[1] Na, saꞌingge, magduse ne ke paꞌin kite bi duk pasōng tapakitehan Tuhanin lasane duk aseꞌnen si kite bi?
[2] Asal gaꞌi. Iye matoꞌohin bang pasal magduse, pagsandel ne kite bi pu si Isa Almasi, kuweꞌ ne kite bi meꞌ aꞌa matey gaꞌi ne kapagduse. Hangkan gaꞌi ne kite bi mabayaꞌ magduse.
[3] Kataꞌuhanbi du weꞌ pamandi kitehin bi, tandaꞌ weꞌ sukuꞌ pu si Isa Almasi ne kite bi duk nuhut ne kite bi iye, dalilnen kuweꞌ tumuhut isab kite bi si iye kamateynen.
[4] Hangkan pamandi kitehin bi kuweꞌ kite bi tumuhut matey kamateynen duk kuweꞌ isab kite bi tumuhut kinubul pangubul iyehin, supaya kite bi inurungan umul baꞌahu, kuweꞌ umul Isa Almasihin pamakellum iye balik weꞌ balakat Samate bi Tuhanin.
[5] Peggeꞌ bang dalilnen kuweꞌ kite bakas nuhut iye matey kamateynen, damikkiyan kuweꞌ du isab kite ellum balik magtuhut duk iye pamakellum iyehin.
[6] Kataꞌuhante weꞌ disalite magdusehin kuweꞌ dalil bakas talansang ne patuhut pu si Isa Almasi diyataꞌ olom pangalansang iyehin, supaya disalite magdusehin magkaꞌat ne duk gaꞌi ne kite tahinang banyagaꞌ weꞌ duseten.
[7] Peggeꞌ bang aꞌahin matey ne, gaꞌi ne iye kapagbayaꞌan weꞌ duse.
[8] Duk peggeꞌ kuweꞌ kite bakas matey tumuhut pu si Isa Almasi, kahagad kite weꞌ ellum du isab kite iyan magtuhut duk iye.
[9] Peggeꞌ kataꞌuhante du weꞌ Isa Almasi bakas pinakellum balik amban kamateynen, duk gaꞌi ne teꞌed iye matey-matey balik.
[10] Matey iye duk tapuwasan ne teꞌed weꞌ ne dusehin. Kuweꞌitu ellum iye duk kēmon meꞌ hinangannen mudji Tuhanin.
[11] Damikkiyan isab subey kimmatanbi dibin kuweꞌ aꞌa matey gaꞌi ne kapagduse. Duk kimmatanun bi dibin kuweꞌ ne kaꞌam meꞌ aꞌa bakas pinakellum balik; duk peggeꞌ nuhut ne kaꞌam Isa Almasi kēmon hinanganbin subey mudji Tuhanin.
[12] Hangkan subey gaꞌi pasagadanbi dibin magduse duk subey gaꞌi tuhutbi napsubin.
[13] Daꞌa ūtanun bi dibin magduse duk kaꞌam maghinangan laꞌat. Saguwaꞌ tuhutun bi Tuhanin dambūs-būs peggeꞌ dalilnen kuweꞌ kaꞌam bakas matey bu pinakellum ne balik weꞌ Tuhanin. Ambat Tuhanin iye magbayaꞌ si baranbin supaya kaꞌam maghinangan bentel.
[14] Gaꞌi ne kaꞌam subey tadaꞌag weꞌ dusebin, peggeꞌ tabang Tuhanin du kaꞌam hawal lasane duk aseꞌne si kaꞌamin duk gaꞌ ne niyaꞌ kaput saraꞌin si kaꞌam.
[15] Kaw paꞌinbi, “Na, bang kuweꞌ iyan, peggeꞌ malasa duk maꞌaseꞌ du Tuhanin si kite bi duk gaꞌ ne du niyaꞌ kaput saraꞌin si kite bi, na, makajari kite bi magduse ne paꞌin.” Saguwaꞌ gaꞌi iyan toꞌo.
[16] Kataꞌuhanbi teꞌed weꞌ bang kite ngatu binanyagaꞌ weꞌ aꞌa, hātinen tuhutte teꞌed kēmon meꞌ pangandaꞌakannen. Aꞌa miyaꞌan amute ne duk kite meꞌ banyagaꞌne. Kuweꞌ miyaꞌan du isab dusehin. Bang kite tinagi magduse, dalilnen dusehin amuten duk kite ne banyagaꞌnen peggeꞌ tuhutte pangandaꞌakannen. Kaꞌujudannen matey kite duk tapī si narkaꞌ. Saguwaꞌ bang Tuhanin iye tinuhutten, iye mamanjari amuten, duk ampunne kite duk kimmatanne kite bentel.
[17] Matuꞌuhin kuweꞌ kaꞌam meꞌ banyagaꞌ dusebin saguwaꞌ kuweꞌitu gaꞌi ne. Hangkan hep magsukul ku teꞌed si Tuhan, peggeꞌ kuweꞌitu tinuhut ne weꞌ bi dambūs-būs meꞌ toloꞌ mabennal bakas panoloꞌ si kaꞌamin.
[18] Ubus ne kaꞌam pinaluwas weꞌ Tuhanin amban antanan amubi tagnaꞌin, hangkan gaꞌi ne ūtanbi dibin magduse duk iye kinabayaꞌanbin kuweꞌitu maghinang mabentelin.
[19] Magdalilan ku sabab amu duk banyagaꞌ supaya mura tahātibi pinaꞌinkun. Matuꞌuhin inūtan weꞌ bi dibin maghinangan bayuꞌ-bayuꞌan duse duk sasuku meꞌ hinangan malaꞌatin hangkan kuweꞌ kaꞌam banyagaꞌ dusebin. Saguwaꞌ kuweꞌitu subey tuhutbi dambūs-būs pangandaꞌakan Tuhanin kuweꞌ meꞌ banyagaꞌne maghinang meꞌ mabentelin. Manjari asal hāp ne kaꞌam duk dambūs-būs ne kaꞌam nuhut si Tuhan.
[20] Masa inūtan pe weꞌ bi dibin maghinangan duse, gaꞌ niyaꞌ bayaꞌbi maghinangan bentel.
[21] Ine kagunahan meꞌ hinanganbi magduse miyaꞌan, bu bang taꞌessebbi kuweꞌitu iyaꞌ kaꞌam? Gaꞌ niyaꞌ. Peggeꞌ kaꞌujudan meꞌ hinangan miyaꞌan narkaꞌ.
[22] Saguwaꞌ kuweꞌitu ubus ne kaꞌam pinaluwas weꞌ Tuhanin amban antanan amubi tagnaꞌin, hātinen dusehin. Duk kuweꞌitu meꞌ banyagaꞌ Tuhanin ne kaꞌam duk Tuhanin ne tinuhutbin. Iye panumbas kaꞌamin pahāp Tuhanin ne dem ateybin supaya dambūs-būs ne kaꞌam nuhut Tuhanin duk kaꞌujudannen urungan Tuhanin du kaꞌam umul gaꞌ niyaꞌ tamananne.
[23] Peggeꞌ tumbas si meꞌ aꞌa magdusehin sudda matey siye duk tapī siye si narkaꞌ. Saguwaꞌ lasa-lasahan Tuhanin umul gaꞌ niyaꞌ tamananne si surgaꞌ sabab bakas tahinang Isa Almasi, Panuhutanten bi.