[1] Kēmon kite bi manusiyaꞌin, subey tuhutte bi meꞌ aꞌa taga kapatut magbayaꞌ si paglahatanten bi peggeꞌ gaꞌ niyaꞌ kaꞌurungan kapatut bang dumaꞌin amban bayaꞌ Tuhan. Duk meꞌ taga kapatut magbayaꞌin, Tuhanin mamatingkoloꞌ siyehin.
[2] Sasuku manguntarahan aꞌa magbayaꞌ si paglahatin, kuntarahande isab Tuhanin, peggeꞌ Tuhanin mamettad siye si hinangde miyaꞌan. Duk ilegga du meꞌ manguntarahan siyehin.
[3] Peggeꞌ meꞌ maghinangan mahāpin gaꞌi talew si meꞌ magbayaꞌ si paglahatin. Luwal meꞌ maghinangan malaꞌatin matinalew si siyehin. Gaꞌi kaꞌam subey tinalew si meꞌ magbayaꞌ si paglahatin samantaꞌan hāp hinanganbin duk sanglitande pe kaꞌam.
[4] Peggeꞌ siye inin daraꞌakan Tuhanin pinapī weꞌ ne para si kahāpanbi du. Saguwaꞌ bang kaꞌam maghinangan laꞌat, talep kaꞌam talew, peggeꞌ taga kapatut siye amban Tuhan ngalegga kaꞌam. Dinaꞌak siye weꞌ Tuhanin ngalegga sasuku maghinangan malaꞌatin.
[5] Hangkan hep subey tuhutbi meꞌ aꞌa magbayaꞌ si paglahatbin duk kaꞌam gaꞌi ilegga duk peggeꞌ kataꞌuhanbi du dem ateybi weꞌ inin subey hininangbin.
[6] Duk hangkan isab kaꞌam patut magbayed sukey bulak atawa sukey ine-ine pāku gubelnohin, peggeꞌ meꞌ maghinang si gubelnohin hinangde du pangandaꞌakan Tuhan si siyehin.
[7] Hangkan bayedanun bi meꞌ patut binayedanin, sukey bulak ke atawa sukey ine-ine ne, duk pagaddatanun bi duk pahadjehun bi meꞌ magbayaꞌ si paglahatbin.
[8] Bang niyaꞌ utangbi, bayedanun bi bang taꞌabut ne ellew pagbayedin. Bisan gaꞌ ne niyaꞌ utangbi, utangan pe kaꞌam seddili. Utang inin lasabi si pagkasibin. Bang maglasa-ilasa kaꞌam, tuhutbi ne saraꞌ sinulat si Musahin.
[9] Paꞌin saraꞌ si Musahin hep, “Daꞌa kaꞌam magjina; daꞌa kaꞌam mapatey; daꞌa kaꞌam nangkew; daꞌa pagnapsuhanun bi alataꞌ saweꞌbin.” Meꞌ daꞌakan inin duk kēmon daꞌakan sinduwehin sumakup diyalem daꞌakan dambuwaꞌ inin, pinaꞌin, “Kalasahanun saweꞌnun kuweꞌ pangalasanu dinun.”
[10] Peggeꞌ bang asal kalasahante pagkasiten, gaꞌi teꞌed iye hinangante laꞌat. Hangkan hep bang kalasahante pagkasiten tatuhutte ne kēmon pangandaꞌakan Tuhanin.
[11] Hangkan subey miyaꞌan hinangbi, lagiꞌ ne peggeꞌ kataꞌuhanbi weꞌ gaꞌi du tiggel tekka ne Isa Almasi balik. Tagnaꞌ pakahagadte pu si Isa Almasihin, kuweꞌ tala-tala pe ellew panimbul Tuhan kitehin saguwaꞌ kuweꞌitu asal tapit ne. Bang kaꞌam dalil aꞌa tuli, subey ne kaꞌam ngape.
[12] Dunya kuweꞌitu inin kuweꞌ dem lindem sabab duse. Saguwaꞌ kuweꞌitu tahalaꞌ ne imut-imut lindemin duk sōng ellew ne. Hātinen, sōng tekka ne balik Isa Almasi. Hangkan subey ne lebbahante kēmon hinangante malaꞌatin duk dalil sundalu magbessi miyaꞌan subey kite panyap nungkaꞌan sasuku malaꞌatin.
[13] Subey kawul-piꞌilten hāp duk patalep si meꞌ aꞌa patennaꞌ dem dantaꞌ ellewin. Hangkan daꞌa kaꞌam maglangohan. Daꞌa kaꞌam magjina atawa magbaꞌis. Daꞌa kaꞌam luwal magsasaꞌ duk daꞌa kaꞌam magkimbū.
[14] Saguwaꞌ batukanun bi kawul-piꞌil Panuhutanten bi, Isa Almasi. Daꞌa teꞌed kaꞌam magpikilan ngūtan napsubin.