[1] Anadwo bi, ɔbarima bi a ɔyɛ Yudafoɔ mpanin no mu baako a wɔfrɛ no Nikodemo a ɔsane yɛ Farisini no,
[2] kɔɔ Yesu nkyɛn, kɔka kyerɛɛ no sɛ, “Kyerɛkyerɛfoɔ, yɛnim sɛ Onyankopɔn na ɔsomaa wo, ɛfiri sɛ, obiara ntumi nyɛ nsɛnkyerɛnne a woyɛ yi gye sɛ Onyankopɔn ka ne ho.”
[3] Yesu buaa no sɛ, “Merema woate aseɛ sɛ, sɛ wɔanwo wo foforɔ a, worentumi nkɔ Onyankopɔn Ahennie no mu.”
[4] Nikodemo bisaa no sɛ, “Ɛbɛyɛ dɛn na me abasiriwa yi, bɛtumi akɔ me maame yam ama wɔawo me bio?”
[5] Yesu nso buaa no sɛ, “Mereka nokorɛ akyerɛ wo, sɛ wɔamfiri nsuo ne Honhom mu anwo obi a, ɔrentumi nkɔ Onyankopɔn Ahennie no mu.
[6] Deɛ wɔfiri onipa mu awo no no, yɛ ɔhonam, na deɛ wɔfiri Honhom mu awo no no, yɛ honhom.
[7] Mma ɛnnyɛ wo nwanwa sɛ maka sɛ, ɛsɛ sɛ wɔwo wo foforɔ!
[8] Sɛdeɛ wote mframa nka, nanso wontumi nkyerɛ faako a ɛfiri ba ne faako a ɛbɔ kɔ no, saa ara na Honhom mu awoɔ no nso te.”
[9] Nikodemo bisaa no sɛ, “Yei ase ne sɛn? Mente aseɛ.”
[10] Yesu buaa no sɛ, “Wo, ɔkyerɛkyerɛfoɔ a wodi mu Israel na wonte yei ase?
[11] Deɛ yɛnim ne deɛ yɛahunu na yɛreka akyerɛ mo yi, nanso monnye yɛn nni.
[12] Sɛ meka asase yi so nsɛm kyerɛ mo na monnye nni a, ɛbɛyɛ dɛn na sɛ meka ɔsoro nsɛm kyerɛ mo a, mobɛgye adi?
[13] Obiara nkɔɔ soro da gye me Onipa Ba no a mefiri soro baeɛ no.
[14] “Sɛdeɛ Mose maa ɔwɔ sɛso a wɔde kɔbere ayɔ asɛn dua so wɔ serɛ so no, saa ara na me nso wɔbɛma me so,
[15] na obiara a ɔgye me di no, ɔbɛnya nkwa a ɛnni awieeɛ.
[16] Na sɛdeɛ Onyankopɔn dɔɔ wiase ni, sɛ ɔde ne Ba a ɔwoo no korɔ no maeɛ, na obiara a ɔgye no di no nyera na wanya nkwa a ɛnni awieeɛ.
[17] Onyankopɔn ansoma ne Ba amma wiase sɛ ɔmmɛbu wiase atɛn, na mmom, ɔsomaa no sɛ, ɔmmɛgye wiase nkwa.
[18] “Obiara a ɔgye ɔba no di no, wɔremmu no atɛn; na deɛ ɔnnye no nni no, wɔabu no atɛn dada, ɛfiri sɛ, wannye Onyankopɔn Ba korɔ no anni.
[19] Deɛ Onyankopɔn gyina so bu atɛn ne sɛ: Hann no aba wiase, nanso nnipa ani gye sum ho sene Hann no, ɛfiri sɛ, wɔn nneyɔeɛ nyinaa yɛ bɔne.
[20] Ɔdebɔneyɛfoɔ biara mpɛ Hann no, na ɔremmɛn Hann no, ɛfiri sɛ, ɔsuro sɛ ne nneyɔeɛ bɔne no bɛda adi.
[21] Na deɛ ɔyɛ Onyame apɛdeɛ no ba Hann no mu na obiara ahunu sɛ ɔyɛ Onyame apɛdeɛ.”
[22] Yei akyi, Yesu ne nʼasuafoɔ no firii Yerusalem kɔɔ Yudea akuraa bi ase kɔtenaa hɔ kakra bɔɔ asu wɔ hɔ.
[23] Saa berɛ no ara na Yohane nso rebɔ asu wɔ Ainon a ɛbɛn Salim, ɛfiri sɛ, na nsuwansuwa wɔ hɔ. Nnipa pii baa ne nkyɛn maa ɔbɔɔ wɔn asu.
[24] Saa berɛ no na wɔmfaa Yohane ntoo afiase.
[25] Da bi, Yohane akyidifoɔ bi ne Yudani bi gyee akyinnyeɛ faa ahodwera ho.
[26] Enti, asuafoɔ no kɔɔ Yohane nkyɛn kɔka kyerɛɛ no sɛ, “Kyerɛkyerɛfoɔ, ɔbarima bi a na ɔwɔ wo nkyɛn wɔ Yordan fa dohoa no a wodii ne ho adanseɛ no nso rebɔ asu na nnipa pii rekɔ ne nkyɛn.”
[27] Yohane buaa sɛ, “Obi rentumi nni dwuma a ɛte saa gye sɛ Onyame ka ne ho.
[28] Mo ara modi me adanseɛ sɛ meka kyerɛɛ mo sɛ, ‘Ɛnyɛ me ne Kristo no, na mmom, wɔasoma me adi nʼanim kane.’
[29] Adamfo a ɔboa ayeforɔkunu no wɛn nʼaso twɛn no, na sɛ ɔte ne nne a, nʼani gye. Ɛno nti na mʼanigyeɛ wie pɛyɛ no.
[30] Ɛsɛ sɛ ɔyɛ ɔkɛseɛ na me nso meyɛ ɔketewa.
[31] Dea ɔfiri soro aba no yɛ ɔkɛseɛ sene obiara; Deɛ ɔfiri asase so no yɛ wiaseni na ɔkasa sɛ wiaseni.
[32] Ɔsoroni no ka deɛ wahunu ne deɛ wate nanso, obiara nnye no nni.
[33] Wɔn a wɔgye no di no di adanseɛ sɛ, Onyankopɔn yɛ ɔnokwafoɔ.
[34] Deɛ Onyankopɔn asoma no no ka Onyankopɔn asɛm, ɛfiri sɛ, Onyankopɔn de ne Honhom ahyɛ no ma.
[35] Agya no dɔ ne Ba no enti ɔde biribiara so tumi ahyɛ ne nsa.
[36] Deɛ ɔgye Ɔba no di no bɛnya nkwa a ɛnsa da, na deɛ ɔnnye no nni no, rennya nkwa a ɛnsa da, na mmom, Onyankopɔn asotwe da ne so.”