[1] Bayaꞌ pakilaleku si kaꞌam maluꞌu si Romahin si Pebe, dambuwaꞌ pungtinaꞌite bi dende, peggeꞌ sandel isab iye pu Isa Almasi. Bahannen nabang-nabangan meꞌ masandel pu si Isa si lahat Kenkereahin.
[2] Pagtekka iye luꞌu, hatulun bi iye pahāp-hāp. Talep inin hinangbi meꞌ masandel pu si Isa Almasihin. Bang niyaꞌ panabanganbi si Pebe inin, tabangun bi teꞌed iye, peggeꞌ ekka aꞌa bakas tatabangne. Duk bisan aku, tatabangne ku isab.
[3] Akahanun bi Pirisila duk Akila weꞌ essebku siye. Bakas siye meꞌ saweꞌku maghinang pu Isa Almasi.
[4] Siye iyan maglillaꞌ matey duk ku hadja tatabangde amban dem kasiya-siyahan. Hangkan asal magsukul ku teꞌed si siye. Duk dumaꞌin hadja aku, saguwaꞌ kēmon meꞌ dumaꞌin Yahudi masandel pu si Isa Almasihin, magsukul isab si siye.
[5] Akahanun bi isab meꞌ masandel pu si Isa luwal magtipun si lumaꞌ disi Akilahin weꞌ essebku siye. Akahanun bi bagaykun Epeneto weꞌ asal essebku iye. Iye hep aꞌa dehellu-dehellu masandel pu si Isa Almasi si lahat Asiyahin.
[6] Akahanun bi Mariyam weꞌ essebku du isab iye. Basag teꞌed iye maghinang luꞌu si kaꞌam.
[7] Akahanun bi isab Andaronik duk Juniyas weꞌ essebku siye. Siye meꞌ pagkasiku Yahudi duk magsumbayaꞌ kami kinalabusu matuꞌuhin. Bantu siye si meꞌ kawakilan weꞌ Isa Almasihin. Dehellu pe siye amban aku sandel pu Isa Almasi.
[8] Akahanun bi isab Ampiliyatus weꞌ essebku iye. Magbagay teꞌed kami peggeꞌ saliꞌ kami sandel pu si Isa Almasi, Panuhutanten bi.
[9] Duk si Urbanu isab, saweꞌte bi maghinang pu si Isa Almasi, duk si Istakis bagaykun, akahanun bi siye weꞌ essebku siye.
[10] Akahanun bi aku isab Apelles weꞌ essebku iye. Takite weꞌ asal teteg teꞌed iye nuhut Isa Almasi. Duk akahanun bi isab disi Aristobul weꞌ essebku siye.
[11] Akahanun bi isab si Herodiyon, pagkasiku Yahudi, duk meꞌ pungtinaꞌite bi masandel pu si Isahin, disi Narkissus magtewtey-anakin weꞌ essebku siye.
[12] Akahanun bi aku isab disi Tiripena duk Tiriposa weꞌ essebku siye. Meꞌ dende inin maghinang si Panuhutanten bi. Duk akahanun bi isab bagaykun si Persis weꞌ essebku iye. Basag teꞌed dende inin maghinang si Panuhutanten bi.
[13] Akahanun bi isab si Rupus duk saꞌinen weꞌ essebku siye. Basag teꞌed sandel si Rupusin si Panuhutanten bi. Duk saꞌinen hāp teꞌed si aku duk pangimmatne akuhin kuweꞌ anakne.
[14] Akahanun bi isab Asinkirit, si Pelegon, si Hermes, si Patarobas, si Hermas, duk kēmon meꞌ saweꞌde masandel pu si Isa Almasihin weꞌ essebku siye.
[15] Akahanun bi isab Pilologo duk andanen si Juliya, duk si Nereyo duk pungtinaꞌine dendehin, duk si Olimpas, duk kēmon ne meꞌ saweꞌde sukuꞌ si Tuhanin weꞌ essebku siye.
