[1] Kite bi meꞌ mabasag masandel si Tuhanin, subey tabangante bi meꞌ malamma sandelnen si meꞌ kasusehanden. Daꞌa iye sinulutten bi diten bi.
[2] Saguwaꞌ kite bi dangan-dangan subey sulutte bi pungtinaꞌite bi masandel pu si Isa Almasihin duk hinangte bi mahāp para si iyehin supaya ngabasag sandelnen.
[3] Peggeꞌ si Isa Almasi gaꞌ hep sulutne dinen saguwaꞌ maglillaꞌ iye diniyawaꞌan. Tasulat sabab inin dem kitab, pinaꞌin, “Meꞌ bissā laꞌat binissā weꞌ meꞌ aꞌa si kaꞌuhin, Tuhan, tewwaꞌ si aku.”
[4] Kēmon pinasulat weꞌ Tuhan dem kitab awwalley, pamanoloꞌ kite bi supaya kite bi taꞌu magsandal bang dem kasusehan duk supaya asig ateyten bi duk gaꞌi usaꞌ pangase-ngasete bi si Tuhanin.
[5] Tuhanin iye manabangan kitehin bi duk kite bi taꞌu magsandal. Duk iye isab mamaꞌasig ateyten bi. Karayaw kaꞌam tabanganne duk kaꞌam magsulut-sulut sa hinangan Isa Almasihin supaya kaꞌam magdūs mudji Tuhanin, Sama Panuhutanten bi Isa Almasi.
[7] Manjari, kimmatanun bi meꞌ pagkasibi masandel pu si Isahin kuweꞌ meꞌ pungtinaꞌibi teꞌed supaya Tuhanin tapudji, peggeꞌ tinayimaꞌ isab kaꞌam weꞌ Isa Almasi.
[8] Peggeꞌ akahante kaꞌam weꞌ hangkan Isa Almasi pitu nabangan kami meꞌ Yahudihin, supaya tapakitene weꞌ Tuhanin kapangandelan, duk supaya tatumanan meꞌ sanggup Tuhan si meꞌ kapapuꞌan kamihin,
[9] duk supaya isab meꞌ aꞌa dumaꞌin Yahudihin tapudjide du Tuhanin sabab aseꞌne si siyehin. Tasulat hep inin dem kitab, pinaꞌin, “Hangkan magpasalamat ku si kaꞌu dem kabangsahan dumaꞌin Yahudihin; magkanta ku mudji kaꞌu.”
[10] Duk tasulat isab, pinaꞌin, “Kaꞌam meꞌ dumaꞌin Yahudihin, patuhut kaꞌam magkēg si meꞌ aꞌa bakas tapeneꞌ weꞌ Tuhanin.”
[11] Duk tasulat pe, “Pudjihun bi Tuhanin, kēmon kaꞌam meꞌ dumaꞌin Yahudihin. Pudjihun bi iye, kēmon kaꞌam meꞌ kabangsa-bangsahanin.”
[12] Duk tasulat weꞌ Nabi Isaya isab, paꞌinne, “Niyaꞌ du iyan inanakan tubuꞌ si Jesse. Duk iye magbayaꞌ si meꞌ aꞌa dumaꞌin Yahudihin. Duk iye pangase-ngasehanden.”
[13] Tuhanin poꞌon pangase-ngasehanbin. Karayaw urunganne kaꞌam kakēgan duk kasanyangan sabab sandelbi si iyehin, supaya pinasōng du pangase-ngasebi si Tuhanin weꞌ balakat Niyawa Tuhanin.
[14] Meꞌ kapungtinaꞌihanku masandel pu si Isa Almasihin, kabugtuꞌanku weꞌ kaꞌam asal meꞌ aꞌa hāp duk kataꞌuhanbi ne teꞌed meꞌ toloꞌ sabab Tuhanin duk makajari ne kaꞌam magtoloꞌ-tinoloꞌ.
[15] Tuꞌu dem sulat inin gaꞌ ku magalang-alang ngakahan kaꞌam sabab meꞌ toloꞌ batang pinaꞌessebanku si kaꞌamin. Hangkan ku gaꞌ magalang-alang, peggeꞌ kawakilan ku weꞌ Tuhanin duk ku manjari daraꞌakan Isa Almasi.
[16] Kuweꞌ ku dalil imam magmahalayak aka-aka mahāp amban Tuhanin si meꞌ bangsa dumaꞌin Yahudi, supaya tasōnganku siye si Tuhan kuweꞌ dalil pariya. Duk tayimaꞌ Tuhanin du siye peggeꞌ pinahāp ateyden weꞌ Niyawa Sutsihin.
[17] Peggeꞌ sukuꞌ pu si Isa Almasi ne ku, gaꞌi ku iyaꞌ magbantu sabab meꞌ tahinangku para si Tuhanin.
