayen wa in daet matang ina liibangaw wa Diyos.
[48] Kamo in mga kangitan wa ina pag boo.
[49] Remremen, in piyangako kangay Amang batay piyagtaboy sa kanyo, ina kangay batay piyagsogo sa kanyo. Na kamo mataw daan sa Irosalim anggan kamo yewed kay piyakan in kabaloyan batang sa Diyos.
[50] Kalbas siro piyaanggat Isos, panaw wa pataboy sa bangen in bayanan Bitanya. Kalbas yoorog kansiyo bakwaw matang siro piyagpandalangin.
[51] In siyo agpandalangin kay sa kansiro siyo piyagpaonaik wa sa langit, siro piyagbaliwan.
[52] Siyo kansiro piyagmaal, kalbas siro moli wakay sa Irosalim agkaanggay wano.
[53] Baatte siro sa balay lakoy Diyos agmaal sa kansiyo.