[16] Duk bang kaꞌam kēmon magsābu-sābu, magsalam kaꞌam. Kēmon masandel pu si Isa Almasi si meꞌ kalanggal-langgalanin maboꞌo bissā weꞌ essebde kaꞌam.
[17] Meꞌ kapungtinaꞌihanku, junjungku si kaꞌam, papateng-pateng kaꞌam, peggeꞌ niyaꞌ iyan meꞌ aꞌa batang magsapeꞌ kaꞌam duk ne kaꞌam gaꞌi magsulut-sulut. Batang isab kaꞌam boꞌode pasapeꞌ duk ne kaꞌam gaꞌi sandel pu si Isa Almasi, peggeꞌ kuntarahande meꞌ toloꞌ sabab Isa Almasi bakas panoloꞌ si kaꞌamin. Halliꞌanun bi siye.
[18] Peggeꞌ meꞌ aꞌa maghinangan kuweꞌ miyaꞌanin, dumaꞌin paghinanganden Isa Almasi, Panuhutanten bi, saguwaꞌ iye paghinanganden diden. Pahāpde bissāden duk magmā-mā siye nanglitan pagkasiden, hangkan tapadupangde meꞌ aꞌa gaꞌi tantu makahātihin.
[19] Kataꞌuhan meꞌ aꞌahin kēmon weꞌ kaꞌam iyan asal teteg nuhut toloꞌ Isa Almasihin. Hangkan hep ku kēgan sabab kaꞌam. Kabayaꞌankun weꞌ lalem kataꞌubin bang pasal ngataꞌuhan mahāpin, saguwaꞌ bang pasal maghinangan malaꞌatin, halliꞌanun bi teꞌed.
[20] Tuhanin, iye mangurungan kite kasanyanganin, gaꞌi tiggel tabanganne du kaꞌam supaya daꞌag weꞌ bi nakuraꞌ seyitanin. Karayaw kaꞌam ipat Isa Almasi, Panuhutanten bi.
[21] Maboꞌo bissā Timoteo, saweꞌku maghinang si Tuhanin, weꞌ essebne kaꞌam. Duk maboꞌo bissā du isab si Lukiyus duk si Jason duk Sosipater, meꞌ pagkasiku Yahudi weꞌ essebde kaꞌam.
[22] Aku inin Tertiyus. Sulat inin bissā si Paul saguwaꞌ aku manulat iyehin. Essebte isab kaꞌam peggeꞌ aku pungtinaꞌibi du isab sandel pu Isa Almasi.
[23] Aku si Paul missā balik. Si Gayus maboꞌo bissā du isab weꞌ essebne kaꞌam. Iye dapuꞌ lumaꞌ patennaꞌankun duk si lumaꞌne pagtipun-tipunan meꞌ masandel pu si Isahin. Si Erastus mangantan pilak gubelno si puweblo inin, duk si Kuwartus, pagkasite bi sandel pu si Isa Almasi, maboꞌo du isab siye bissā weꞌ essebde kaꞌam.
[24] Karayaw kaꞌam kēmon ipat Panuhutanten bi Isa Almasi. Amin.
[25] Subey pudjite bi Tuhanin. Iye makabasag sandelbin. Ngabasag sandelbin sabab aka-aka mahāp minahalayakku sabab Isa Almasihin. Masa awwalley aka-aka mahāp inin gaꞌ kataꞌuhan meꞌ aꞌahin, saguwaꞌ kuweꞌitu pinakataꞌu ne weꞌ Tuhanin si kēmon aꞌa si dunya. Pinasulat inin weꞌ Tuhanin si meꞌ nabinen. Tuhan maꞌellum salama-lamahin, pangandaꞌakannen weꞌ subey inin minahalayak si kēmon kabangsa-bangsahan supaya siye kēmon sandel duk nuhut si Tuhan.
[27] Tuhanin dambuwaꞌ-buwaꞌ du hadja duk iye hadja asal malalem kataꞌunen. Sabab Isa Almasi pudjite bi Tuhanin salama-lama. Amin. Wassalam