[18] Makatawakkal ku missā weꞌ sabab panabang Almasi akuhin hangkan taboꞌoku meꞌ bangsa dumaꞌin Yahudihin nuhut Tuhan. Sandel siye pu Isa Almasi sakaliꞌ takalede meꞌ binissākun duk takitede meꞌ hininangkun.
[19] Weꞌ balakat pinangurung Niyawa Tuhan akuhin, maghinang ku meꞌ hinangan balakatan duk meꞌ hinangan makaꞌulaliꞌ. Hangkan hep antag-antag bakas papīhankun, amban Awrusalam ngeregseꞌ Illiriku, ubus ne minahalayak weꞌ ku si kēmon aꞌa malaꞌihin aka-aka mahāp sabab Isa Almasihin.
[20] Kemuwe matuꞌuhin iye inapaskun magusihat si meꞌ aꞌa gaꞌ bakas makakale aka-aka mahāp sabab Isa Almasihin, peggeꞌ gaꞌi ku mabayaꞌ nurul hinangan aꞌa.
[21] Tuman ne bakas tasulat dem kitabin, pinaꞌin, “Meꞌ aꞌa gaꞌ bakas kaꞌakahanin ujud ngataꞌu du sabab iye. Duk meꞌ manggaꞌ bakas makakalehin tahātide du iyan sabab iye.”
[22] Hinangku magmahalayak inin makaꞌalal akuhin hangkan gaꞌ ku tapiyu si kaꞌam.
[23] Saguwaꞌ kuweꞌitu peggeꞌ ubus ne hinangkun tuꞌu si meꞌ kalahatan matuꞌu inin, araꞌ-araꞌku makajari ne ku hap piyu si kaꞌam. Tiggel ne kabayaꞌku mapiyu nindew kaꞌamin.
[24] Mabayaꞌ ku hap pī si lahat meꞌ bangsa Kastilaꞌin saguwaꞌ pasagid ku dahuꞌ piyu mayaman kaꞌam. Bang kaduhulan ne ku luꞌu si kaꞌam, makajari ne kaꞌam nabangan aku supaya ku lumaꞌus si paglengngankun.
[25] Saguwaꞌ kuweꞌitu tiyaꞌ pe ku hap Awrusalam moꞌo tabang si meꞌ masandel pu si Isa Almasi malaꞌihin.
[26] Peggeꞌ meꞌ masandel pu si Isa Almasi maglahat si Makedoniya duk si lahat Akayahin bakas ngurung sīn pinaboꞌohan hap Awrusalam panabangde meꞌ masandel pu si Isa Almasi mamiskin malaꞌihin.
[27] Duk sinna siye nabang. Duk asal pataꞌ tabangde sukal meꞌ Yahudi masandel pu si Isa Almasihin panumbasde siye, peggeꞌ sabab meꞌ Yahudihin hep puꞌun meꞌ aꞌa dumaꞌin Yahudihin makakale bissā Tuhanin. Hangkan subey isab bahagiꞌande meꞌ Yahudihin meꞌ ledjikiꞌ tasangkaden.
[28] Bang ubus ne hinangku inin, hātinen tasōnganku ne pī si siye kēmon sīn pinaboꞌohan siyehin, patulak ku hap lahat meꞌ bangsa Kastilaꞌin duk pasagid dahuꞌ ku luꞌu nindew kaꞌam.
[29] Bang piyu ku si kaꞌam, kataꞌuhanku du weꞌ boꞌoku kēmon kahāpan amban Almasihin.
[30] Meꞌ kapungtinaꞌihanku masandel pu si Isa Almasihin, malasa du kite bi pu Isa Almasi, Panuhutanten bi duk maglasa-ilasa isab kite bi sabab pinapitu weꞌ Niyawa Tuhanin lasahin dem ateyte bi. Iye inin jānnen hangkan junjungku si kaꞌam, padūs kaꞌam si aku māku-māku si Tuhan,
[31] weꞌ tabangne du ku supaya ku gaꞌi inusaꞌ weꞌ meꞌ aꞌa manggaꞌi manuhut Tuhan si lahat Yahudiyahin. Māku-māku isab kaꞌam karayaw meꞌ masandel pu si Isa Almasi si Awrusalamin sinna du nayimaꞌ tabang binoꞌoku si siye inin.
[32] Manjari, puwas inin bang amban bayaꞌ Tuhan du, piyu ku si kaꞌam ateykun kēgan manamal duk asig ateykun weꞌ bi.
[33] Māku-māku ku si Tuhan, iye mangurungan kite bi kasanyanganin, karayaw kaꞌam luwal tuhut-tuhutanne. Amin.